RUTH 1 - PATHIAN LEKHABU THIANGTHO (BSI)

Elimelekte Inkuan Moab Gam Zotna

¹ Vaihawmte hun lai in, Judah gam ah chun kial a tung ah; Judah gam ah Bethlehem khua mi pakhat a ji tawh, a chapa panite tawh Moab gam ah vaum vak dingin a chiauah.

² Zia pa min chu Elimelek ahi’n, a ji min chu Naomi ahi; a chapa teni min chu Mahlon leh Khilon a hiu a; amau chu Judah gam ah Beth-lehem khua Ephrath suante a hiu a. Moab gam in a chiau ah, a hung chêng den tau hi.

³ Ahi’n, Naomi pawsal Elimelek chu a hung thi ta’n; a ji chu a chapa te ni chu tawh a nusia tai.

⁴ A mau chun Moab numeite ji’n a nei gêl un; pakhatnu min chu Orpah ahi’n, khatnu min chu Ruth ahi. Kum sawm ding vêl zia gam ah chu a chên nung un,

⁵ Mahlon tawh Khilion chule a hung thi tau ah; tichun, Naomi chu a chapate ni tawh a pawsal chun a thisan tau.

Naomi tawh A Moab Mote

⁶ Moab gam ah a um sung un, Lalpa‘n a mite nêk ding pia’n, a ve thâk dan a het ziakin, Moab gam ah kipat in a mo te ni chu tawh kile’kit dingin a hung kipan tau a.

⁷ Chutia, Judah gam lam zuan ah a chia lai un.

⁸ Naomi chun a mo te ni kiang ah chun, “La nuteu In lam gêl ah chia kit mai tau in, kei leh mithite chung ah la phatnau dungzui in Lalpa‘n la chung un pha tak in hun bawl ta hen.

⁹ Lalpa‘n la pawsalteu In gêl ah bitna la neitheina ding un vang phatna hun pia hen,” a tia. Tichun, amau chu a chawp ta’n, ngai tak in a kap tau a.

¹⁰ Ziaphatchun, amau inle, “Ahi puai, la chipite kiang lam ah hun zui ing kau,” a tiu a.

¹¹ Ahi’n, Naomi in, “Ka chanute, kile’kit mai un, bang dingin em lei zui ding uh? La pawsal ding uh ka sûl ah hin chapa vop nalai dingin lei gingcha nalai ua a hem?

¹² Ka chanute, kile’kit unla, kei la pawsal nei kit dingin ka têk talaw ta’ngal ah; kinepna nei nalaiin, tu’jan ma ma hin pawsal nei in, chapa hing ziang ding hileng le,

¹³ amau pitin tiang chu ngâk zo ding ah kigingcha la hiu ah a hem? A mau chu ngâk ah pawsal dang neilo ah um thei ding la hiu ah a hem? Ahi puai, ka chanute, nang uh â ding ka gêl leh ka lung ngaina a nazaw bep hi, Lalpa khut thuak ka hi’ngal in,” a tia.

¹⁴ Tichun, ngai tak in a kap kit tau a, Orpah chun a talpinu a chawp ah; Ruth in vang a tuchak tai.

¹⁵ Ziaphatchun, Naom chun Ruth kiang in, “En in, la suapinu a chipite leh a pathiante lam zuan in a chia kit tai; ama gual in nang le chia kit mai ta’n,” a tia.

¹⁶ Ahi’n, Ruth in: Nang nusia dingin ei sawl kin la, nangma zui talo ding ah, chia kit dinginle ei sawl diak kin! La chia chiana chia’ng ka tin, la giak giakna giak ing ka tin, la mite chu ka mite hi’ntin uh, chuleh, la Pathian chu ka Pathian hi hen.

¹⁷ La thi thi na’n thi’ng ka tin, zia chun kivui ing ka. Thi’na lo’ngal in nangma tawh ei khen chun, Lalpa‘n a nop nop ei law mai zaw hen! a ti chak kei tai.

¹⁸ Naomi in ama zui ding ah pangchak ahi tai ti a het phat in bangma a genbe ta puai.

¹⁹ Tichun, Beth-lehem a tun masang siau a paniu in a chia pek tau a. Beth-lehem a hung tun phat un, amaute ni ziak ah chun khua sung pumpi a kichok ziang ta’n; numeite chun, “Zia hi Naomi kha hilo a hem?” a tiu a.

²⁰ A ma’n a kiang un, “Naomi ei ti kiu inla, Marah ei ti zaw ta un; Bangkim Hi’theipa chun nasa tak in ei soisak tâk ziakin.

²¹ Buting tak in ka pawt in, Lalpa‘n khutngawn in ei pui kit ta’n; Lalpa‘n zia gual khop ah ei soisak ah, Bangkim Hitheipa’n ei higenthei lai hin, bangti’n em Naomi lei ti ding uh?” a tia.

²² Tichun, Naomi chu a monu, Moab numei Ruth chu tawh Moab gam ah kipat in a hung kile’kit tau a. Barli bu ât pat hun tawh kituak in, Beth-lehem khua a hung tung tau hi.