PAWTDAWNA THU 28 - PATHIAN LEKHABU THIANGTHO (BSI)

Thiampute Kithuamna

¹ Ziaphat chuleh, la u Aron tawh, a chapa la kiang ah umte chu hun pui inla, Aron leh a chapate: Nadab leh Ithamarte chun Israel chate lak ah hin kei â ding ah thiampu na a septheina ding un.

² La u Aron â ding ah kithuamna thiangtho, ama sulopi leh jem hoi dingin siam inla.

³ Chuleh, mi khutthiamte, lemhiatna thagau ah ka thuam zosiate kiang ah gen inla, Aron chun thiampu’na kei â ding ah ei sep piak theina ding ah hithiantho a hung hitheina dingin a kithuamna dingte chu bawl piak uh hen.

⁴ Ziate hi ahi a kithuamna ding ah a siam dingteu chu: awmphaw, ephod tawh, puanâk chual tawh, puanâk jem hoi tawh, thiampu lukhuk tawh, kawnggâkna pakhat tawh la siam ding ahi. La u Aron tawh a cha pawsalte chun ka thiampu’na a septheina ding uh leh,

⁵ sanate leh pat dum, a sandup leh a sandângte, puan malngat mang in la bawlsak ding ahi.

Thiampu Puanâk Chung (Ephod) Chu

⁶ Chun, thiampu â ding ephod chu sanate, patdum, a sandup leh a sandâng ah kisiam leh puan malngat, thuksa, mi khutthiam tak in a ga la bawlsak ding ahi.

⁷ Zia chu, a nung lam leh a ma lam suikhawm ziang thei dingin, a liangko gêl ah chun a mong la siam gêl ding ahi.

⁸ Puanâk chual chung ah um, a kawnggâk ding chule zia kisiam dan gual ma chu mang in la siam ding ahi; chuleh sana, puan malngat leh thuksa puan nem, a dum, a sandup leh a sandângte hi’n a.

⁹ Chuleh, Onik suang mantam pani la’n la, zia chung ah chun Israel nam sawm leh nite min la sut ding ahi.

¹⁰ Pagukte min chu suang khat ah chun sun inla, a dang pagukte min chu suang pakhat zawk ah chun la sut ding ahi; a pian dan uh kizom dungzui in sun in.

¹¹ Suang mantam ah min sutna bawlte a cheimawi gual un Israel chate min, suang pani ah chun a bân cha’n sun in, la jem hoi ding ahi; sana khauzang in a zem mat gual in la bawl ding ahi.

¹² Zia suang panite chu Israel suante hetzingna suang hi dingin thiampu liangko gêl ah dâlbak chun la koi ding ahi; tichun, Aron chun hetzingna dingin Lalpa ma ah chun zia minte chu a liangko dâlbak ah chun a paw zing ding ahi.

¹³ A min tuam vêl ah chun sana khau jam vêl, a jem hoi la siam ding ahi.

¹⁴ Sana thiangtho pumphial kiphêk lawm pani siam inla, zia kikuai mat kizop khawmte chu tawh khauhual gual ah kiphêk khawm chu tawh zoptua in.

Thiampu Awmphaw

¹⁵ Chun, mi khutthiam tak in a bawl vaihawmna awmphaw pakhatle la bawl ding ahi; thiampu kithuamna ding puanâk chual la bawlsak gual ah khan la bawl ding ahi. Sanate, pat dum, a sandup leh a sandâng leh puan malngat thuksa’ kigat la siam ding ahi.

¹⁶ Kil li nei leh thuani nei ah siam ding a hia, a dung lam khâp khat, a vailam le khâp khat ma in la bawl ding ahi.

¹⁷ Suang mantam chi chuam chuamte chu tian li ah tiang in jem hoi in: a tian masa pen ah chun: karnelian, khrusolit, emeral;

¹⁸ a tian ni’na chun: turquie, sapphire leh moonstone;

¹⁹ a tian thumna chun: jakinth, agate leh amethis;

²⁰ a tian li’na chun: beril, onik leh jaspar tiang in: zia suang mantamte hi sana kikhuak sung ah chun phum chiat ding ahi.

²¹ Suang mantam sawm leh ni, Israel chate min dungzui in um intin; min namna khutsebi kijem mawi gual in nam sawm leh nite chiat adingin a min uh la sut ding ahi.

²² Awmphaw kuana dingin sana pumphial, khauhual kiphek lom gual in siam inla;

²³ chuleh, awmphaw bil dingin sana bil pani siam inla, zia a bil panite chu awmphaw ning te gêl ah chun la vua ding ahi.

²⁴ Sana pumphial pani la siamte chu awmphaw bil ding ah la siam sana bil pani, a ning gêl ah la bawl sung ah chun thun lut inla;

²⁵ sana khau kiphan panite mong chu a gei dung cheina ah chun bek inla, ephod liangko âng lam ah chun la koi ding ahi.

²⁶ Sana bil pani siam inla, ziate chu awmphaw gei mong lam, puanâk chual sung lam deu ah chun koi in.

²⁷ Sana bil dang le pani ma siam inla, ziate chu a âng lam ah thiampu liangko dâlbak pani nuai lam pang ah kizopnau vêl tuam ah, thiampu puanâk chual kawnggâk chung lam ah chun la vua ding ahi.

²⁸ Awmphaw chu a bil ah chun puanâk chual bil chu tawh patkhau dum ah khi’mat ding ahi. Chutichun, puanâk chual kawnggâk chung ah chun a um den theina dingin: chuleh, awmphaw chu puanâk chual ah kipat chun a kitoldaw theilona dingin.

²⁹ Tichun, ama chu mun thiangtho ah a lut phat leh, Lalpa ma ah Israel chate zosia het zing ahi’na ding un a min uh chu thutanna awmphaw ah chun a lungchang zawn in a puak zing ding a hi.

³⁰ Thutanna awmphaw sung ah chun Urim tawh Thumim la koi ding ahi; ziate chu Aron in Lalpa kiang ah a chia phat leh, Israel chate thutanna awmphaw chu a lungchang zawn in Lalpa âng ah a puak lut zing ding ahi.

Thiampu Kithuamna Dangte

³¹ Chun, puanâk chual chu pat dum ngen in la bawl ding ahi.

³² A lai tak ah chun a luchang thunna ding a hawm siam ding ahi; zia hawm chu a kêklet lo’na dingin puanâk bânchom kikimna gual in la bawl ding ahi.

³³ A puanâk nuai lam chu theibufaiga mongpal gual ah kikhui pal, a dumte, a sandupte leh a sandângte a gei dung kîmvêl ah chun la siam ding ahi; ziate kikâl ah chun sana telneng a kîmvêl ah chun la khai ding ahi;

³⁴ sana telneng khat leh theibufaiga mongpal gual ah kikhui pal pakhat chiat kikâl hel in a puanâkchual geijul ah chun la bawl ding ahi.

³⁵ Aron in na a sep ding phat leh zia chun kithuam intin, Lalpa âng ah a lut leh a pawt si’n leh a chia git chu kihe thei in ah, a thi’lona dingin.

³⁶ Sana pêk lekhazik theina ding siam inla, min namna gual ah kijemhoi in, “Lalpa â ding ah Thiangtho,” ti sun in.

³⁷ Zia chu thiampu dialkop mai lam ah chun patkhau dum in la khîtden ding ahi.

³⁸ Zia chu Aron chalpâng ah um intin, Israel chate thilpiak thiangtho zosia ah diklona um taphot chu Aron in a maw a puak ding ahi; zia chu Lalpa âng ah pawm tâk a hitheina dingin a chalpâng ah chun a um zing ding ahi.

³⁹ Puanâk chung chu puan malngat leh nem tak la ga ding ahi; lukhuk dinginle puan malngat leh nem tak khut ah kikhui la siam ding ahi.

⁴⁰ Chuleh, Aron chapate â dingin puanâk chung, a kawnggâk ding leh a dialkop dingteu la siam piak ding ahi; amau cheimawi ding leh a lopina ding un.

⁴¹ Ziate chun la u Aron tawh, a chapate chu la thuam ding ahi; chuleh, amau chu sathaunu’ inla tin, la latdaw ah, la sukthiantho ding ahi; tichun, kei â ding ah thiampu na a septheina ding un.

⁴² A taksau ngawnchang hinau khû ding ah puanâk chual nuai ah a chên ding un puan malngat tawkanuai la siam piak ding ahi; zia chu a kawng ua kipat a pheizum tiang uh tung ding ah la siam ding ahi.

⁴³ Ziate chu Aron tawh a chapate’n, mipite kikhopna biakbûk sung ah nasêm ding ah a lut phat ua leh, mun thiangtho, mâichâm mai ah a hung ding tak ua leh a chên sek diu ahi: chutilochun, gitlona kithoina ding ah thillat a hun choi phat ua leh amau chu maw chang ah um in, thi kha’n au. Zia hi ama tawh a nung ah a suante zosia â ding ah kumkhua a bawl ding uh dan ka guat chu ahi.