PAWTDAWNA THU 22 - PATHIAN LEKHABU THIANGTHO (BSI)

Kiditkitna Dan

¹ Mi pakhat in, bawngchal a hem, belam a hem khat gu’n that in a hem, zuak mang a hem hileh, bawngchal pakhat man ah bawngchal panga a dit ding, belam pakhat man ah belam pali a dit ding ahi. Gucha chun a dit kit têi ding ahi, a ditna ding a nei lo chun ama chu zok mai ding ahi.

² A thil gûk gancha, bawngchal hileh, sabiltung hileh, belam hitaleh, a hing ah gucha khut ah kimu kit ahi’chun, a le’ni in a dit kit ding ahi.

³ Gucha khat chun In a vîhawm guat lai tak in kiman in, kivawlum ta leh, a thisan phuba lâk hipua’n tin;

⁴ Ahi’n, nisa suak nung ah zia gual ah chu kibawl ahi’chun, a thisan phuba chu lâk hi’n a.

⁵ Mi pakhat in lou a hem, grep huan a hem, gancha nêk zawsak ta leh; ahiloleh, mi khat loulai ah a gancha thâjan in nêk zawsak kha leh, ama lou a hem, grep huan a hem a phatna pen pen in a dit ding ahi.

⁶ Mi pakhat in mei tha’suak in ling leh khaute a hun kât ah, buphalte leh a kisia khawmte a hem, bu dinglaite a hem, lou a hem a hun kâk khâk chun, mei tha’suakpa chun a dit vek ding ahi.

⁷ Mi pakhat in a Invêngte kiang ah dangka hileh, van hileh kolsak hen la, zia chu a la kigudok hen la, a gu-pa chu matdaw ahi’chun a le’ni in a dit ding ahi.

⁸ Gucha chu matdaw ahilo chun, a Invêngpa van chu ama lâk ahileh hilo hetchianna ding in a Inneipa chu vaihawmte âng ah pui in, a guk leh guk lo etchian ding ahi

⁹ Bawngchal a hem, sabiltung a hem, belam a hem, puan a hem leh thil dang matsua thu him him ah, kinialna a um ah, mi khat in, “Zia hi kei â ahi,” ti ah kichuna a um chun, zia thubuai chu vaihawmte âng ah tut hi’ntin, vaihawmte’n thiamlo a chansak zawk zawk in, a le’ni in a dit ding ahi.

¹⁰ Mi pakhat in a Invêngpa kiang ah sabiltung khat a hem, bawngchal khat a hem, belam khat a hem leh bang gancha hiziang leh le a chintup dingin pia hen la; chuleh, zia gancha chu kuama mulo ah thi a hem, a liam a hem, gûk mang a hem in um ta leh;

¹¹ a Invêngpa neithil chung ah chun a khut a thiang hi ti’n; Lalpa kiang in amau teni kikâl ah chun a kihaksial ding uh ahi: Chun, a gancha neipa chun zia kihaksialna chu a pom ding ahi; tichun, kiditna bangma bawl lo ding ahi.

¹² Himaleh, ama gûk ahi’chun, a gancha neipa chu a dit kit ding ahi.

¹³ Gamsa tha ahi chun, a hetchianna dingin a sathem a hun choi ding ahi; tichun, gamsa tha gancha chu a dit ngai pua’n a.

¹⁴ Mi pakhat in a Invêngpa gancha khêl hen la, zia gancha chu a neipa umlo kâl in liamna a hem, thi’na a hem tuak kha ta leh, a dit ding ahi.

¹⁵ Ahi’n, a neipa um lai tak ahi chun, a dit ngai pua’n tin; a khelman chu a piak tin ding ahi.

Khawtang leh Sakhaw Dan

¹⁶ Pawsal pakhat in nungakthiangtho, ji ding ah hual hinai lo khat jawl pai in luppi ta leh, a man a ting ah pia’n ji’n a nei ding ahi.

¹⁷ Nungakpa chun ama ji ding ah a piak nawp lo chun, mothak man jat gûn a piak ding ahi.

¹⁸ Numei dawi thil bawl him him chu a hing ah la hoi lo ding uh ahi.

¹⁹ Kua hileh, gancha luppi taphot chu la tha diu ahi.

²⁰ Kua hileh, Lalpa hilo, pathian dang kiang ah kithoina la’n taphot chu thitâk ah thiamlo chang ahi.

²¹ Malzin chu dik lo tak ah la bawllo diu, la sukgenthei lo diu ahi: Aigupta gam ah malzin la hi ta’ngal ua.

²² Meithâi hileh, nauchaga hileh la sukgenthei lo ding uh ahi.

²³ Amau la sukgenthei khak ua, ka kiang ah a hung thûm ua leh, a thûmnau chu ngaithâk piak ngei ngei ding ka hi’ngal a.

²⁴ Ka lungnatna la chung un kuang intin, chemjam in hun that ing ka tin, la jiteu chu meithâi in hung um intiu in, la chateu le nauchaga hung hiding a hiu.

²⁵ Ka mite tawh mi chagate kiang ah sum la batsak tak ua leh, sumpung tam tak tak la sekpa gual in bawl kin la, a chung un sumpung la del lo ding ahi.

²⁶ La Invêngte puanâk chual kipau tiamna a koi la lâk leh, a ni tum ma ngei in la piak kit ding ahi;

²⁷ A kithuamna neisun himaithei ahiziak in bang sil in lum ding a hem? La Invêngpa chun kei ei hun ko hen la hileh a la ngaithâk piak ding ka hi: mi lainat thiam tak ka hingal a.

²⁸ Pathian gensia kin la, la mipite lak ah puitute le hosia kin.

²⁹ La thâiga masa pen leh, la grep ga masa penteu chu uaiâi lo ah la hun lat ding uh ahi. La chapate lak ah piang masa pen chu lei piak diu ahi.

³⁰ Zia gual ma chun, la bawngteu, la belamteu le la hun bawl diu ahi. Ni sagi a pi tawh um khawm phot intin, a ni giat ni leh lei piak sek ding uh ahi.

³¹ Nang uh hi kei â ding ah mithiangtho hi’n lau: ziaziakchun, gamlak ah sahâng in a tha sa le la nêk lo ding uh ahi; uicha la piak ding uh ahi.