PAWTDAWNA THU 9 - PATHIAN LEKHABU THIANGTHO (BSI)

Gawtna Pangana: Ganpûlna

¹ Ziaphatchun, Mosi kiang ah Lalpa’n, “Pharaoh kiang ah chia inla, a kiang in, ‘Lalpa, Hebraite Pathian in: Ei ho theina ding un ka mipite hi chiasak in, a tii,’ ti’n vagen in,” a tia.

² La chiasak nop lo ah, la tûktân nâk lai ahi chun,

³ Lalpa khut chu loulai ah um la gancha sakolte, sabiltungte, sangawngsaute, bawng honte leh belam honte chung ah hin ganpûl huaisia tak tung ding ahi.

⁴ Himaleh, Lalpa chun Israelte gancha leh Aiguptate gancha chu khendan intin, Israelte gancha a thi um pua’n au.

⁵ Lalpa’n hunbî a tiam a, “Jing leh Lalpa’n zia thil chu a gam pumpi’n hun tunsak in a,” ti’n a gen tai.

⁶ A jing ah chun Lalpa’n zia gual chun a hun bawl tai. Aiguptate gancha zosia a thigam zo tau a; Israel chate gancha chu vang pakhatle a thi puai.

⁷ Pharaoh chun a kan zui leh Israelte gancha khat le a thi puai ti a hechian tai. Himaleh, Pharaoh chun a lungthim a sukhak ah; tichun, mipite chu a pawtsak phal diak puai.

Gawtna Pagukna: Meimasia Ah Gawtna

⁸ Ziaphatchun, Mosi tawh Aron kiang in Lalpa chun, “Tummeipi vâm khutdim ham unla, zia chu Pharaoh mit mu in Mosi chun van lam ah thejak tiam hen.

⁹ Zia chu Aigupta gam sung pumpi ah hin vaivut hung suak intin; chuleh, Aigupta gam pumpi mihing leh gancha zosia chung ah thi leh nâi ah luang in meimasia hung suak ding ahi,” a tia.

¹⁰ Tichun, tummeipi vut chu a lau ah, Pharaoh âng in a ding ua, Mosi’n van lam in a vak thejak leh mihing leh ganchate zosia chung ah thi leh nâi ah luang in meimasia a hung suak tai.

¹¹ Zia meimasia ziak ah chun dawithiamte chu Mosi âng ah chun a pang zo ta puau ah; meimasia chu dawithiamte leh Aigupta mite zosia chung ah chun a tung ta ngal a.

¹² Himaleh, Lalpa’n Pharaoh lungthim chu a hikhau ah; tichun, amau thu chu a limsak nuam diak puai, Mosi kiang ah Lalpa’n a gensa gual ah khan.

Gawtna Pasagi’na: Van-gi leh Gialpi

¹³ Chuleh, Mosi kiang in Lalpa’n, “Jingkal leh ma tak in tho inla, Pharaoh kiang ah chia inla, a kiang in, ‘Lalpa, Israelte Pathian in: Ei ho theina ding un ka mipite chu chiasak in.

¹⁴ Tu’chung ah ka hun gawtna ding hi nangma leh la miliante leh la mipite zosia chung ah tunsak ding ka hi; chutichun, keima gual hi lei chung zosia ah hin a dang umlo ahi ti la hettheina dingin.

¹⁵ Tu’hin ka khut hun tha leng, nangma leh la mipite hun sumangthai mai ding ka hi; chuleh, nangmale suksiat dim dem hiding la hi.

¹⁶ Himaleh, ka thilhitheina ka hun musak theina ding leh khawvel zosia ah ka min la puanjak theina dingin ka hun hinghoi nalai la hi.

¹⁷ Tu’tiang ah hin ka mipite chung ah hin la kichawisâng nalai ah, pawt sak nuam nai diak lo la hi;

¹⁸ jing leh tu’hun leh Aigupta gam kisiam lim ah kipat tu’ni tiang ah le a la um kha nai lo, gial gik tak leh huaisia pen hun kiaksak ding ka hi,’ a tia.

¹⁹ Tu’hin mi sawl inla, la ganchate leh lou ah um, la nei zosia va hawlkhawm sak in; mihing hileh, gancha hileh In sung ah umlo, loulai ah um zosia chung ah zia gual hi ke ding a hia, thigam ding a hiu,” a tia.

²⁰ Pharaoh miliante lak ah Lalpa thugen lau taphot in a suakteu leh a ganchateu In lam in a hawl lut sik sek un;

²¹ Lalpa thugen limsaklote chun a suakteu leh a ganchateu chu loulai ah chun a um densak tau a.

²² Lalpa chun, Mosi kiang in, “Aigupta gam pumpi’ mihing chung hileh ganchate chung leh anchelohing tincheng chung ah, Aigupta gam pumpi ah gial a kiak theina dingin la khut van lam in jakdok in,” a tia.

²³ Tichun, Mosi’n a tiangkhut chu van lam in a jak to ah; Lalpa’n van-gi leh gialpi leh meikuang, leitual ah chun a hun sawl tha suk ta’n. Chuleh, Lalpa chun Aigupta gam ah chun gialpi gawzuk in a hun zuksak tai.

²⁴ Gial leh mei kihel a hung ke ta’n, a huaisia ma ma ah, Aigupta gam nam khat a hung hiu ah kipat a gam pumpi huap ah zia gual tuk ah huaisia hi a la tung kha nai puai.

²⁵ Gial chun Aigupta gam pumpi loulai ah um mihing hileh gancha hileh a seplum sik sek ta’n; chuleh, gial chun lou ah anche lohing zosia a sumang sik sek ta’n, lou ah thing zosia chule a seplum sik sek tai.

²⁶ Israel chate chênna, Goshen gam bep in gial chu a ke puai.

²⁷ Ziaphatchun, Pharaoh in Mosi tawh Aron a ko ah a kiang un, “Tu’chung ah hin thil ka bawl khial tai; Lalpa chu a dik ah, keima leh ka mipite hi ka dik puau hi.

²⁸ Van-gi leh gialpi thupi takte hi a tawp theina dingin Lalpa kiang ah don in. Hun chiasak ta’ng ka tin, hun khâm ta pua’ng ka,” a tia.

²⁹ Mosi’n a kiang in, “Khawpi paw lam ka pawt daw phat leh Lalpa kiang in ka khutte jak ing ka tin; tichun, van-gi chawl intin, gialpi le ke diak ta pua’n a; tichun, lei chung pumpi hi Lalpa â ahi ti la hettheina dingin.

³⁰ Himaleh, nangma leh la miliante hin vang Lalpa chu lau tak tak lo la hiu ti ka hechian hi,” a tia.

³¹ (Tichun pat leh barli bute chu gial in a sepse zo ta’n; barli bute chu a vui pan pan leh pat haw chu a ga pan pan ahi ngal a.

³² Ahi’n, gehu bu leh buman chu a se puai, amau chu a min vaigei deu ziak un.)

³³ Tichun, Mosi’n Pharaoh a nusia in, khawpi pawlam in a pawtdok ah, a khutte chu Lalpa lam in a jakdok a; ziaphatchun, van-gi leh gialpi chu a chawl ta’n: gua chule lei chung ah chun a zu ta puai.

³⁴ Himaleh, Pharaoh in gialte, guate leh van-gite chu a chawl tai ti a mu phâtin, a gilo zaw diak a; chuleh, ama tawh a miliante chun a lungthim uh a sutâk zaw diak tau hi.

³⁵ Chutichun, Lalpa’n Mosi kiang ah a la gen taksa gual ah khan Pharaoh lungchang chu suktâk in a um ta’n, Israel chate chu a pawtsak nuam diak ta puai.