PAWTDAWNA THU 24 - PATHIAN LEKHABU THIANGTHO (BSI)

Thuthunna Thisan Chu

¹ Ziaphatchun, ama’n Mosi kiang in: “Nang tawh, Aron tawh, Nadab tawh, Abihu tawh, Israel upa sawm sagi tawh Lalpa kiang in hung to unla, galkâng deu in ei hun biau in.

² Mosi bep in Lalpa hun nai intin; a dangte’n a hun nai lo diu ahi; mipite chunle a hun zui to lo ding uh ahi,” a tia.

³ Tichun, Mosi a hung ah, Lalpa thugen tawh a thuguat zosiate chu mipite a hil ah: mipite chun kigual tak in, “Lalpa’n a gen zosia chu bawl ing kau,” ti’n a hun dawnhu tau a.

⁴ Mosi chun Lalpa thugen zosia chu a zikdok ah. Jingkal matak in a tho ah, tângbul ah chun mâichâm pakhat a siam ah, Israel nam sawm leh ni tawh kituak in, khuam sawm leh ni a phut a.

⁵ Israel mipite lak ah tangvalte chu a sawl ah, amau chun hâlmang thillat tawh kichamna bawngchal Lalpa âng in a hun lân ua.

⁶ Mosi’n gan thisan kimkhat chu a la, kuangdal sung in a koi ah; chuleh, gan thisan kimkhat dang cheng chu mâichâm a the’khum a.

⁷ Ziazaw chun, thuthung lekhabu chu a la, mipi zosia het in a simdok ta’n; amau chun, “Lalpa’n a gen zosia chu bawl in, a thu le awi ing kau,” ti’n a hun dawnhuu a.

⁸ Mosi’n thisan chu a la, mipite chu a the’khum ah, a kiang un, “Lalpa’n a gen dungzui ah, nanghaw tawh kikâl ah thisan ah thuthung a siamna hi en un,” a tia.

Tâng Chung ah Pathian Kiang A Tunnau

⁹ Ziaphatchun, Mosi, Aron, Nadab, Abihu tawh Israel upa sawm sagite chu a chia to tau a;

¹⁰ tichun, amau cheng chun, Israel Pathian chu a mu tau a. A keng pêk nuai ah chun sapphire suang mantam ah kisiam lampi kizutnâm khat a la um ah; a thian dan chu van thiang sing seng tawh bang ahi.

¹¹ Israel nam puitute chung ah chun Pathian in a khut a tha pua’; amau chun Pathian chu a mu tau a: Chuleh, a neu in, a dawn tau hi.

¹² Lalpa chun Mosi kiang in, “Tâng ah hin ka kiang ah hung kal to in la ei la ngak in; chuleh, amau haw la thuhilna ding ah Dan leh thupiak ka zikna suangpêkte le hun pia ding ka hi,” a tia.

¹³ Tichun, Mosi’n a kithuapipa Joshua pui in a kipandok ta, Mosi chu Pathian tâng ah chun a kal to tai.

¹⁴ Upate kiang ah chun, “La kiang lam ua ka hung kit masiau zia tak ah hin a la um zing un: Aron tawh Hur la kiang un a um ua, kuale thubuai nei taphot in amau kiang lam a la zuan ziang uh hen,” a tia.

¹⁵ Chun, Mosi chu tâng ah chun a kal to ta’n; chuleh, sûmpi’n tâng chu a hun khû tai.

¹⁶ Lalpa lopi’na chu Sinai tâng chung ah chun a um den ta; sûmpi’n tâng chu ni guk sung a khû ah: A ni sagi ni chun ama’n sûmpi lak ah kipat chun Mosi a hun ko tai.

¹⁷ Lalpa lopi’na kilang chu Israelte mit mu in tângvûm ah haltuina mei gual mai ahi.

¹⁸ Mosi chu sûmpi lak ah chun a lut ah, tâng a chun a kal to in: Mosi chu tâng ah chun sun sawmli leh jan sawmli a vachâm tai.