PAWTDAWNA THU 36 - PATHIAN LEKHABU THIANGTHO (BSI)

¹ Bezalel leh, Oholiab tawh mi khutthiam taphot, Lalpa’n thu a piak dungzui ah mun thiangtho ah na zosia sêm thei ding ah pilna leh hetthiamna a piak cheng bep chun a sak ding uh ahi, a tia.

² Bezalel tawh Oholiab tawh mi khutthiamte, Lalpa’n a lunggil ua pilna a piak ah, zia na chu sêm ding ah lunggil tak ah phûlna nei taphot chu Mosi’n a ko a:

³ Israelte chun mun thiangtho ah nasepna matchâk ding ah a hun piak khawm zosiau chu Mosi khut ah kipat in a la jel ua. Jingkal si’n leh zia gual ah kiphalna dungzui ah thilpiakte chule a pekhawm zel tau a;

⁴ mi khutthiam zosiate, munthiangtho â ding ah na chuam chuam sêmte chunle a thilbawl laiteu nusia in a hung ua,

⁵ Mosi kiang in, “Lalpa’n sep ding ah thu ei piak dungzui ah matchâk ding mipite hun piak khawm hi a tam talua tai,” a hung tiu a.

⁶ Tichun, Mosi’n thu a la pia’n, “Mun thiangtho â ding ah thilpiak ding chu a numei, a pawsal kidang lo ah kuama’n hun ngaitua ta kiu in,” ti’n zia mun ah chun tâng a sapsak tau a. Chutichun, mipite chu bangma hun chawi khawm talo dingin a khap tau hi;

⁷ a thil piak khawmteu chu thilsiamna matchâk dingin a tam talua hial ziang ta’ngal a.

Biakbûk Sakna

⁸ Nasemte lak ah khutthiamte haw zosia chun biakbûk puanjak ding sawmkhat a siam un; zia puanjakte chu puan malngat kigatte, a dumte, a sandup leh a sandângte kimang in, mi khutthiam tak in Cherub limte chu chuang ah bawl ahi.

⁹ Puanjak sau dan chu tong sawmni leh giat chiat ahi’n; a vailam chu tong li chiat ahi’n; puanjak zosia chu a kibang chiat ahi.

¹⁰ Puanjak pangate chu pakhat hi dingin a zop khawm ah, a dang pangate chule pakhat hiding in a zop khawm kit a.

¹¹ Puanjak kizop khawm masa zaw chung lam gei gêl ah chun pat dum hual a gen la siam ding ahi; zia gual ma chun puanjak kizop khawm nunung zaw, chung lam gei gêl ah chunle la bawl ding ahi;

¹² Tichun, puanjak pakhat ah chun a gen sawmnga gêl a siam ah; chuleh, a thua ni’na puanjak gei chiat ah chunle a gen sawmnga ma a siam ah; a gente chun puanjakte chu a kaimat a.

¹³ Chuleh, a puanjak kaidenna dingin sana kuaikâ sawmnga le a siam ah; ziate chun puanjak chu a kaimat a; tichun, biakbûk chu pakhat in a hung um thei tai.

¹⁴ Chun, biakbûk chung khû dingin kêlmul in puanjak le a siam ah; zia gual chun puanjak sawm leh khat a siam hi.

¹⁵ Puanjak pakhat dung lam chu tong sawmthum a hia, a vailam chu tong li chiat ahi; puanjak sawm leh khatte chu a dung leh vai kibang chiat a hiu.

¹⁶ Puanjak pangate chu a zoptua a, a dang pagukte chule a zoptua kit a.

¹⁷ Puanjak kizoptua masa zaw gei ah chun a gen ding sawmnga a siam ah; a kizoptua dang khat â ding chunle a geijul ah chun a gen sawmnga ma a siam hi.

¹⁸ Puanjak zosia chu pumkhat a hung suak theina ding ah kaimat tuana dingin, sum-eng kuaikâ sawmnga a siam a.

¹⁹ Puanbûk khûna dingin belam chal vun kidianip leh a pawnung ding ah savun pha pente le a bawl hi.

²⁰ Chuleh, biakbûk khuam kilem khawm ding ah chun thinggi thing ngen a siam a.

²¹ Khuam kilem khawm pakhat chu tong sawm ah sau leh a vailam tong khat leh a kim ah kisiam ngen ahi.

²² Khuam kilem khawm ah chun a dangte tawh a kikuai mat theina dingin a dawnzum pani chiat a bawl ah; biakbûk khuam kilem khawm zosia ah chun zia gual chiat ah chun a bawl tai.

²³ Biakbûk â ding ah chun khuam kilem khawm zia gual ah hin a bawl ta’n; a simlam kâi â dingin khuam kilem khawm sawmni;

²⁴ khuam kilem khawm sawmnite tunna ding ah chun dangka thik kikhuak sawmni a nuai zawn chiat un a bawl ah; khuam kilem khawm pakhat ah dawnzum panite kibulna dingin a kuak pani a siam ah, zia gual ma chun khuam kilem khawm a pani’na leh a dang dangte â ding chule a bawl a.

²⁵ Biakbûk mallam kâi â dingin khuam kilem khawm sawmni ma a siam a;

²⁶ chuleh, khuam kilem khawmte tunna ding ah kisiam dangka thik kikhuak sawmni le a bawl ah; khuam kilem khawm masa pen â dingin a kuak pani leh a ban ah te â dingle kuak pani chiat bawl ahi.

²⁷ Biakbûk tomlam, tumlam pang â ding ah chun khuam kilem khawm paguk a siam a.

²⁸ Biakbûk mai lam zawn ah, a ning gêl ah pang dingin khuam kilem khawm pani le a siam hi.

²⁹ Chuleh, a nuai lam kimat lo leh a chung lam, a gen umna kipat kimat ah siam ahi: zia gual ah chun a kilte ni ah pang ding khuam kilem khawm pani chu a bawl hi.

³⁰ Zia gual ah khuam kilem khawm chu pagiat, a kibulna ding chiat ua thik kikhuak sawm leh guk tawh a um ah; khuam kilem khawm pakhat kingakna ding ah chun a kikhuak pani chiat a um hi.

³¹ Biakbûk sîk langkhat ah a gupi jawl dingin thinggi thing panga a siam a;

³² biakbûk sîk langkhat â dingin thingjawl panga leh, tumlam kâi â dingin jawl panga ma a siam hi.

³³ A laijawl pen chun khuam kilem khawmte a lailung tak ah thillet dingin a siam a.

³⁴ Khuam kilem khawmte chu sana tui a luan khum ah; thingjawl thunna dingin sana bilte a siam ah, zia gual ah kithun thingjawlte chule sana tui a luan khum a.

³⁵ A puanjak dingte chu puan nem, malngat, thuksa, a dum, a sandup leh a sandâte in Cherubte lim khutthiam tak in a bawlte chu siam ahi.

³⁶ Puan jakna ding ah chun thinggi thingjawl pali a siam ah, ziate chu sana tui a luan khum ah; a kuaikâte chule sana thiang ah kibawl ahi; ziate kituana ding ah chun dangka thik kikhuak pali le a siam hi.

³⁷ Biakbûk kotkhak ah jak dingin puan malngat, thuksa kigat, a dum, a sandup leh a sandâng, puan jem khui thiam tak in a khui,

³⁸ a jakna ding mol leh a kuaikâte le a bawl a. Chuleh, a chung lam leh a nuai lam haw chu sana tui a luan khum a; himaleh, a kitunna ding ah kisiam pangate chu sum-eng ngen ahi.