PAWTDAWNA THU 20 - PATHIAN LEKHABU THIANGTHO (BSI)

Thu Sawm Piakna

¹ Ziaphatchun, Pathian in ziate zosia hi a gen tai:

² Keima hi Lalpa la Pathian uh, Aigupta gam ah la saltânnau In ah kipat hun puidokpa chu ka hi.

³ Keima tilo Pathian dang him him la nei lo diu ahi.

⁴ Chung lam van ah um hi hen la, nuai lam ah um hileh; ahiloleh, leinuai ah tui lak ah um hitaleh, bang thil hiziang leh le, a kibatpi a hem milim la kisiam lo diu ahi.

⁵ Zia haw âng ah chun bokkhup kiu inla, a nau le la sep lo diu ahi; Kei Lalpa, la Pathian uh hi doichilgil Pathian, pate gitlona chu ei pom lo a chateu chung ah a khang thumna leh a khang li’na tiang ah phuba la sek ka hi’ngal a.

⁶ Himaleh, keima ei hepi ah, ka thupiak zawmte suan chu, a sâng a sângte chung ah lungsiatna chuai lo hilang zing ka hi.

⁷ Lalpa la Pathian min chu la sua tempot lo diu ahi; a min sua tempot taphot chu Lalpa’n thiamchang ah, suachâksak lo ding ahi ngal a.

⁸ Sabbath ni thiangtho tak ah mat ding ahi ti hezing in.

⁹ Ni guk sung in nasêm in la tin, la sep ding zosia chu la sepzaw ding ahi.

¹⁰ Himaleh, a ni sagi ni hi Lalpa la Pathian Sabbath ni ahi: zia ni hin nang, la chapa, la chanu, la suakpa leh la suaknu, la ganchate leh la huang sung ah chêng malzin inle, kuama’n na la sep lo diu ahi.

¹¹ Ni guk sung in Lalpa’n lei leh van, tuisuagiat leh a sung ah um zosia hi a siam zo ah, a ni sagi ni’n a la chawlsan tâk ziakin, Lalpa’n Sabbath ni chu maljawl in, a suthiangtho ta ahi.

¹² La nu leh la pa ja in; chutileh, Lalpa la Pathian in a hun piak gam ah hin la dam sung nikhua a sawt theina dingin.

¹³ Tual that kin.

¹⁴ Zawntat kin

¹⁵ Gucha kin

¹⁶ La Invêngte kãl ah hiatpitu diklo in pang kin.

¹⁷ La Invêngte thil nei awtcha kin; la Invêngpa ji a hem, a suakpa a hem, a suaknu a hem, a bawngchal a hem, sabiltung a hem a thilneite him him la ên lo ding ahi.

¹⁸ Mipi zosia’n van-gi leh kawlphete leh pengkul git leh tâng meikhu tuam haw chu a muu in, lau ah kithing in, gamla deu in a ding tau a.

¹⁹ Mosi kiang in, “Nang in ka kiang un thu gen in, ngai ziang ing kau: Pathian vang ka kiang un thu gensak kin, thi kha’ng kau,” a tiu a.

²⁰ Mosi’n mipite kiang ah chun, “Lau kiu in, Pathian nang uh patep ding ah hung ahi, ama lau umna chu la mau ah a um zing ah, gitlona la bawl lona ding un a ti ahi,” a tia.

²¹ Ziaphatchun, mipite chu gamla deu tak in a ding ua, Mosi chun Pathian umna tâng thim sâ tak umna lam chu a nai a.

Mâichâm Bawl Ding Dan

²² Lalpa chun Mosi kiang in, “Zia gual hin Israelte kiang ah la gen ding ahi a tia: Van ah kipat nang ka hun kihopi hi nang un la mu tau a.

²³ Keima kibatpi dingin dangkathik ah kisung pathian la siam lo diu a hia, sana ah pathian limle la siam lo ding uh ahi:

²⁴ Keima â dingin lei ah hin mâichâm ei siam piak inla, zia chung ah chun la hâlmang thillatteu leh la kichamna thillatteu, la belamteu leh la bawngteu la hun lat sek diu ahi: ka min hetzingna taphot ah chun hung ing ka tin, hun maljawl ding ka hi’ngal a.

²⁵ Ahi’n, suang mâichâm lei siam piak ding ahileh vang, suang kisêk him him la mat lo ding ahi; sek a hem la mat chun mâichâm chu hi’buak ding ahi ngal in.

²⁶ Ka mâichâm chu kalbi ah kal to dingin la siam lo ding ahi; zia chung ah chun la jamaw la latsak lo ding ahi ngal in,” ti in.