ROMTE 1 - PATHIAN LEKHABU THIANGTHO (BSI)

Thumapui

¹ Paul, Jesu Khrista suak, sawlchâk hiding ah ko ah um leh, Pathian Chanchinpha gen ding ah se’chuam ah um hin,

² zia chu Pathian Lekha thiangtho ah a jawlneite mang ah a la tiam lawk chu;

³ zia a Chapa Jesu Khrista I Lalpau, taksa lam thu ah David suan ah siam a hung um chu;

⁴ chuleh, thianthona thagau ahi’na dungzui leh, thina ah kipat a thawkitna thilhitheina ah chun, Pathian chapa ahi’na chu taklat in a um ta’n.

⁵ Ama ziakin hepina leh sawlchâk hi’na chu, a min ah namtin lak ah ginna thu awina ziakin I nei chiat tau ahi.

⁶ Ziate lak ah chun nangmaule, Jesu Khrista’n a hun kote chu la hiu.

⁷ Rom khua Pathian doichuam tak, mithiangthote hiding ah ko zosiate kiang a chun: Pathian, I Pau leh Lalpa Jesu Khrista kiang ah kipat hepina leh chamna la kiang un um ta hen.

Kipak thu Genna leh Pauchapna

⁸ Khawvel zosia la ginnau chanchin gen ah a um tâk ziakin, Jesu Khrista jal ah chun ka Pathian kiang in kipak thu ka gen masa ahi.

⁹ A Chapa chanchinpha nasepna ka thagau zosia ka panna Pathian chu ei hiatpitu ahi; tichun, ka pauchapna ah chun hemil lo in la min uh ka sua zing sek a.

¹⁰ Pathian lung lam tawh kituak ah, nangmaule ka hung kanthâk theina ding lemchâng a um theina dingin, bang lam hi ziang leh le, ti’n ka don sek hi.

¹¹ La detna ding un thagau lam ah thilpiak bang a hem ka piak theina dingin mu kâl ka ngâkla ahi.

¹² Zia chu nangmau leh keima ngei ah ginna um ziak ah chun, I kithamuan tua theina ding uh ahi.

¹³ Suapite, Jentel dangte kiang ah ka sep ga ka mu tâk gual ah khan, nanghaw lak ah le ka mu theina dingin, la kiang un tamveipi hung ka gaw tai ti la het lo uh ka dawi puai; ahi’n la, tuchan hin dâl in ka um zing a.

¹⁴ Grik mite leh pauchuam mite lak leh mipil leh mi mawlte kiang inle bat nei ka hi.

¹⁵ Chutichun, keima ah um gual in nang uh Rom khua mite kiang ah le chanchinpha ka theitawp ah gen dingin ka kisa zo zing ahi.

Chanchinpha Thilhithei Chu

¹⁶ Khrista chanchinpha chu ka jachâkpi puai; kuale a ging tapo â ding ah hukhinna dingin Pathian thilhitheina ahi’n; zia chu a lim in Judate â dingin ahi’n, zia ban ah chun Grikte â ding a hung hi kit hi.

¹⁷ Zia chun, Pathian dikna chu ginna ah kipat ginna ma ah taklat in a hung um tai: “Midik chu ginna’n hing in a,” ti zik gual ah khan.

Mihingte Titlona

¹⁸ Pathian ngaisak lona leh minsiatna zosia leh, thutak tawdente chung ah chun van ah kipat in Pathian lungnatna a hung kilang hi.

¹⁹ Mite’n Pathian chanchin a hettheina ding zosia chu, a mit muu ah kichian tak ah taklat in a um in; Pathian ma ma’n a kiang un a taklang tai.

²⁰ Khawvel siamtil ah kipat ama kumtuang thilhitheina leh, a van hin dan, mit ah mu theilo chu, a thilsiamte ah kipat chun hiat thiam leh mu in a hung um tai; kuama’n suanlam a nei theilona ding un.

²¹ Pathian he maleu, Pathian ahi’na gual tak in a chawihoi puau ah, a chung ah kipakna châng le a hepuau hi; ziaziakchun, a lungthim suangtuanau in thil manlote bep a ngaitua tâk ziak un a lungthim ngol tak uh chu a thim zo tai.

²² Pil ah kingai in, mingol ahi zaw tau hi.

²³ Pathian thi theilo lopina chu, mihing thitheite lim gual po ah siam in, vacha lim po, gamsa keng pali nei lim po leh ganhing bokvâk haw lim gual po in a sângtha tau hi.

²⁴ Ziaziakchun, a taksau jachâk um tak ah kisiam tua dingin, a lungthim nopna gual ua polche tak ah um phal in, Pathian in a kiheisan tai.

²⁵ Pathian thutak chu juau ah chansak in, a Siampa chu ho sâng in, a thilsiamte chu ho in a tacha zaw tau ah; amau Siampa chu kumtuang ah pâk tâk ahi! Amen.

²⁶ Ziaziakchun, Pathian in jachâk um tak ah hûk phal in a kihei mangsan tai. A jiteu nasan le a numei hi’nau chu dan lo gual ah mang in a kisiam danglam tau a.

²⁷ Zia gual ma chun, pawsal te’nle numei matdan ngaina haisan in a ki-enlâ tuau a. Pawsalte’n jachâk um tak in a bawl tau hi; tichun a tat gitlonau tawh kigûn gawtna chu a taksau in a muu hi.

²⁸ Chun, Pathian het a nop lo ziak un, thil mêlpha lo tak tak bawl ding ah a doi lo gual lungthim nei phal in, Pathian in a kihei mangsan tai.

²⁹ Tichun, diklona zosia: Tatsualna tinchengte, nunsiatnate, îtsiknate, du-âmnate, huaihapnate, tualthanate, kinialnate, mithep hatnate, kidawha bawlnate, kihoguk hatnate,

³⁰ demhatnate, Pathian huatnate, musitnate, kiletsaknate, uannate, gitlo thil pandokte, nu leh pa thu awilonate;

³¹ ngolnate, ginumlote, lungthim beite leh mihuhamte a hi tau hi;

³² Pathian in zia tawhbang mite chung thu chu a tan piak tak leh, thi tâk ah vaihawm piak ah um ding a hiu ti a hezing tho ui; himaleh, amau thil diklo bawlte bep le tongkhop lo in, zia gual ah bawl sek, midangte chule a kipakpi nalai sêt ui.