PAWTDAWNA THU 16 - PATHIAN LEKHABU THIANGTHO (BSI)

Manna leh Vavêng Piakna

¹ Israel mipite chu Elim ah kipat in a kipandok ua; chuleh, Israelte chu Aigupta gam ah kipat ah hung pawtdok ua kipat tha ni’na, a ni sawm leh nga tin ni chun Elim tawh Sinai kikâl ah um Sin gamthip a hung tung tau a.

² Gamthip ah chun Israel mipi zosia chu Mosi tawh Aron chung in a phun sau sau ziang tau a.

³ Israelte chun a kiang un, “Aigupta gam ah sabêl bul ah ka chut lai uh leh vaithum vâ tak ah ka nêk lai ua khan, Lalpa khut in ei la thi sak ta kha hizaw mai leh aw! Gamthip ah gilkial ah thi dingin mipite hi lei pui lût a hita hilam,” a tiu a.

⁴ Ziaphatchun, Lalpa chu Mosi kiang in, “Van ah kipat in vaithum hun zuksak ding ka hi: mi tin chu pawtdok in, a nisi’n nêkkhop ding bep uh a kiluak chiat ding uh ahi. Ka thupiak hi zui ding a hiu em zui lo ding ti, zia gual a hin patepna bawl ding ka hi.

⁵ Ni guk ni leh ni dang ah a luak khawm sâng ua ah le’ni a tam zaw in a luak khawm sek ding uh ahi,” a tia.

⁶ Chutichun, Mosi tawh Aron in Israel mipite zosia kiang ah chun, “Tu’ nitâk hileh Lalpa’n Aigupta gam ah kipat a hun puidok ahi dan tak hun he ding la hiu;

⁷ jingkal tak leh Lalpa lopi’na mu ding la hiu, Lalpa chung ah la phunchiakna teu chu ama’n a he ngal in; kei uh hi kua ka hiu ah, ka chung ua phunchiak la hiu em?” a tiu a.

⁸ Mosi chun, “Lalpa’n nitâk leh sa la nêk ding uh a hun piak ah, jingkal leh vaithum la vâ sêt uh a hun piak phat leh Lalpa’n a chung ah la phunchiaknau zosia chu a hia’i; kei uh hi bang ka hiu em? kei uh chung ah phunchiak la hi puau ah, Lalpa chung ah phunchiak la hi zawu hi,” a tia.

⁹ Ziaphatchun, Mosi chun Aron kiang in, “Israel mipite kiang in, Lalpa ma ah hin hung nai un, la phunchiakna teu ama’n a la he ta’ngal hen, vati’n,” a tia.

¹⁰ Aron in Israel mipite kiang in zia thu chu a gen lai tak in, mipite chun gamthip lam chu a en ua; tichun, Lalpa lopi’na sûmpi lakah chun a hung kilang tai.

¹¹ Lalpa chun Mosi a hun ho ah a kiang in:

¹² “Israelte phunchiakna chu ka het tak ziakin, a kiang un: nitâk khawthimbut phat leh sa ne’n la tiu in; jingkal phat leh vaithum ne ding la hiu; ziaphatchuleh, keima hi Lalpa la Pathian uh ka hi ti ei he ta’n lau,” a tia.

¹³ Nitâk a hung hi’phatin, Vavêng a hung leng ua, a giamun uh. Leitual a dâp suak hial ah; chuleh, jingkal a hung hi’phatin, a giaknau tuam ah chun daitui a thua thua in a la um ta mai a.

¹⁴ Daitui tam tak um chu a hung bei phatin, lei hul chung ah chun thillûm tik tek, lei tual ah chun daitui khal gual a vâm bim bem hi a um a.

¹⁵ Israelte’n zia chu a mu phât un, “Bang a hem?” ti’n a kidong tua sau sau tau a. Bang ahi he kuama a um puau a. Mosi’n a kiang un, “Zia hi Lalpa’n la nêk ding ua a hun piak vaithum chu ahi;

¹⁶ zia hi ahi Lalpa’n mi tin in la nêkkhop ding chiat uh, mi pakhat in Omer te’na dim khat chiat, a mi jat dungzui in luak unla, puan In ah la chênpiteu tawh la chankim chiat ding un luak un, ti ah thu a la piak kha,” a tia.

¹⁷ Tichun, Israelte’n a bawl chiat tau ah, khenkhat in tam deu a luak ua, khenkhat in tawm deu a luak ua.

¹⁸ Himaleh, Omer a hun te’phât un, a luak tampa chunle a vâl a nei tam diak puau ah, a luak tawmte chunle a tasam diak puau ah; mi tin in a nêkkhop ding chiat uh a kiluak khawm tau hi.

¹⁹ Chuleh, Mosi’n a kiang un, “Kuama’n jingkal tiang ah la khêk lo diu ahi,” a tia.

²⁰ Himaleh, Mosi thugen a ngaisak puau ah; khenkhat in a jingkal kit tiang ah dingin a la koikhêk ua, a hung than ah, a ui tai. Mosi a chung un a lungna ma ma a.

²¹ Jingkal si’n in mi tin in a nêk kham ding bep uh a kiluak ua; a dangte sia chu nisa a hung sat phatin a tuitha zo jel sek a.

²² Chun, a ni guk ni chun vaithum chu a le’ni ah tam, mi khat â ding ah Omer dim khat chiat a luak ua. Chuleh, mipite lak ah puitute zosia chu a hung khawm ua, Mosi a vahil tau a;

²³ ama’n a kiang un, “Zia hi Lalpa’n jing hi Lalpa â ding ah sabbath thiangtho chu ahi; la kan ding uh chu tu’ni hin kang unla, la huan ding uh chu tu’ni hin huan un: Chuleh, a bângkhâi cheng chu jingkal kit â dingin koihe un, ti thu a la piak kha ahi,” a tia.

²⁴ Tichun, amau inle Mosi gen gual chun a jingkal kit â dingin a khêk tau ah; tichun, a ui pua, a than le a um diak puai.

²⁵ Mosi’n, “Zia haw chu tu’ni hin neu in, tu’ni hi Lalpa sabbath ni ahi ngal in; tu’ni hin ziate hi leitual ah chun mulo ding la hi’ngal un:

²⁶ Ni guk sung chu luak sek in la tiu in, a ni sagi ni, sabbath ni ah chun vang luak ding khat chale umlo ding ahi,” a tia.

²⁷ A ni sagi ni chun mi khenkhat a luak dingin a kuandok ua; ahi’n, pakhat chale a vamu zo puau a.

²⁸ Lalpa chun Mosi kiang in, “Ka thupiakte leh ka dante hi bang chan a hem jawm lo ah la um ding uh?

²⁹ En in! Lalpa’n sabbath ni a hun pia tai; ziaziakchun, a ni guk ni hin ni ni â ding ah kidai vaithum a hun piak la hiu; mi tin la umnau mun chiat un umden mai unla, ni sagi ni ah hin kuama a umna mun ah kipat in pawtdok kiu hen,” a tia.

³⁰ Chutichun, mipite chu a ni sagi ni chun a chawl tau a.

³¹ Israelte zosia chun zia thil chu Manna a sak tau ah: tâtpâk gual ah vam thim leh khuaizu tawh kihel vaithum gual ahi.

³² Tichun, Mosi’n, “Zia hi Lalpa’n thu ei piak chu ahi: La khang khang ua um dingin Omer te’na dim khat lau inla, Aigupta gam ah kipat ka hun puidaw lai ah, gamthip ah ka hun vâkna vaithum chu la mu zing theina ding un koitup un, a tii,” a tia.

³³ Chuleh, Mosi chun Aron kiang in, “Leibêl khat hun la’n la, a sung ah chun Manna Omer te’na dim khat chu koi inla; zia chu Lalpa âng ah la suan zosia tiang ua um dingin la koi diu ahi,” a tia.

³⁴ Lalpa chun Mosi thu a piak dungzui ah chun Aron in thuthunna thingkuang ah chun a um zing dingin a koi tai.

³⁵ A chênna ding uh gam a hung tun masang siau Israelte’n kum sawmli sung hial chu Manna chu a neu ah; Kanaan gamgi bul a hung tun masang siau Manna chu a neu hi.

³⁶ Omer te’na khat chu Ephah te’na mun sawm ah khen ah mun khat tawh kibang ahi.