ROMTE 3 - PATHIAN LEKHABU THIANGTHO (BSI)

¹ Ahileh, Juda mi hi’na chun bang phatchuam zawkna a nei em? Zektan ah hinle bang phatchuam zawk diakna a um em?

² Bang lam lam inle a phachuam hi, Pathian thute a kiang ua vopsak ah a um ziak ahi pen hi.

³ Khenkhat ginum lo leu bang phachuam ding a hem? Chuleh, a ginlonau chun Pathian ginumna chu bangmalo suaksak ziang ding a hem?

⁴ Hinaisai lo e! Mi zosia zuauthei hi zawu hen la, Pathian chu dik hen; Pathian thu ah: “La thugen in nang thiam a hun chansak ah, vaihawmna la zaw theina dingin,” ti zik gual ah khan.

⁵ Himaleh, eimau dik lona hin Pathian dikna chu a suklat nâk leh, bang gen ding I hitau em? Pathian phuba la sekpa chu a diklo ahi diam? (Mihing dan ah ka gen ahi.)

⁶ Himaijen lo e! Chutileh, bangti’n zia khawvel chung thu hi Pathian in vai a hawm ta diam?

⁷ Ahiloleh, thu diklo ka gen ziak ah Pathian thutakna chu a hung lopi zawkna ding a hi’thei chun, bang ziak ah keile migilo gual ah thiamlo chansak ah um ka hem?

⁸ Bang ding ah mi khenkhat in ei hêk ua ka gen lo ei gensak gual un, “Thilpha a hung tun theina dingin, thil phalo bawl hitiu” I ti zawk lo uh? Zia gual mite chun thiamlo a chan uh chu a dik hi.

Kuama Thiamchang Umlo

⁹ Ahileh, amau sâng in I phazaw diak ua a hem? Hilo e! Judate leh Grikte chu siatna suak ah um chiat a hiu ti tu’masang ah khanle I ngaw tau kha lam.

¹⁰ “Kuama midik a um puau in, pakhat chale a um puau hi.

¹¹ Kuama a hethiam a um puau in, Pathian hawl him himle a um puau hi.

¹² A leng un lampi chuam ah a pêtmang zo tau in, bangma phatchuamna bei in a um sik sek un; thilpha bawl him him a um ta puau in, pakhat chale a um ta puau hi.

¹³ A gawl uh chu thân kihongsa ahi’n, a lei un thepna thu a gen un; a kam sung un gulgu a um hi;

¹⁴ a kam uh chu hânsia lawna leh kamsia ngen in a dim a;

¹⁵ a kengteu chu thisan sua dingin a kinawu a;

¹⁶ a lampiu in manthaina leh dâ-umna a um a;

¹⁷ thamuanna lampi a hepuau hi.

¹⁸ A mit un Pathian kichâkna him him a um puai,” ti zik gual ah khan.

¹⁹ Kam zosia a thip ah, khawvel zosia hi Pathian ma ah gilo a hung hitheina ding un, dan kigente zosia hi dan nuai ah umte kiang ah gen a hisek hi ti, I hiau hi.

²⁰ Ziaziakchun, “Dan thil hi ah kuama ama mit mu in thiamchang ding a um pua’n,” dan ziakin gitlo kihiatna um a hibep ngal a.

Ginna Ziak ah Thiamchanna

²¹ Himaleh, tu’hin vang, Dan leh jawlneite hiatsakna dungzui in, Dan panglo in Pathian dikna chu taklat ahi tai.

²² Zia chu Pathian dikna, Jesu Khrista ginna ziak ah ama taksang tapote kiang ah suklat ah um chu ahi; kuama khenchuamna a um pawngal a;

²³ mi zosia’n thil a hikhial zaw tak ziak un, Pathian lopina a chang zo talo uh ahi;

²⁴ Khrista Jesu tatna jal ah chun, a hepina ziakin a thawn ah thiamchansak I hitau hi;

²⁵ a thisan ziak ah thupha choina hiding leh ginna chang dingin, Pathian in a guat a. Pathian in a dikna latsakna dingin, a dawtheina ziak ah nidang lai gitlonate a kihiat losak ziakin,

²⁶ ama chu a dik in, Jesu ginna nei mi chu thiam a chansak hi, ti a kichetna dingin.

²⁷ Kisuanna chu khoi ah a um tam le? Panna a nei ta puai! Bang dan in a hem leh? Thilhi dan in a hem? Hilo e, ginna dan in a hizawi.

²⁸ Dan dungzui ah thilhi ziak hilo in, ginna ziak zaw’n mi chu thiamchang a hiu ti I pom ui.

²⁹ Aleh, Pathian chu Judate Pathian bep ahi diam? Jentelte Pathian le hilo a hem? ahi, Jentelte Pathian le ahi.

³⁰ Hi e, zektante a ginna ziak ua thiamchansakpa ding leh, zektanlote a ginna ziak mau ah thiamchansakpa Pathian khat bep a hingal leh, Jentelte Pathian le hi ngei in a.

³¹ Ahileh, ginna ziak ah dan chu I paithâk uh a hem? Hilo e, dan chu I sudet zawu ahi.