SAM 101 - PATHIAN LEKHABU THIANGTHO (BSI)

Lal Chungnung Penpa’n Diktat Ding leh Thudik ah Vaihawm Ding ah Phûtna David Pâkna La

¹ Ginumna leh dikna thu la’n sa’ng ka tin; aw Lalpa, nangma pâk in La sa’ng ka.

² Demna bei lampi chu zil ing ka. Zia chu bangtik leh ka chang diam? Ka In sung ah thinlung thiangtho in um ing ka.

³ Thil mantheilo ka mute buaipi pua’ng ka. Mi chia khialte thilbawl ka hua hen, amau tawh bangma bawl khawm pua’ng kau.

⁴ Mi nunsiate chun ei gamlat intiu in, thil phalo he’pha pua’ng ka.

⁵ A Invêngte a gûk ah minsiat sak gawte chu, hi’mangthai ing ka. Mi kiletsak leh mi huhamte chung in dawthei pua’ng ka.

⁶ Zia gam ah mi ginumte chu, ka doisakna mit in en ing ka tin, ka kiang ah a chênden theina ding un; demna bei ah um taphot chun ka na sêm in au.

⁷ Mi thep mang taphot chu ka In sung a, chêngden pua’n tiu in; zuau gen hât taphot chu ka mit mu ah hi’det in um pua’n au.

⁸ Gam sung ah mi nunsiate hi jingkal si’n in, hi’mangthai ing ka tin; Lalpa khawpi kipat thil phalo bawl zosiate, paitha sik sek ding ka hi.