PAWTDAWNA THU 19 - PATHIAN LEKHABU THIANGTHO (BSI)

Israelte Sinai tâng Hung Tunna

¹ Israelte chu Aigupta gam ah kipat a pawtdawu tha thum tin ni, zia ni ngei ah chun Sinai gamthip a hung tung tau a.

² Rephidim mun ah kipat in a hung pawt ua, Sinai gamthip a hung tung ua; zia gamthip ah chun giamun a khual tau a: zia tak tângbul ah chun Israelte chu a giak tau a.

³ Ziaphatchun, Mosi chu Pathian kiang in a chia to ah; Lalpa’n ama chu tâng ah kipat chun a hun ko in, a kiang in, “Jakob Inkuante kiang in zia gual hin gen inla, Israelte chu hil in:

⁴ Aigupta mite chung ah ka thilbawl dan leh mupi thâ ah ka hun puakdaw dan leh, ka kiang ah um ding ah ka hun pui dante hi la mu tau in;

⁵ tu’hin, ka thu la zop ua, ka thuthung la mat ua leh, mi zosia chung in nang uh hi kei â ding ah gobîk hi’n lau: lei chung zosia hi kei â ahi ngal a:

⁶ Chuleh, kei â dingin nang uh chu thiampu lenggam leh nam thiangtho hiding la hiu. Zia thute hi Israelte zosia kiang ah la gensawn ding ahi,” ti’n a gen a.

⁷ Mosi chu a hung kit ah, mipite lak ah upate chu a ko khawm ah, Lalpa’n a kiang ah thu a piak zosiate chu a kiang un a hilsawn tai.

⁸ Mipi zosia chun mi pakhat aw gual ah kituak tak in a hun dawnhuu a: Mosi chun mipite thugen chu Pathian kiang in a tut kit a.

⁹ Ziaphatchun, Lalpa chun Mosi kiang in, “Sûmpi sâ tak in la kiang ah hung ding ka hi; tichun, mipite’n la kiang ah ka thugen hi a het ua, nangma chu a hun taksan zawk sêm theina ding un,” a tia. Tichun, Mosi’n mipite thugen chu Lalpa kiang in a tut kit a.

¹⁰ Lalpa chun Mosi kiang in, “Mipite kiang lam in chia inla, amau chu tu’ni tawh jing ah hin hithiangtho in. A puan uh sawp thiang chiat uh hen la;

¹¹ a nithum ni ding ah chun kiging uh hen; a nithum ni leh Lalpa chu Sinai tâng chung ah chun mipite zosia mit mu in hung suk ding ahi.

¹² Mipite hun phâk thei ding chin gamgi gît kîmvêl piak inla, a kiang un: tâng lam ah chia to lo ding leh a gamgi khoi kha lo dingin chingthei un. Zia tâng sukha taphot chu thalup ding ahi.

¹³ Kuama’n a khut ua le a sukkhak lo diu, a sukha taphot chu suang ah se’lup a hem, thalpi’ kâplup a hem hiding ahi; gancha hileh, mihing hitaleh hinghoi lo ding ahi: pengkul thûm jawn jawn ah a hung git phat leh mipite chu tâng lam ah chun hung kal to uh hen,” a tia.

¹⁴ Tichun, Mosi chu tâng ah kipat chun mipite kiang lam in a hung kum suk a. Mipite chu a hithiangtho ah, a nîk leh puanteu a sawp thiang tau a.

¹⁵ Mipite kiang ah chun, “A nithum ni â dingin kiging zing unla; numei le sukha kiu in,” a tia.

¹⁶ A nithum ni jingkal ah chun van-gi leh kawlphe a hung um ah; chuleh, tâng chung ah chun sûmpi sâ tak a hung um ah, pengkul gi ngai tak mai a hung kimût ah; giabuk ah mipi zosia chu a kithing hial ziang tau a.

¹⁷ Mosi’n mipite chu Pathian kituakpi ding ah giabûk ah kipat chun a puidok ah; tâng bul ah chun a la ding tau a.

¹⁸ Lalpa chu meikuang ah a hung kum ziakin Sinai tâng chu a pum in meikhu’n a tuam a: Hâltuina meikhu gual in meikhu chu a kitung to ziang a: Chuleh, a tâng pumpi chu nasa tak in a kithing tai.

¹⁹ Pengkul git chu a ngai deu deu phatin Mosi’n thu a hun gen a: Pathian in ama chu van-git in a hun dawnhu a.

²⁰ Sinai tâng chung ah Lalpa a hung suk ah, tângvûm a hung tun in, tâng chung lam ah chia to dingin Lalpa chun Mosi a hun kodok ah; tichun, Mosi chu a kal to tai.

²¹ Ziaphatchun, Lalpa chun Mosi a hun ho ah, “Chia suk inla, mite hil in: achutiloleh, Lalpa a mu nopna ziak un a dâi hun kân kha tawl in au: chutileh, mi tam tak in manthai khawlaw ding a hiu.

²² Lalpa kiang nai ah hung thiamputele kisuthiangtho uh hen; achutiloleh, a chung un Lalpa lungnatna kuangjak mai ding ahi,” a tia.

²³ Mosi chun Lalpa kiang in, “Sinai tâng chung lam in mipite hung to thei pua’n au; nangma’n tâng kîmvêl ah hin gamgi bawl inla, hi’thiangtho in, ti’n thu lei pia ta’ngal in,” a tia.

²⁴ Lalpa’n a kiang in, “Chia suk inla, Aron hun pui to in; ahi’n, thiampute hileh, mipite le Lalpa kiang in a hung to lo hial diu ahi; achutiloleh a chung un gawtna tunsak ding ka hi,” a tia.

²⁵ Chutichun, Mosi chu mipite kiang in a chia suk ah, a kiang un a hil tai.