PAWTDAWNA THU 7 - PATHIAN LEKHABU THIANGTHO (BSI)

Pharaoh Kiang ah Mosi Tawh Aron A Chianau

¹ Lalpa chun Mosi kiang in, “En in, Pharaoh â ding ah Pathian gual in ka hun siam ah, la u Aron chu la thugenpa hi dingin ka siam hi.

² Nang in la kiang ah ka thupiak zosia hi gen in la tin, la u Aron in Pharaoh chu a gam ah kipat Israel chate thâdok dingin thu a hil ding ahi.

³ Himaleh, Pharaoh lungthim hikhau ing ka tin; tichun, Aigupta gam ah chun ka teptênate leh thilmakte hi’pung ing ka.

⁴ Pharaoh in la thugen a ngai diak lo ding ziakin, Aigupta chung in ka khut tha’ng ka tin, gawtna huaisia takte mang in ka mipi Israelte chu a hon hon in Aigupta gam ah kipat in puidok ding ka hi.

⁵ Aigupta gam chung ah ka khut ka hun thâk ah, Israel mipite chu a lak ua kipat ka puidaw phat leh, Aigupta mite chun Lalpa ka hi ti hun he ta’n au,” a tia.

⁶ Mosi tawh Aron in zia gual chun a bawl tau a; Lalpa’n thu a piak gual tak in a bawl tau hi.

⁷ Pharaoh kiang ah thu a vagen lai ua chun, Mosi chu kum sawmgiat ah upa a hita, a u Aron chule kum sawmgiat leh thum ah upa ahi tai.

Aron Tiangkhut ah Thilmak Chu

⁸ Mosi tawh Aron kiang in Lalpa chun;

⁹ “Pharaoh in, ‘Thilmak bawl un,’ ti a hun phût phat leh Aron kiang in, ‘La tiangkhut la’n la, Pharaoh âng ah hin septha lechin gul hung suak in ah,’ ti’n a gen a.”

¹⁰ Tichun, Mosi tawh Aron chu Pharaoh kiang in a chiau ah, Lalpa gen gual ah chun a bawl tau ah; Aron in a tiangkhut chu Pharaoh leh a miliante âng ah paithâk leh gûl a hung suak ta’n.

¹¹ Ziaphatchun, Pharaoh in a mipilte leh dawithiamte a ko khawm ah; chuleh, Aigupta gam ah mitvaidawi thiamte chun le a dawithiamnateu chu mang in zia gual ma chun a hun bawl tau a.

¹² Amau tiangkhut chule a septhau ah, tichun gûl a hung suak chiat ah; himaleh, Aron tiangkhut chun amau â chu a valzo ta mai a.

¹³ Lalpa’n a la gensa gual khan, Pharaoh lungthim chu hikhau ah a um nâk lai ziakin amau chu a limsak nai diak puai.

Gawtna Masa pen: Tui Thisan Suak Sakna

¹⁴ Ziaphatchun, Mosi kiang in Lalpa chun: “Pharaoh lungthim hikhau in a um ta hen, mipite chu a pawtsak nuam ta puai;

¹⁵ jingkal ah lui lam zuan ah Pharaoh chia phat leh a kiang in vachia in; lui pâm ah chun a la ngak inla, la khut ah gul hung suak la tiangkhut kha chawi inla.

¹⁶ A kiang in: Lalpa, Hebraite Pathian in ei sawl hen, ‘Ka mipite pawtsak in, gamthip ah ei biak theina ding un,’ ti la kiang ah hung gen dingin ei sawl a. Himaleh, nang in tu’tiang ah hinle a thu la ngai nai puai.

¹⁷ Zia gual hin Lalpa’n a gen hi: Zia hin Lalpa ka hi ti hia’n lau; ka khut ah tiangkhut hin Nail luipi tui chu jep leng thisan suak mai ding ahi.

¹⁸ Lui ah sangate thi’n tin, lui chu hung namsia’n tin; chuleh, Aigupta mite chun Nail luipi ah tui chu dawn dingin ki’dak ta’n au, a tii,” a tia.

¹⁹ Lalpa chun, Mosi kiang in, “Aron kiang in, la tiang kha la’n la, Aigupta gam sung ah tuite, luite, tuilamte, tuikhukte leh dil zosia chung ah la khut jakdok in; tui zosia chu thisan a hung suak theina dingin: Tichun, Aigupta gam zosia ah chun thing kuangkûmte leh suang bêlte zosia sung ah thisan um ding ahi ngal in, ti’n gen in,” a tia.

²⁰ Mosi tawh Aron in Lalpa thupiak gual chun a bawl tau a. Pharaoh tawh a miliante mit mu in a tiang chu a lâm ah, lui ah tuite chu a jep ah; tichun, tui chu thisan a hung suak tai.

²¹ Lui ah sangate chu a thi tau a. Lui chu a hung namsia’n, Aigupta mite chun tui chu a dawn thei ta puau hi. Aigupta gam pumpi chun thisan a um suak kêi tai.

²² Himaleh, Aigupta mi dawithiamte chun le a dawi uh mang in zia gual ma chun a bawl ua; ziaziakchun, Pharaoh lungthim chu sukkhau in a um zing ah; tichun, amau chu a limsak nuam diak puai; Lalpa’n a la gensa gual ah khan.

²³ Pharaoh chu a kihei ah, a In sung in a lut ah, zia thilte chu khawksak inle a nei puai.

²⁴ Luipi tui chu dawnthei ahi tâk lo ziakin Aigupta mite zosia chun Nail luipi pâm a chun dawn ding tui a chodok tau a.

²⁵ Lalpa’n Nail luipi tui a vok zaw ah kipat in ni sagi a hung hi tai.