PAWTDAWNA THU 27 - PATHIAN LEKHABU THIANGTHO (BSI)

Hâlmang Thil piak Latna Mâichâm

¹ Chun, thinggi thing in mâichâm pakhat tong nga sau, tong nga lian, a ning pali nei hi’n tin; a san dan tong thum in la siam ding ahi.

² A ning palite ah chun a ning bawk la siam ding ahi; a ning bawkte chu a pum tawh sakhat ahi ding ahi, sum-eng la luan khum ding ahi.

³ Meivam kholna ding bêlte, vutluakna dingte, khutsawp kuangte, sasutna ding thik satul kâ leh mei koina ding kuangte hawle la siam ding ahi: zia tak ah matchâk ding zosia hi sum-eng ngen ah la bawl ding ahi.

⁴ Chuleh, mâichâm ûmna dingin sum-eng lên siam inla, zia lên chung ah chun sum-eng bil pali, a ning pali ah um dingin siam in.

⁵ Zia lên chu mâichâm nuai ah phâ inla, a mongkai chu mâichâm zawnna bil ah chun bât in; tichun zia lên chun mâichâm kimkhat hun khu to ding ahi.

⁶ Chuleh, mâichâm jawnna ding thinggi thing in mol siam inla, ziate chu sum-eng luan in;

⁷ zia molte chu a bil sung ah chun thunlut hi’ntin; tichun, a jawnna mol chu mâichâm sik tuak gêl ah chun pakhat gêl ah um ding ahi.

⁸ Mâichâm chu thingpêk ngen, a sunghawm ah la siam ding ahi. Tâng ah ka hun etsak gual chet ah khan la siamsak ding ahi.

A Huang leh A ûmna

⁹ Chun, biakbûk huang ûmna ding la siam ding ahi. Tumlam kâi ah chun puan malngat thuksa kigat, tong za khat ah sau la jak ding ahi;

¹⁰ a khuam sawm nite leh a tunna ding ah kikhuak sawmnite chu sum-eng ah kisiam ngen ahi ding ahi: Himaleh, a khuam ah kibâtna kuaikâte leh a kildennate chu dangka thik ngen ah la siam ding ahi.

¹¹ Zia gual ma chun, a mallam kâi ah puanjak dingin tong za khat ah sau, khuam sawmni tawh a kituana ding ah kikhuak sawmni ma chu sum-eng ah kisiam hi’ntin; a khuam ah kibâtna kuaikâte leh a kildennate chu dangka thik ngen ahi ding ahi.

¹² Tumlam kâi ah a vailam dâi puanjak ding chu tong sawmnga hi’ntin; a khuam sawmkhat leh a tunna ding ah kikhuak sawmkhat ma a um ding ahi.

¹³ Chuleh, sualam kâi ah a vailam dâi puanjak ding chu tong sawmnga hi’n a.

¹⁴ Kotkhak sik langkhat lam ah puanjak ding chu tong sawm leh nga sau hi’ntin; a khuam pathum leh a kitunna ding ah kikhuak pathum ma la bawlsak ding ahi.

¹⁵ Chuleh, kotkhak sik langkhat lam ah puanjak ding chu tong sawm leh nga sau hi’ntin; a khuam pathum leh a kituana ding ah kikhuak pathum ma la bawlsak ding ahi.

¹⁶ A dâi kotkhak ah jak dingin tong sawmni ah sau, a dum, a sandup leh a sandâng ah kibawl, puanmalngat thuksa kigat, puan jem khui thiam tak in a khui ding ahi; khuam pali tawh a kituana ding ah kikhuak pali le a um ding ahi.

¹⁷ A huang ûmna dâi khuam mûk zosia chu dangka ti ah tuam ding hi’n tin; kuaikâte chu dangka thik ngen leh, khuam tunna ding kikhuakte chu sum-eng ngen ahi ding ahi.

¹⁸ A huang sung dung lam chu tong za khat hi’ntin; a vailam chu tong sawmnga hi’n a: A sândan chu tong nga hi’ntin, puan malngat, thuksa kigat puanjak leh a khuam tuana ding ah kikhuak sum-eng thik ah siam ngen hi’ntin.

¹⁹ Biakbûk ah matchâk nepnawi ding zosia, a kildenna zosia leh a huang ûmna kildenna ding zosia chule sum-eng ngen ahi ding ahi.

Thaumei Etkol Ding dan

²⁰ Chun, thaumei chu bangtik lai ah le vâk zing ah koi a hitheina dingin Oliv thau kihek thiang, thautui ding ah hun chawi zing dingin Israelte chu thu la piak ding ahi.

²¹ Kikhopna biakbûk ah, puanjak pawlam ah thuthung thingkuang âng lam ah chun Aron leh a chapate chun, nitâk ah kipat jingkal kit tiang ah Lalpa âng ah mit lo ah kuang zing dingin a guanggal diu ahi. Zia hi Israel chate â ding ah a khang a khang ua, kumtuang ah a bawl zing ding ua ka thuguat det tak chu ahi, a tia.