ROMTE 7 - PATHIAN LEKHABU THIANGTHO (BSI)

Kichenna Kipat Etsakna

¹ Suapite haw, dan hete kiang ah thugen ka hiziak in mihing chung ah Dan in a dam sung sia thu a nei dan hi la hepuau em?

² Numei pawsal nei chu a dam sung sia a pawsal neina dan ah chun kân in a um tai; himaleh, a pawsal a thi leh vang pawsal neina dan ah kipat chun thâdaw ahi tai.

³ Ahi’n, ama chun a pawsal a dam sung in pawsal dang vanei taleh, ama chu ângkawm hi’ntin; himaleh, pawsal thi ta ahi chun zia dan ah chun kikân talo ahiziak in, midang kichenpi ziang leh le ângkawm ti’thei a hita puai.

⁴ Zia gual ah chun, ka suapite haw, nang uh hi Khrista taksa ah chun Dan thi’san ah um la hitau ah; Pathian â ding ah chi suantu I hung hitheina ding un, thina kipat ah thokit ngei chu kichenpi la hitau ahi.

⁵ Taksa ah I um lai ua khan, Dan ah um zing gitlonate chun ei hun thunun thei sek in; thina ding lam ah chisuantu hi dingin I taksa bâkteu chu ei mat piak sek ahi.

⁶ Himaleh, tu’hin chu Thagau ah hinna thak nuai ah suakte I hi zawk theina ding ua ei tutâng pen ah kipat thi ta in, lekha zik lui gual bep hilo in, Dan ah kipat in thâdaw in I um tau hi.

Dan leh Gitlona

⁷ Bang I gen ta ding awm leh? Dan chu gitlona a hem? Hilo e! Dan ziak ah het hilo leh, gitlona chu a la helo ding ka hi. Dan in, “Êng kin,” tilo leh, ênna chu bang a hem helo ding ka hi.

⁸ Gitlo chun thupiakte hi lemchâng ah mang in, keima hin ênna chitin a hun umsak hi. Dan panglo ah chun gitlona chu a thi a la hingal a.

⁹ Tu’ma lam in Dan lo in ka la hing ah; himaleh, thupiak chu a hung um phat chun gitlona chu chawthaw in a hung um ah, keima chu ka thi ta ahi.

¹⁰ Hinna ding ah thupiak chu, thina ding ahi ti ka la he zaw tai.

¹¹ Gitlo chun zia thupiak chu lemchâng ah mang in ei hun thêm ah, zia chu mang in ei that tai.

¹² Ziaziakchun, Dan chu a thiangtho ah, thupiak chule a thiangtho ah, a dik ah, a pha ahi.

¹³ Ahileh, thilpha chu kei â dingin thina hung hita mai a hem? Hilo e! Gitlona chu kei â dingin thina a hung hizaw ta ahi. Tichun, gilo chu gitlona ahi ti a kilatna dingin, thilpha chu mang in ei that ta ahi; thupiak ziakin gitlo chu gitlona thupi tak a hung hi theina dingin.

Mihing sung lam ah Kituak lona

¹⁴ Dan chu Thagau lam thil ahi ti I hiau ah, himaleh, keima hi taksa mi, gitlona nuai ah khotdawsa ka la hi tai.

¹⁵ Ka thilhi’te hi a ngaina ka hepuai, ka thil hi’ nop lam chu ka hi’ ngai puai; ka huat lam tak chu ka hi’zaw sek hi.

¹⁶ Ka hi’nop lo lam ka hi’sek chun, Dan chu a phai ti ah pompi ka hi.

¹⁷ Ziaziakchun, zia thil hi’saktu chu keima kha ka hita pua’n, himaleh, gitlona keima ah chêng chu a hizaw sek hi.

¹⁸ Keima ah hin (zia chu ka taksa ah hin ka ti’na ahi,) thilpha chu a um puai ti ka hia’i; keima ah hin thilpha hi’ nopna chu a um ah; himaleh a pha chu ka hi’ thei sek puai.

¹⁹ Phatna ding ah bawl ka nopte chu bawl sek lo in, a diklo bawl ka nop lo haw chu ka bawl zaw sek a.

²⁰ Tu’hin ka nop lo lam chu bawl sek ka hi chun, keima hitalo in, gitlona keima ah sêmtu chun a bawl zaw sek ahi.

²¹ Ahi’n, zia Dan hi ka hun he tai, thilpha bawl ka nop lai in phatlona a hung um sek hi.

²² Ka mihing sung lam ah hin Pathian dan zui ka thatnoppi ma ma sek a;

²³ himaleh ka taksa bâkte ah hin dan chuam dang a um hi ti ka hia’i, zia chun ka lungthim ah dan chu a do ah, ka taksa bâkte gitlona dan umte kiang in suak in ei pui sek ahi.

²⁴ Aw, migenthei ka hi na lawm lawm e! Zia thina taksa ah kipat hin kua’n ei hukdok ding ahi tam?

²⁵ Jesu Khrista, I Lalpau jal ah chun Pathian kiang in kipak thu ka gen ahi. Tichun, keima lungthim sung lam ah chun Pathian dan in na ka sêm ah; himaleh, taksa lam ah chun gitlona dan in ka sêm ahi.