PAWTDAWNA THU 32 - PATHIAN LEKHABU THIANGTHO (BSI)

Sana Bawngno Lim

¹ Mipite chun Mosi tâng ah kipat a hung suk kit hak talua tai, a tiu ah tichun, Aron kiang in a chia khawm ua a kiang in, “Kipan in, ka mau ei pui dingin pathian ei siam piak mai in; zia Mosi, Aigupta gam ah kipat ei puidokpa hi la bangti a hem ka he’phak ta puau in,” a hung tiu a.

² Aron in a kiang un, “La jiteu, la chapateu leh la chanuteu sana bilba zosia hun lathau inla, ei hun piau in,” a tia.

³ Tichun, mipi zosia’n a sana bilba zosiau chu a hun lathau ah, ziate chu Aron kiang in a hun chawi khawm ua.

⁴ Ama’n ziate chu a la’, zia chu bawngno lim in a sung ah; tichun, “Aw Israel, ziate hi Aigupta gam ah kipat hun puidok pathiante chu a hiu,” a tiu a.

⁵ Aron in zia chu a mu in a âng ah chun mâichâm khat a siam ah; chuleh, Aron in thu a than ta’n: “Jing hileh Lalpa â ding ah kût hiding ahi,” a tia.

⁶ Tichun, a jing ah chun ma tak in a tho ua, hâlmang kithoina a lân ua, kichamna thilpiak le a hun lau ah; mipite chu ne leh dawn dingin a chukhawm ua, tawtbawl dingin a ding tau a.

⁷ Chun, Lalpa chun Mosi kiang in, “Chia suk in! Aigupta gam ah kipat la hun puidawte saw a kisubuak zo tau hi;

⁸ ka thupiakte chu kin tak in a kiheisan zo tau: Bawngno lim a kisun un, a ho un, a kiang in kithoina bawl in, ‘Aw Israel, ziate hi Aigupta gam ah kipat hun puidok pathiante chu a hiu,’ a ti zo tau hi,” a tia.

⁹ Lalpa chun Mosi kiang in: “Zia mite hi ka hechian tai, mi lu’lul tak a hiu hi;

¹⁰ tu’hin, ei thathawt inla, a chung ua ka lungnatna a hung kitongkhong ah, amau haw ka katmang vek theina dingin; nang la hileh vang nam lian tak in hun siam na’ng ka,” a tia.

¹¹ Himaleh, Mosi chun Lalpa a Pathian chu a awimaw ta’n: “Lalpa, bang ding ah la mipite Aigupta gam ah kipat thilhitheina nasa tak tawh la khut thahât tak ah la hun puidawte chung ah la lungnatna kuangjak ding a hem?

¹² Bangatia a hem Aiguptate chun, ‘Siatna huaisia tak tuak dingin a puidaw, tâng ah te amau that ding leh lei chung zosia ah amau nuaimang ding leh kâk tumsak vek dingin a puidaw ahi’, a ti ding uh? La lung natna huaisia tak hi daisak inla, la mipite chung ah thil phalo bawl ding la guat chu haisan mai ta’n.

¹³ Abraham, Isak leh Israel la suakte kiang ah nangma ngei in kihaksial hial ah a kiang ua, ‘La suanteu chu van ah aksi jat in hun hipung ing ka tin; chuleh, zia gam, nang uh â ding ah ka pautiamna gam hi la suante kiang ah pia’ng ka tin; amau in zia gam hi kumtuang in lua ding a hiu,’ la ti haw kha gêldok kit in,” a tia.

¹⁴ Chutichun, Lalpa’n a mipite chung ah thil phalo bawl ding a ngai tuana’ kipat chun a lung a hei tai.

¹⁵ Chun, Mosi chu a kihei ah, tâng ah kipat chun a kum suk ah, thuthung a zikna suangpêkte chu a langtuak ah kizik ahi’n; a ma lam leh a nung lam ah chun lekha kizik gêl ahi.

¹⁶ Suangpêkte chu Pathian khutsuak ahi’n, lekha kizik chule Pathian in a sut a hia, suangpêk kikhuak ah kisun ahi.

¹⁷ Joshua’n mipite kiko thawm chu a het phat in, Mosi kiang in, “Giabuk ah kipat in kido thawmgi ka he na e!” a tia.

¹⁸ Himaleh, ama chun, “Gâl zo te kiko thawm gi a hipua’n, gâl lâkte kiko thawmgi le ahi diak puai; ka het hi Lasate thawm gi ahi e!” a tia.

¹⁹ Giabuk kiang nai a hung tun phat un, bawngno lim leh a lâmpite chu a mu ta’n, Mosi lungnatna chu a hung puangjak phut mai ah; tichun, a khut ah suangpêkte chun a sep ta’n; tângbul ah chun a sep kek tai.

²⁰ A bawngno lim siam uh chu a la’, mei in a hâl ah, a gawtbuang ah, tui chung in a thejak ah, Israelte zia tui chu a dawnsak tai.

²¹ Mosi chun Aron kiang in: “Zia mipite hin la chung ah bang a bawl ziak ua, zia gual lawm lawm ah gitlona huaisia hi a chung ua la tunsak ziang a hem?” a tia.

²² Aron in, “Ka Lalpa lungnatna puangjak ki’hen: mipite hi thilsia bawl gaw zing a hiu ti nang inle la henai.

²³ Amau in ka kiang ah, Ka mau ei pui piak dingin pathiante ei siam piak in; zia Mosi, Aigupta gam ah kipat ei puidokpa hi la bangti chanchin ahi em ka he’pha ta puau hen, a hung tiu a.

²⁴ Tichun, keima’n a kiang un, “Kuale sana nei taphot in hun lipthau in, ka tia. Chutichun, ei hun pekhawm tau ah, mei lak in ka sep lut ah, zia bawngno lim hi hung pawt ziang ahi chu lam!” a tia.

²⁵ Mosi’n mipite chu a nop dan dan ua ki-ngolpêk ziang a hiu ti a mu ta’n; (Aron in a mêlmateu nasan in a musit ding khop un, a nop dan chiat ua a la kipêksak ta’ngal a;)

²⁶ Mosi chu giabûk lutna kotbul ah chun a ding ah, “Kua kua a hem Lalpa lam ah pang ding? Ka kiang lam ah hung un,” a hun tia. Ziaphat chun, Levi chate zosia chu a kiang lam ah chun a hung khawm tau a.

²⁷ Ama chun a kiang un, “Zia gual hin Lalpa, Israel Pathian in a gen hi: Mi tin in la chemjam uh kikua chiat un! Chia unla, giabûk lutna kot langkhat lam ah kipat ah langkhat lam tiang in chiau inla, mi tin in la suapiu, la gualpau, leh la Invêngteu chu that un, a tii,” a tia.

²⁸ Mosi gen gual ah chun Levi chate chun a bawl tau ah; zia ni chun mipi sang thum vêl chu tha in a um tau hi.

²⁹ Mosi’n a kiang un, “Tu’ni hin nangmau leh nangmau Lalpa nasêm dingin la kinamdet tau hi; mi tin in amau chapate, amau suapite a la do ta’ngal un; tichun, tu’ni hin hun maljawl ta’n a,” a tia.

³⁰ A jing phat ah chun, Mosi’n mipite kiang ah chun, “Thil phalo huaisia tak la la bawl kha tau hi. Himaleh, tu’hin Lalpa kiang ah va chia to ing ka tin; la thilbawl khialnau thoidamna ding ka hun bawlthei khâk leh,” a tia.

³¹ Tichun, Mosi chu Lalpa kiang lam in a kile’kit ah, a kiang in, “Tamaijen, zia mipite hin thil huaisia tak a la bawl khial tau hi; amau â dingin sana pathiante a la kibawl ta mai un;

³² ahi’n la, tu’hin a gitlonau la ngaidam thei ding leh–ahi theilo ding leh vang la lekhabu ka min la ziksa kha nuaimang kit zaw mai in,” a tia.

³³ Himaleh, Lalpa chun Mosi kiang in, “Ka chung ah gilo taphot chu ama ngei chu ka lekhabu kipat in nuaimang ding ka hi.

³⁴ Himaleh, tu’hin nangma chia inla, mipite hi la kiang ah ka hun hilna gam chu lua dingin vapui in; en in, ka vansawlchâk in hun pui zing ding ahi. Ahi’nla, ka gawtna hun a hung tun phat leh amau gitlona dungzui ah chun hun gawt ding ka hi,” a tia.

³⁵ Ziaphatchun, Aron in bawngno lim a la siam piak ziak ah chun Lalpa’n mipite chung ah chun natpi a hun tunsak tai.