PHILIPPI 4 - PATHIAN LEKHABU THIANGTHO (BSI)

Tîlkhona Thu

¹ Ziaziakchun, ka suapi ka doitak leh ngainat, ka kipakna leh ka lallukhukte haw, Lalpa ah chun ding det tau in, ka doitakte haw.

² Lalpa ah chun lungthim kituak tak ah um dingin, Euodi ka ni ah, Sintuki le ka ni ahi.

³ Ahi, ka ngawngkol bâtpi dik tak, nang le zia numeite kha panpi dingin ka ni la hi; amau chun Klemen leh ka seppi dang, hinna bu ah a min uh chuangte tawh, chanchinpha ah chun ei la seppi ngal ua.

⁴ Lalpa ah chun kipak un; ti kit ngen ing ka kipak un.

⁵ La nunnemnau chu mi zosia hiat hi hen. Lalpa chu a nai tai.

⁶ Bangmalo mai mai in lungkham kiu inla, bangkim ah pauchap leh don in, kipak thu gen kawm in, la dotnateu chu Pathian kiang in hiatsak zaw tau in.

⁷ Chutichun, Pathian thamuanna, ngaituana’n a het zaw gual lo chun, la lungthim leh ngaituanateu chu Khrista Jesu ah chun venbit piak in a.

⁸ A tawp pen ah chun, suapite haw, a dik tapo, a za-um tapo, a fel tapo, a thiangtho tapo, a doi um tapo, a kithang mêlpha tapo, thil phazaw him him, pâkchâk ding him a um chun ziate chu ngaituau in.

⁹ Keima ah la thil zilteu leh chanteu leh hiatteu leh muteu chu, bawl zing tau in; tichun, thamuanna Pathian chun hun umpi in a.

Philippite Phatna Chung ah Paul Kipakna

¹⁰ Keima lei khawtuanau la hun thak bawl tak ziak un nasa tak in ka kipak ahi; lei khawtua zing ngei ua, hun lemchâng la mu paw mai ua ahi.

¹¹ Ka tâksapna thu gen vang ka hi puai; ka nei taphot chung ah lungawi tak ah um dan ka thiam tangal a.

¹² Tawmcha bep nei dan ka he ta’n, tam tak nei dan le ka he tai. Thil bangkim ah vâ tak leh kial tak ah um dan, niang tak ah um dan leh tasam tak ah um dan, thugûk chu ka hethiam ta ahi.

¹³ Ei hi’hatpa Khrista jal ah chun bangkim bawlthei ka hi.

¹⁴ Ahi’n, ka haksatnate ah lei thokpiu hi la bawlpha ma mau hi.

¹⁵ Chuleh, nanghaw Philippi mite haw, chanchinpha tun lim lai ah Makedonia gam ah kipat ka hung pawt lai ah khan, nangmau beplo ngal, kochuam pawl kuama’n thilpiak leh lak thu ah bangma ei bawl piak puau hi ti la hiau hi.

¹⁶ Thessalonika khua ka um lai khanle, ka tâksapna awng huk dingin khatvei lei hun thot tau a.

¹⁷ Thilpiak chu hawl ka hipua’n; nangmau ah ga hung piang chu hawl ka hizawi.

¹⁸ Bangkim ka nei ta’n, ka hau ahi; Epaphrodita khut ah thil lei hun thawtteu kha ka la mu’n, ka kiningting tai. Zia chu thillat gimtui, Pathian â ding ah kithoina pom tâk leh kipak um chu a hi.

¹⁹ Chun, ka Pathian chun Khrista Jesu ah a hausakna dungzui in, la tâksap zosiau chu hun pia’n a.

²⁰ I Pathian leh I Pau kiang ah chun lopina kumtuang in um ta hen. Amen.

Mangpha Thâkna leh maljawl Dotpiakna

²¹ Khrista Jesu jal ah mithiangthote kha chibai ka bûk hi. Ka kiang ah suapi umte hin chibai a hun bûk ui.

²² Mithiangtho zosia hin chibai a hun bûk ui, Kaisar Inkuan lak ah mite hin a bîk tak in a hun bûk ui.

²³ Lalpa Jesu Khrista hepina’n la thagau uh umpi zing ta hen. Amen.