PAWTDAWNA THU 34 - PATHIAN LEKHABU THIANGTHO (BSI)

Mosi’n Suangpêk Thak A Siamna

¹ Lalpa chun Mosi kiang in, “Suangpêk pani, a masate gual ah khan kisiam inla, zia suangpêkte chung ah chun suangpêk masa, la se’kêkte chung ah kizik thute kha hun sun ing ka.

² Jing jingkal ah kisazo sa’n um inla, jingkal leh Sinai tâng ah hung to inla; tângsip ah chun nangma ngei la hung kilat ding ahi.

³ Kuama’n a hun zui lo diu ahi, tâng kîmvêl ah chunle kuama muphâk ah a umlo diu a hia; tângpang ah chunle belam hon a hem, bawng hon a hem la tatsak lo ding uh ahi,” a tia.

⁴ Tichun, Mosi’n a masate gual gual ah khan suangpêk pani chu a bawl ta’n; jingkal matak ah tho in, Lalpa’n thu a piak gual in a khut ah suangpêk pani chu chawi in, Sinai tâng ah chun a kal to tai.

⁵ Lalpa chu sûmpi’n a hung suk ah, a kiang in a hung ding ah; tichun, “Jehovah kiti” min chu a puangjak tai.

⁶ Chun, Lalpa’n a hun makhel ah: “Lalpa chu! Lalpa chu! Pathian, lainatna dim, mi khawtua thei tak, lung nêm tak chu; Ngilneina leh ginumna dim chu:

⁷ Sâng tam tak tiang ah khawtuana nei, khawlona, sukkhialna leh gitlona ngaidam ah; thiamlo changte ngaidam ziang lo ah, pate nunsiatna ziak ah, chate leh a tusawnte, suan thumna leh suan li’na tiang ah, phuba la sek,” ti’n a puang tai.

⁸ Mosi’n kin tak ah leitual sî bokkhup in chibai a bûk ta’n.

⁹ Chuleh a kiang in, “Tu’hin la mittung ka hi chun aw Lalpa, ka ni la hi: Ka Lalpa ka lak un lungsiat tak in ei kitonpi in aw; mi lu’lul tak himaleng uh le, ka gitlo nau leh bawl khialnateu ei ngaidam inla, la gochan dingin ei la’n,” a tia,

Thuthung Namdet Kitna

¹⁰ Ama’n a kiang in, “Ngai in, thuthung ka siam hi. Khawvel pumpi leh kua nam lak ah le kibawl kha ngai lo, la mite zosia mit mu ah hin thilmak kidang hun bawl ding ka hi; tichun, la kiang la kîm ah um zosiate hin Lalpa thilbawl chu mu’n tin uh, nang â ding ah ka thilbawl guat hi huaisia tak ahi ngal in,” a tia.

¹¹ Tu’ni ka thupiak hi vop pha’n. En in, la âng ah hin Amorte, Kanaante, Hitte, Perizte, Hivte leh Jebushte haw hi nawdok ding ka hi.

¹² La chiana ding gam ua a la chêngsate haw hi tawh thuthung siam lo dingin chingthei un; chutilochun, la lak ua thâng hung hi kha’n a.

¹³ A mâichâmteu la hisiat ding, a milimteu leh a dawikhuamteu chule la hichip ding ahi;

¹⁴ (pathian dang him him la ho lo diu ahi, Lalpa, a min doichilgil kiti chu Pathian doichilgil ahi ngal a.)

¹⁵ A gam ah chêngte hi tawh thuthung siam kha tawl in, a pathianteu kiang po ah hin va ângkawm in, a pathianteu kiang po ah va kithawi in, a hun chial phat ua leh le a kithoinateu po chu vanekha pal in lau.

¹⁶ Chuleh, la chapateu ji dingin a chanuteu po vala khan la tin uh, a chanuteu chun a pathianteu tawh hun ângkawmsak pal in, la chapateu chule a pathianteu tawh ângkawm kha kha’n au.

¹⁷ Milim kisung pathian la siam lo ding uh ahi.

¹⁸ Thawipanglo kût la bawl diu ahi. Thu ka hun piaksa gual ah khan, Abib tha sung ah hun ka tep piak dungzui ah khan, ni sagi sung chu thawipanglo vaithum la nêk ding uh ahi; zia Abib tha ah khan Aigupta gam ah kipat ka hun puidaw la hi’ngal un;

¹⁹ Sûl hong masa pen taphot chu kei â ding ahi; bawng hon lak hi’n, belam hon lak ah hitaleh, a piang masa pen chu kei â ding ahi.

²⁰ Sabiltung piang masa pen chu belamno in la tat ding ahi; la tat nop lo leh, a ngawngpigu la hekbot ding ahi. La chapa piang masa pen taphot chule la tat ding ahi. Kuama ka âng ah khutngawn in a hung kilâk lo ding uh ahi.

²¹ Ni guk sung na sêm unla, a ni sagi ni chun la kichawl dam diu a hia; bu tu’hun hileh, bu ât hun hileh la kichawl him him ding uh ahi.

²² Hapta kût la mat diu a hia, gehu bu ga masa lakkhawmna kûtle kumtawp ah bu lak khawm zaw phat leh pawltâk kûtle la mat ding uh ahi.

²³ Kum khat sung in la lak ua pawsal zosia chu Lalpa la Pathian uh, Israel Pathian âng ah thumvei la hung kilat sek ding uh ahi.

²⁴ La âng ah namtin naw mang in, la gamgite kêklet piak ding ka hi’ngal ah; kum khat sung ah Lalpa la Pathian kiang ah la chia mang sung in kuama’n la gam hi a la ducha lo ding a hiu.

²⁵ Kei â ding ah kithoina thisan chu thawi pang vaithum tawh la hun lat khawm lo diu a hia; chiakân kût kithoina haw chule a jingkal kit tiang ah la khêk lo ding uh ahi.

²⁶ La lou ah thâiga masa pen lak ah a pha pente chu, Lalpa la Pathian In ah la hun choi ding ahi. Kêlno chu a pi nawitui ah la huan lo ding ahi, a tia.

²⁷ Lalpa chun Mosi kiang in: “Zia thute hi zik tiam in; zia dungzui ah hin nang leh Israelte kiang in thuthung ka siam ahi,” a tia.

²⁸ Zia tak ah chun Lalpa kiang ah ni sawmli leh jan sawmli a hung um ah; an him him a ne pua’, tui le a dawn diak puai. Chutichun, a suangpêkte ah chun thuthung, thupiak sawmte chu a zik ta’n.

Mosi Mai A Vakna

²⁹ Mosi chu Sinai tâng ah kipat in a hung suk a. A khut ah thuthung kizikna suangpêkte ni chawi kawm ah a hung suk lai ah chun, Mosi chun Pathian tawh kimaitua ah a kiholimna ziak un a mêlvâk lam chu a hepua’n.

³⁰ Aron tawh Israelte chun Mosi a la mu phât un, a maivun chu a vâk ta mai ah, a hun nai ngam ta puau hi.

³¹ Himaleh, Mosi’n amau chu a ko ah: tichun, Aron tawh mipi hotute zosia chun a hun nai ua; chuleh, Mosi’n amau chu a hun ho ta’n.

³² Ziazaw chun, Israelte zosia’n a hun nai ua; tichun, Sinai tâng ah Lalpa’n a hun kihopi’na a thupiak zosia chu a hilsawn tai.

³³ Chuleh, Mosi’n amau kiang ah thu a gen zaw phat ah chun, a mai chu maikhûna’n a khû ta’n;

³⁴ Ahi’n la, Mosi chun Lalpa ho ding ah a ma-âng ah a chia phat leh, a hung pawt daw kit masangsia chu a maikhûna a hawkdaw sek a hia: chuleh, a hung pawtdok kit sek ah, a thupiakte chu Israelte kiang in a hilsawn kit sek a;

³⁵ chuleh, Israelte chun Mosi mai chu a et ua leh a mêl chu a la vâk sek ah; tichun, Mosi chu Pathian ho ding ah a lut kit masia chun a mai chu maikhûna’n a khû zing sek hi.