RUTH 3 - PATHIAN LEKHABU THIANGTHO (BSI)

Ruth Tawh Boaz Phual Ah Kimu’na

¹ A talpinu Naomi’n a kiang in, “Ka chanu, la In chêntheina dingin thilpha hun hawl piak lo ding ka hem?.

² A suak nungakte la vasepkhawmpi, Boaz hi I chanau kinaipi ahi. Ngai in, tu’ni hinle, buphual ah barli bu chil ding ahi.

³ Kisil thiang inla, sathau kinu’ inla, la nîk leh puan hoi pen ah kithuam inla, buphual ah vachia in. Himaleh, a nêk a dawn zaw masia kihiatsak kin.

⁴ A lupna mun chu tepte in; tichun, chia’n la, a keng lam puan hawk inla, a kiang in valum in; ziaphat chuleh, ama’n la bawl ding chu hun hil ta’n a,” a ti’n.

⁵ Ruth in a kiang in, “Lei hil zosia chu bawl ing ka,” a tia.

⁶ Tichun, Ruth chu buphual in a chia suk ah, a talpinu’n a hil gual chun a bawl tai.

⁷ Boaz in a nêk leh a dawn zaw phatin, lungthim tai tak in, buvûm gei ah lum dingin a chia tai. Ruth a gûk ah chia in, Boaz keng lam ah puan hawk in, a kiang in a lum tai.

⁸ Jankim vêl in, Boaz chu a dip a phuzok ah, a kihei leh a kengbul in numei khat a la lum ta mai a.

⁹ Ama chun, “Kua la hem?” a ti’n. Ruth chun, “Keima Ruth, la suaknu ka hi; la suaknu hi ei luppi in, ka chanau kinaipi la hi’ngal a,” ti’n a dawnhu a.

¹⁰ Boaz in, “Ka chanu, Lalpa‘n maljawl ta hen; a tawp tiang ah la ginumna hi a masa sâng in a pha zawi; tangval dang a hausa a hem a zawng a hem khat zui lo ah la um hi.

¹¹ Ka chanu, tu’hin lau kin, ka khuau ah mipi zosia hin nangma numei pha tak la hi ti a het uh la hiziak in, la poimaw zosia hun bawl piak ing ka.

¹² Chuleh, kei hi la chanau kinaipi ka hi ti chu a dik hi; himaleh, kei sâng ah la kinaipi zawk khat a um hi.

¹³ Tu’jan giakden inla, jingkal leh la gamngâk ding pa chun a bawl ding dawl la chung ah a bawl chun, a pha himai intin. Ahi’n, la chung ah a bawl ding dawl a bawl nop lo chun, Lalpa chu a hinzing ziakin, keima’n gamngâkpa bawl ding dawl chu la chung in bawl na’ng ka,” a ti tai.

¹⁴ Tichun, Ruth chu jingkal tiang in Boaz kengbul in a lum ta’n; Boaz in a kiang in, “Buphual ah numei khat a hung hi ti kuama’n he kiu hen,” a ti ziakin, mi mêl kihiat thei masang in Ruth chu a thodok tai.

¹⁵ Boaz in a kiang in, “La puansil hun la’n la, hun daw tiam in,” a tia. Ruth in a hun daw ah, barli bu te’na dim guk a puaksak tai, Ruth inle khua sung lam a zuan tai.

¹⁶ A talpinu kiang a hung tun phatin, “Ka chanu, bang la hung ti na em?” ti’n a la dong a. Ama’nle Boaz in a chung ah a thilbawl zosia a hil a;

¹⁷ a kiang in: “Zia barli bu te’na dim guk hi ei pia’n; la talpinu kiang ah ngawnchang ah la kile’kit lo ding ahi, ei ti hen,” a tia.

¹⁸ Naomi chun a kiang in, “Ka chanu, bang gual in thil a hung pawt em ti la het masia khawngai tadi in; zia pa chun tu’ni sung ah a hi’fel masangsia, kichawl lo ding ahi ngal in,” a tia.