ROMTE 6 - PATHIAN LEKHABU THIANGTHO (BSI)

Khrista tawh Thikhawmna leh Thawkitna

¹ Bang I gen ta diam uh le? Hepina chu a pun zawk diak theina dingin, gilo hi in um zing ding I hiu em?

² Hinaisai lo e! Ei uh gitlona thi’san tate hi, bangti’n gitlo ah hing zing thei nalai ding I hiu em?

³ Kuale Jesu Khrista ah baptisma chang tapo chu, a thina baptisma chang I hiu ti la hepuau em?

⁴ Ziaziakchun, a thina baptisma chang in ama tawh vui in I um un; chutichun, Pa lopina chun mithi lak ah kipat Khrista a kaithaw gual ma chun, ei hawle hinna thak ah I hintheina ding un.

⁵ A thina kibatpi ah ama tawh I kizop tâk ua leh, ama thawkitna kibatpi inle thokit ngei hitiu.

⁶ I gitlonau taksa hi suksiat ah a um ah, gitlona suak ah I um tâk lona ding un, I mihing lui uh hi ama tawh khetden in a um tai ti I hiau hi.

⁷ A thi taphot chu gitlona ah kipat suakcha ahi tai.

⁸ Khrista tawh thi I hi tâk uh chun, ama tawh hing ding I hiu ti I taksang uh ahi.

⁹ Khrista chu mithi lak ah kipat in kaithaw in a um ah, thi kit ta pua’n ah ti I he ngal un; thina chun ama chung ah thu a nei ta puai.

¹⁰ A thina chu gitlo ziak ah khatvei thina ahi’n, a hinna chu Pathian lam ah hing ahi.

¹¹ Zia gual ma chun, nang hawle gitlo lam thu ah chun a thisa’n kingai un; chuleh, I Lalpau Jesu Khrista jal ah chun, Pathian lam ah hing in kingai un.

¹² Ziaziakchun, la taksa nopnau thu a umna dingin, la taksau thithei ah chun gitlona’n vaihawm ta ki’hen.

¹³ Chuleh, la taksa bakteu hile gitlo lam ah dik lona matchâk dingin pia phal kiu inla; thina kipat hing kit gual in, Pathian lam ah dikna matchâk dingin pia phal zaw tau in.

¹⁴ Gitlona chun la chung un thu nei talo ding ahi ngal in. Dan vaihawmna nuai ah um la hita puau ah, hepina nuai ah um la hizaw tau hi.

Dikna Suak Hi’na

¹⁵ Bangti’n ahi ta diam? Dan nuai ah um hilo ah, hepina vaihawm ah um I hi’zawk ziak un gilo zing ding I hiu em? Hinaisai lo e!

¹⁶ Kua kiang ah le a thu mang ding ah a suak ah la lut ua leh, thina khop ah gitlona suak a hem, dikna lam ah thu matna suak a hem, a thu la mat pen uh suak chu la hiu ti la hepuau em?

¹⁷ Himaleh, Pathian kiang in kipak thu um ta hen, nang uh gitlo suak ah a la um lai chu, la kiang ua thugin hung kigen chu la la zop tâk ziak un,

¹⁸ gitlo ah kipat in la pawt tau ah, dikna suak la hung hizaw tau ahi hi.

¹⁹ Taksa lam ah la hatlo ziak un mihing dan in thu ka gen ahi; la taksa bakteu thianglo kiang ah leh, a sia ding ah siatna kiang ah la piak phal gual uh khan, tu’hin la taksa bakteu chu thianthona dingin dikna suak dingin pia phal tau in.

²⁰ Gitlo suak ah la um lai ua khan dikna ah kipat in la zalen uh ahi.

²¹ Tu’ la thil jachatpiteu ah kipat chun bang phatchuamna la la muu em leh? Ziate tawpna kha thina ahi vei.

²² Tu’hin vang chu gitlo ah kipat pawt in, Pathian suakte la hung hiu hin, phatchuamna la muu chu sukthianthona ahi; zia tawpna chu kumtuang ah hinna ahi.

²³ Gitlo man chu thina ahi’n, Pathian thilthawnpiak ahileh vang, Jesu Khrista, I Lalpau jal ah kumtuang ah hinna ahi.