PAWTDAWNA THU 40 - PATHIAN LEKHABU THIANGTHO (BSI)

Biakbûk Sakzawna leh Thiansuana

¹ Mosi kiang Lalpa chun:

² “Tha masa pen, a ni masa pen ah chun kikhopna biakbûk chu la tundaw ding ahi.

³ Thuthunna Thingkuang chu In sung ah koi lut in la tin, thingkuang khû ding puanjak chule la jak ding ahi.

⁴ Dawkân chu a sung ah a umna ding dik tak ah chun koi in la tin; thaumei tunna chule a sung in la lut in la tin, a thaumeite chu la det ding ahi.

⁵ Gimtui hâlna ding sana mâichâm chu thuthung thingkuang ma-âng jawn tak ah chun koi inla; chuleh, biakbûk kot ah puanjak ding chule la jak ding ahi.

⁶ Hâlmang kithoina mâichâm chu kikhopna biakbûk puan In kotkhak ma-âng ah chun koi inla,

⁷ tuikuang chu kikhopna biakbûk tawh mâichâm kikâl ah chun koi inla, tui sung in.

⁸ A huang ûmna dâi a kîmvêl in bawl inla, a kotpi lûtna’ a puanjak ding chu khâidok in.

⁹ Ziaphat chuleh, sathau la’n la, biakbûk tawh a sung ah um zosia chu sathaunu’ in; biakbûk tawh a matchâk zosia chu hithiangtho in: tichun, a thiangtho hung hita’n a.

¹⁰ Hâlmang kithoina mâichâm chule matchâk zosiate chu tawh sathau nu’ inla, mâichâm chu a thiangtho pen a hung hitheina dingin la hi’thiantho ding ahi.

¹¹ Tuikuang chule a kengte chu tawh sathaunu’ inla, la hi’thiantho ding ahi.

¹² Ziazaw chuleh, Aron tawh a chapate chu kikhopna biakbûk kotbul ah chun hun pui inla, amau chu tui in la sil ding ahi;

¹³ Aron chu a kithuamna ding thiangtho in thuam inla, sathaunu’ inla, la hithiantho ding ahi; kei â ding ah thiampu na ei sep piak theina dingin.

¹⁴ A chapate chule hun pui in la tin, a puanâk chualteu ah chun la thuam ding ahi;

¹⁵ a pau Aron sathau la nu’ gual ah khan amau chule la nu’ ding ahi; amau inle ka thiampu na ei sep piak theina ding un: Amau sathau nu’ ahi’nau chu a suan zosiau kumtuang thiampu hi’na ding ah sathau nu’na ahiziak in,” ti in.

¹⁶ Lalpa’n a kiang ah thu a piak dungzui in Mosi’n a bawl tai.

¹⁷ A kum ni’na, tha masa pen, zia tha a nimasa pen ni’ chun biakbûk chu tundaw in a hung um tai.

¹⁸ Mosi’n biakbûk chu a hun tungdok ta’n: A khuam kituana dingte chu a phut ah, zia chun a khuamte a bul ah, a jawlte a thun ah, a khuamte chu a tungding tai;

¹⁹ Mosi kiang ah Lalpa’n thu a piak dungzui in, puanbûk chu biakbûk chung ah chun a jak ah, a puanbûk khû’na chu a chung in a koi tai.

²⁰ Thuthung zikna suangte chu a la’n, thuthung thingkuang sung ah chun a koi ah, thuthung thingkuang jawnna ding molte chule a thun ah; ja’ngaina chutpha le a chung in a koi a;

²¹ Mosi kiang ah Lalpa’n thu a piak dungzui in, thuthung thingkuang chu biakbûk sung ah chun a paw lut ah; a lia dingin puan a jak ah, thuthung koina thingkuang chu a khû hi.

²² Dawkân chu kikhopna biakbûk sung ah, biakbûk mallam kâi ah, puanjak pawlam ah chun a koilut a;

²³ Mosi kiang ah Lalpa’n thu a piak gual tak in, Lalpa âng ah dawkân chung ah chun vaithumte chu a um ding gual tak in a koi a.

²⁴ Thaumei tunna chu kikhopna biakbûk sung ah, biakbûk simlam kâi ah, dawkân mai jawn tak ah chun a koi a,

²⁵ Mosi kiang ah Lalpa’n thu a piak gual in, Lalpa âng ah chun thaumeite chu a deta’n.

²⁶ Sana mâichâm chu kikhopna biakbûk sung ah puanjak pawlam ah chun a koi a,

²⁷ Mosi kiang ah Lalpa’n thu a piak gual in, a chung ah chun gimtui a hâl tai.

²⁸ Biakbûk kotkhak ah jak ding puanjak chule a jak ta’n.

²⁹ Mosi kiang ah Lalpa’n thu a piak gual in, hâlmang thillatna mâichâm chu kikhopna biakbûk kotbul ah chun a koi ah, a chung in hâlmang thillat leh thâiga thillatte chu a hâl tai.

³⁰ Tuikuang chule kikhopna biakbûk tawh mâichâm kikâl ah chun a koi ah, kisilna dingin tui a koi a,

³¹ zia tak ah tui chun Mosi tawh, Aron tawh a chapate’n a khut leh kengteu chu a sil un.

³² Mosi kiang ah Lalpa’n thu a piak dungzui in, kikhopna biakbûk sung ah a lut ua, mâichâm a nai phat si’n ua leh a kisil sek ui.

³³ Biakbûk leh mâichâm kîmvêl ah chun a huang ding a bawl ah; a huang ah lutna ding kot ah chun puan a jak ah. Tichun, Mosi’n bawl ding zosia chu a bawl zo suak tai.

Biakbûk Chung ah Lalpa Lopina Sûmpi

³⁴ Ziazaw chun, kikhopna biakbûk chu sûmpi’n a hun khû ta’n; tichun, Lalpa lopina chun biakbûk chu a hun lua dim tai.

³⁵ Sûmpi’n a chup zing ziak leh, Lalpa lopina’n biakbûk chu a lua dim zing ziakin, Mosi chu kikhopna In sung in a lût thei ta puai.

³⁶ Biakbûk chung jawn ah sûmpi chu lâk to ah a hung um phat leh Israelte’n a khualzinnau ma lam zuan in a kipandok kit sek ui;

³⁷ ahi’n la, sûmpi chu lak to ah a um masangsia chu kichawn lo in a um den mai sek ui.

³⁸ Biakbûk chung ah Lalpa, sûn ah sûmpi leh jan ah meikuang ah um zing chu Israel chate zosia’n a khualzin sungsiau a mu zing ui.