PAWTDAWNA THU 4 - PATHIAN LEKHABU THIANGTHO (BSI)

Mosi Kilepna leh A Thilmak Bawlte

¹ Ziaphatchun, Mosi’n a dawnhu ah, “Ahi’nla, amau chun ei taksang lo in, ka thugen ngaisak lo in, ‘Lalpa la kiang in a kilâk puai,’ ei la tita leu la?” a tia.

² Lalpa’n a kiang in, “La khut ah um kha bang a hem?” ti’n a dong a. Ama’nle, “Mol ahi,” ti’n a dawnhu a.

³ Ziaphatchun, ama’n, “Tual ah septha’n,” a tia. Chutia, a mol tual ah a se’thak phat ah chun gûl a hung suak ziang ta mai ah; Mosi chule a kinungchawn ziang tai.

⁴ Tichun, Mosi kiang ah Lalpa chun, “La khut in a mei ah man in,” a tia; tichun, a khut in a man ta’n: a mol ma ma kha a suak kit ta mai a.

⁵ “Tichun, Lalpa, a pu a pateu Pathian, Abraham Pathian, Isak Pathian leh Jakob Pathian kha la kiang ah kilâk ngei ahi ti a taksan theina ding un,” a tia.

⁶ Lalpa’n a gen nalai ah: “La khut chu la puanâk chual sung in vak thun lut tiam in,” a tia. A khut pêk chu a puanâk chual sung in a vak thun lut ah; a vak lakdaw kit phat ah chun vûk gual a vâm in a khut chu phâk in a tuam suak ta mai a.

⁷ Ziaphatchun, Pathian in, “La khut chu la puanâk chual sung in vak thun lut kit tiam in,” a tia; tichun, a khut chu a puanâk chual sung ah chun a vak thun lut kit ta’n. Chuleh, a vak lakdaw kit phat ah chun a tidangte gual in a thiang kit tai.

⁸ “Tepte’na masa zawk chu taksang lo ah, a ngaisak lo ua leh, tepte’na nunung zawk bêk chu taksang mai thei a hiu.

⁹ Zia tepte’na teni natiang hile a taksan lo ua, la thugen a ngaisak diak lo ua leh, Nail luipi ah kipat in tui thâl dok inla, lei hul ah sungtha lechin thisan suak mai ding ahi,” a tia.

¹⁰ Himaleh, Mosi chun Lalpa kiang in, “Aw ka Lalpa, la suak kiang ah bangma la gen masang inle dan gual lo leh la gen nung ah hinle, kei chu thu genthei lo leh dangawk ka hi,” a tia.

¹¹ Ziaphatchun, Lalpa’n a kiang in, “Mihing pau theina hi kua piak a hem? Kua’n ama chu pautheilo leh bengngong ah, mitvak leh mitthûm ah a siam a hem? Kei Lalpa hi ka hi pua a hem?

¹² Tuhin, chia ta’nle! La kam chu keima’n hun umpi na’ng ka: chuleh, la gen ding hun hil ing ka,” a tia.

¹³ Himaleh, ama chun, “Aw Ka Lalpa, lungsiat in mi dang sawl zaw mai in,” a tia.

¹⁴ Zia thu a gen phat ah chun, Mosi chung in Lalpa a hung lungna ta’n, a kiang in, “La suapipa Aron, Levi mi a um na hilo a hem? Ama’n thu pha tak in a gen thei hi ti ka hia’i; tu’ma ma hin nangma hun dawn dingin a hung hi. Chuleh, ngai in, nangma a hun kituakpi phat leh a lungthim kipak ma ma in a.

¹⁵ Ama kiang ah thu gen in la tin, la kam leh ama kam chu umpi ing ka tin; chuleh, la bawl ding hun hil ding ka hi.

¹⁶ Ama chun nangma thasâng in mipite kiang ah thu gen intin; ama chu nang â dingin la kam sik in pang intin; chuleh, nang chu ama â dingin Pathian sik hi’n la.

¹⁷ Chuleh, la khut in zia mol hi chawi in la tin, zia mol hi mang in teptênate bawl ding la hi,” ti’n a gen tai.

Aigupta gam lam ah Mosi Kile’kitna

¹⁸ Mosi chu a talpupa Jethro kiang a hung tun kit phat ah chun a kiang in, “Lungsiat tak in Aigupta gam lam ah ka chipite kiang ah ei chiasak kit inla, amau chu a dam dam le ahi nau em ti vakan tha’ng ka,” ti’n a don a. Jethro chun, “Thamuang tak in vachia ta’n,” a tia.

¹⁹ Chuleh, Midian gam ah chun Lalpa chun Mosi kiang in, “Aigupta gam ah chia kit ta’n, nangma thâ ding ah hun hawl zosiate khale a thi zo tau hi,” a tia.

²⁰ Tichun, Mosi chun a ji tawh a chapate ni a pui ah, a sabiltung pakhat chung in a chuansak ah, Aigupta gam lam ah chun a chia tau a; chuleh, Mosi’n a khut in Pathian mol chu a chawi hi.

²¹ Lalpa chun Mosi kiang in, “Aigupta gam lam ah la chia kit phat leh thilmak la bawlthei ding ah ka hun piak zosia kha Pharaoh ma-âng in la bawl suak na em ti enpha’n la; ahi’n, a lungthim hi’tâk ding ka hi; tichun, mipite chu pawtsak nuam pua’n a.

²² Ziaphat chuleh, Pharaoh kiang in, Lalpa chun: ‘Israel hi ka chapa upa pen chu ahi:

²³ Ka hun ni la hi, ka chapa hun thâdok in ei biak theina ding un. La hun thâdaw nop lo leh, ngaitia la chapa, la chapa upa pen chiat uh hun that ding ka hi,’ a tii, la ti ding ahi,” a tia.

²⁴ Lamkâl ah khualbûk ah a giaknau mun khat ah Lalpa’n a kituakpi ah, thâ a gaw ta mai a.

²⁵ Himaleh, a ji Zipporah chun suanggial sik hiam khat a la’ zia chun a chapa zek chu a tan piak ah, zia thisan chu Mosi kengzung anu piak ah, a kiang in, “Nang hi chu kei â dingin thisan sua, ka pawsal la hi takzet na hilam,” a tia.

²⁶ Ziaphatchun, ama ngen in a nusia tau ah; a ji chun a kiang in, “Zektan ziak ah thisan sua ka pawsal chu la hi,” a tia. Tichun, Lalpa chun Mosi hinna a hawi tai.

²⁷ Aron kiang in Lalpa chun, “Mosi dawn dingin gamthip ah vachia in,” ti’n a sawl a. Tichun, ama le a chia ngal ah; chuleh, Pathian tâng ah chun a vatuak ah, a chawp tai.

²⁸ Lalpa’n a kiang ah thu a gen zosia leh tepte’na a bawl ding ah thu a piak zosiate chu Mosi chun Aron kiang in a hil tai.

²⁹ Ziaphatchun, Mosi tawh Aron chu a chiau ah, Israel mipite lak ah upa zosiate chu a ko khawm tau a.

³⁰ Lalpa chun Mosi kiang ah thu a gen zosia chu Aron in a gensawn ah; chuleh, tepte’na thilmak le mipite mit mu ah chun a bawl ta.

³¹ Mipite chun a taksang ngal tau ah: Lalpa chun Israel mipite a kantha tai ti leh, a gentheinateu le a mu tai ti a het phat un, a bokkhup ua, Pathian chibai a bûk tau hi.