SAM 107 - PATHIAN LEKHABU THIANGTHO (BSI)

Sam Bu 5na: ( Sam 107—150 ) Buaina Tamtak Lak ah Kipat Hukdaw Ziak ah Kipak thu Genna

¹ Aw, Lalpa kiang ah kipak thu gen un, ama chu a pha ngal ah; a ngilneina’n kumtuang a dai ngal a.

² Lalpa tatsate, lungkhamna lak ah kipat a tatdawsate zosia chun, zia gual chun gen uh hen la;

³ gamtin ah kipat, sualam leh tumlam ah kipat leh mallam leh, simlam ah kipat a pui khawm zosia’n le gen uh hen.

⁴ Mi khenkhatte chu gamkeu ah, chênna ding khua neilo ah vâkvâi in,

⁵ gilkial leh dangchâk ah hatsam in a um tau hi.

⁶ Ziaphatchun, a buainau ah kipat Lalpa a hun ko tau a, a lungjinnau ah kipat in a hukdok ta’n;

⁷ chêntheina ding khua a pui tung masia, lampi zang tak in a pui tai.

⁸ Mihing chate a lainat ziak ah, a thilbawl maktakte ziakin, Lalpa chu pâk tau hen!

⁹ Ama’n dangchâkte a hino ah, gilkial taphot chu thilpha’n a hitai sek ngal a.

¹⁰ Khenkhatte thim nuai ah gentheina thuak in a chuu ah, thikkol but leh genthei ah saltâng a hiu a;

¹¹ Pathian thu a la dodâl un, Chungnung pen lemguat a la musit ziak un.

¹² A sepgimna ziak un tawden in a um un; a kilîk un, a panpi ding a mu puau hi.

¹³ Ziaphatchun, a buainau ah kipat in, Lalpa a hun ko un, ama’n a lungdonnau ah kipat in a hukdok ta’ngal a;

¹⁴ thim lak leh thi’na lim nuai ah kipat in a puidok ah, a kol buteu chu a ât tan piak tai.

¹⁵ Mihing chate a lainat ziak ah, a thilbawl mak takte ziakin, Lalpa chu pâk tau hen!

¹⁶ Ama’n sum-eng kotkhakte chu a bawtsia’n, a kamna thiktawnte chu a hibong ta’ngal a.

¹⁷ Mi khenkhatte chu a gitlo ziak ua, nat leh haksatna thuak a um un;

¹⁸ bangma duchâkna a nei puau a, thi’na kotkhak a nai tul tul ui.

¹⁹ Ziaphatchun, a buainau ah kipat in, Lalpa a hun ko un; a lungjinnau ah kipat in a hukdok ta’n;

²⁰ a thu a sawldok ah, chun, a hi’dam ah; a manthaina ding ua kipat in a hukdok sek hi.

²¹ A lungsiatna chuai lo mihingte â ding ah a thilbawl, mak takte ziakin Lalpa chu pâkcha tau hen.

²² Amau chun kipakna thil latte chu piau hen la, a thil bawlte chu kipakna La sa kawm in gen vêl tau hen.

²³ Mi khenkhatte chu long ah tuisuagiat in a chia suk un, tuisâng liante ah chun sumkawl a vei un;

²⁴ Lalpa thilbawl leh, tuili thûk takte ah a thilmak bawlte chu a mu tau a.

²⁵ Ama’n thu a pia’n, thigawpi nasa tak in a hân sak a; zia chun tui kinawk sâng takte a umsak ngal a.

²⁶ Van lam in a kivawk to un, thûk tak in a hung ke’lut sek un; a lungkhamna ziak un a hânsannau a bei zo ta sek hi;

²⁷ a kizial chûk chûk un, zukham gual in a hawi dong dong un; a lungthuai gam tau in, bangma ti dan a he ta puau hi.

²⁸ Ziaphatchun, a buainau ah kipat in Lalpa a hun ko un, a lungjinnau zosia lak ah kipat in a hukdok ta’n;

²⁹ ama’n thigawpi a thipsak a, tuisuagiat kinawkte chule a daisak tai.

³⁰ A thip tâk ziak un a kipak tau a, a lungtup uh long cholna mun chu a pui tung tai.

³¹ Mihing chate a lainat ziak ah, a thilbawl mak takte ziakin, Lalpa chu pâk tau hen!

³² Mipi kikhopna mun ah ama chawisâng unla, upate kikhopna mun ah ama pâk tau hen!

³³ Ama’n luidungte chu gamkeu a chansak ah, tuinâkte le tâng gawchâk a suaksak in,

³⁴ a gam ah chêngte nunsiatna ziakin, lei phatna mun chu lei al, bangma chîn theilona mun a chansak hi.

³⁵ Gamkeu chu dîl a suaksak in, tâng gawchâk chu tuinâk hing a chansak hi.

³⁶ Zia tak ah chun gilkialte a chênsak ah, chênna ding khawpite a siam un;

³⁷ loute a bawl un, grepte a phu un, ga tam tak a luak khawm ui.

³⁸ A maljawlna ziak ah sukpun in a um un, a ganteu chu a kiam ding a phal puai.

³⁹ Engbawlna, buaina leh lungngainate ziak ah, sawt niam leh tawden ah a um phat ua leh,

⁴⁰ ama’n miliante chung ah musitna a butthâk khum ah, gamthip lampi umlona mun ah a vâkvaisak sek a;

⁴¹ himaleh, genthei liangvaite chu, a haksatnau ah kipat in, gan honte gual in Inkuante a siam piak sek hi.

⁴² Mi diktatte’n zia chu a muu ah, a kipak sek un; migilote vang thipbek in a um tau hi.

⁴³ Kuale a pil taphot in zia thilte chu ngaituau hen la; Lalpa ngilneina chu gunchu tak in, ngaitua chiat tau hen.