PAWTDAWNA THU 12 - PATHIAN LEKHABU THIANGTHO (BSI)

Chiakân Kût Patdokna

¹ Lalpa chun, Aigupta gam ah chun Mosi tawh Aron kiang in thu a gen a:

² “Zia Abib tha hi nang uh â ding ah kum khat sung ah tha masa pen, hi’ntin; zia chu nang uh â ding ah kumbul ah tha masa pen chu hi’n a.

³ Israel mipite kiang ah chun, zia tha ah ni sawm tin ni hileh amau Inkuan tin in belam pakhat chiat, Inkuan khat in belam pakhat chiat ladok uh hen la;

⁴ Inkuan khat, belam pakhat ne zo lo ding khop ah tawm a um chun, a Invêng nai pente kikopsak inla; mi tin in a nêkkhop ding chiat un belam pakhat chu la kihopsak ding ahi.

⁵ La belam tha diu chu demna umlo, a chaltuai, kum khat mi bep hi hen: belam hon lak leh kêl hon lakah kipat in la la’thei hi.

⁶ Zia tha ma ma, a ni sawm leh li tin ni tiang in la koi ding a hia; Israel mipite chun zia nitâk thimbut phat chuleh that uh hen.

⁷ A thisan them khat chu la’n, a sa a nêkna ding uh In kotkhak biang teni leh kot chung anu diu ahi.

⁸ Zia jan ma ma ah chun a sa chu mei ah hai min in, thawipanglo vaithum tawh, lokha tawh la nêk ding uh ahi.

⁹ A sahing a hem, tui ah huan min in a hem ne kiu inla; a lu, a keng leh a sungkua’te pum ah mei ah hai min in la nêk diu ahi.

¹⁰ Chuleh, a jingkal kit tiang ah chun a vâl la umsak lo diu a hia: jingkal tiang ah um nalai taphot chu mei in la hâltum ding uh ahi.

¹¹ Zia gual ah hin la ne diu ahi: la kawng uh gâksa, kengtaw butsa, khut ah tiangkhut chawisa’n, an chu kin tak ah la nêk diu ahi; zia hi Lalpa Chiakân Kût chu ahi.

¹² Zia jan hileh, Aigupta gam pumpi hung vâkvêl ding ka hi’n: tichun, Aigupta gam sung ah a piang masa pen, mihing hileh, gancha hitaleh hun that gam sik sek ding ka hi: chutichun, Aigupta gam ah pathian zosia hun gawt ding ka hi: Keima hi Lalpa chu ka hi.

¹³ Gan thisan chu nang uh â dingin la umna chiat ua tepte’na hi’n a: thisan chu ka hun mu phat leh nang uh hun chopkân ing ka tin; chuleh, Aiguptate ka soisak phat leh, nang uh hi’mangthai dingin la chung un hipi chu tung pua’n a,” a tia.

¹⁴ Zia ni hi nang uh â ding ah het zing ding hita’n a. La suanteu tiang ah Lalpa â ding ah Kût a la mat zing ding ua dan ah siam in, kumtuang ah Kût ah la mat diu ahi.

¹⁵ Ni sagi thawipanglo vaithum la nêk diu a hia; a ni masa pen ah chun la In ua kipat thawi la sukbei ding uh ahi: a ni masa pen ah kipat in a ni sagi ni tiang ah kuale thawi pang vaithum nekha tapo chu, zia mi ngei chu Israelte lak ah kipat nawdaw ding ahi ngal a.

¹⁶ A ni masa pen ah chun kikhopna thiangtho bawl in la tiu in; chuleh, a ni sagi ni chunle nang uh â dingin kikhopna thiangtho bawl in la tiu in; zia nite ah chun mi tin in a bawl lo ua phamaw, an bep chu la nethei ui; zia tilo chu thil dang him him la bawl lo diu ahi.

¹⁷ Zia ni ah hin la mipite Aigupta gam ah kipat in ka puidaw ziakin, thawipanglo vaithum in Kût la mat ding uh ahi: la khang zosiau in kumtuang ah la mat theina ding un dan ah la siam diu ahi.

¹⁸ Tha masa pen ah a ni sawm leh li nitâk lam ah kipat a ni sawmni leh khat tin ni nitâk lam tiang in thawipanglo vaithum la nêk ding uh ahi.

¹⁹ Ni sagi sung chu la In sung un thawi a umlo ding ahi; kuale thawi nekha a um khâk pal chun, zia mihing chu a gam ah chêngsa hileh, khual gam mi hiziang ta leh, Israel mipite lakah kipat naw mang ding ahi ngal a.

²⁰ Thawi panna him him bangma la nêk lo diu ahi; la chênnau mun zosia ah thawipanglo vaithum la nêk ding uh ahi, ti’n.

²¹ Ziaphatchun, Mosi chun Israel upate zosia a ko khawm ah a kiang un, “Chia unla, Inkuan tin in belam no pakhat chiat Chiakân Kût matna dingin kithâ un.

²² Husop lom khat la unla, kuang sung ah belam no thisan lak ah chun diau inla, la kotkhak chung leh kotbiang teni chu tât un; chuleh, jingkal masia ah In kotkhak kân ah kuama a pawtdok la umlo diu ahi.

²³ Lalpa chun Aiguptate sawisa dingin hung vâkvêl ding ahi ngal a; kot chung leh kotbiang ah thisan chu a mu phat leh, Lalpa’n zia In chu chiakân intin, nang uh himangthai dingin mi himangthaipa chu la In sung ua hung lutsak lo ding ahi.

²⁴ Zia thil hi nang uh leh la chateu â ding ah dan gual in la mat zing ding uh ahi.

²⁵ Chuleh, Lalpa’n a hun tiampiakna gam chu la hung lut phat ua leh le, zia la thil nit uh hi la zui zing diu ahi.

²⁶ Chuleh, la chateu in, ‘Zia thil hi bang ding ah I bawl sek uh a hem?’ ti ah a hun dot phat ua leh,

²⁷ ‘Zia hi Aigupta mite a thâ lai ah ei uh Aigupta gam ah um Israelte In chopkânpa Lalpa Chiakân Kût kithoina chu ahi,’ la ti ding uh ahi,” a tia. Chutichun, mipite chun a luchang uh kûn chiat in a ho tau hi.

²⁸ Israel upate chu a chiau ah, Lalpa chun Mosi tawh Aron thu a piak dungzui in a vabawl tau hi.

Gawtna Sawmna: Cha Upa pen Tha’na

²⁹ Jankim lai tak in Lalpa chun Aigupta gam pumpi cha upa pen zosia, lalchutpha ah chu Pharaoh chapa upa pen ah kipat suangkul mun thim ah umpa chapa upa pen tiang leh gancha suak masa pen zosia tiang in a hun that gam ta’n.

³⁰ Pharaoh tawh, a miliante tawh Aigupta mite zosia chu jankhang lai tak in a hung thodok tau a; Aigupta gam pumpi’n kâ thawm nasa tak a um tai: mithi umlo’na Inkuan pakhat chale a um paw ngal a.

³¹ Ziaphatchun, Pharaoh chun Mosi tawh Aron chu a jan a jan in a ko ah, a kiang un: “Kipan unla, ka gam ua kipat hin nang uh tawh Israel mipi zosia hi pawtdok un. Chia unla, la gen gual ua khan Lalpa chu vaho tau in.

³² La gen gual uh khan la belam honteu tawh, la bawng honteu tawh, la gan-gual zosiau le puidok in chiamang tau in. Chuleh, kei â dinginle maljawlna ei dot piak un,” a tia.

Israelte Pawtdawna: Rameses ah Kipat Sukkoth Tunna

³³ Amau chu a gam ua kipat kin tak ah sawldok nuam in Aigupta mite zosia chu a kinaw ma mau ah, “I bawn ua I thigam masang un,” a tiu a.

³⁴ Tichun, a vaithumteu chule thawisaw man lo in, a vaithum nêknau kuangte tawh puan ah chûn khawm in, a liangko un a puau a.

³⁵ Israelte chun Mosi hil gual in a bawl tau a: Aigupta mite sana leh dangka kicheina vante leh puante chu a la don ua;

³⁶ tichun, Lalpa’n mipite chu Aigupta mite mit mu in doisakna a nei sak ah; chutichun, a dot taphot uh chu a phal piaksak tai. Zia gual ah chun Aiguptate chu a suam gam tau a.

³⁷ Israelte chu Rameses ah kipat in Sukkoth a zuan ua; a mau chu naupang sim lo in, ama keng ah chia thei ngen chu mihing nuai guk vêl a hiu a.

³⁸ Mi chuam chuam inle amau chu a zui ua; gancha hon tam tak tawh, belamhon tawh kêlcha honle tam tak a hiu a.

³⁹ Aigupta gam ah kipat a hun puakdaw uh thawipanglo changbuangte ah chun vaithum a hun siam ua; amau chu a nop chan chan uh châm thei talo ah Aigupta gam ah kipat del daw ahi tak ziak un, a nêk ding uh le bangma a kibawl khol man ta puau a.

⁴⁰ Aigupta gam ah Israelte châm sung chu kum za li leh sawmthum ahi.

⁴¹ Kum za li leh sawmthum a ti’n ni ma ma ah chun, Lalpa’n a mite zosia Aigupta gam ah kipat in a hun puidok tai.

⁴² Zia jan chu Aigupta gam ah kipat amau a puidawna ding ah Lalpa â ding ah janha jan chu ahi, zia jan chu Israelte zosia’n a suan zosiau tiang un Lalpa â ding ah a janha ding uh ahi.

Chiakân Kût Bawl Ding Dan

⁴³ Lalpa chun Mosi tawh Aron kiang in, “Zia hi Chiakân Kût la bawl ding dan uh thuthung chu ahi: Malzin mêlhet lo in a nêk lo him him ding ahi.

⁴⁴ Ahi’n, suak kichaw hiziang leh le a zek a tan phot chun nethei in a.

⁴⁵ Gamdang mi, sum thalaw hileh, thagawi thawte chun a nêk lo ding uh ahi.

⁴⁶ In pakhat sung ah la nêk ding uh a hia; a sa them khat ziang le In pawlam ah la lakdaw lo ua; a gu pakhat chale la sukbawt lo ding uh ahi.

⁴⁷ Israel mipi zosia’n zia hi la mat ding uh ahi.

⁴⁸ La In ah malzin kua a hem khat in zia Lalpa Chiakân Kût luaithe’na hi a pannop chun, pawsal taphot in a zek a tan diu ahi; ziaphat chuleh, hun nai in, luaithe’na chun pang ngal hen: A gam sung mite lak ah pakhat ah simkhawm hi’ngal in a. Himaleh, zektanlo in chu a nêk lo diu ahi.

⁴⁹ Khawtual mi hitaleh, la lak ua malzin hung umte â dingin dan pakhat kibang la zui diu ahi,” a tia.

⁵⁰ Israelte zosia chun Lalpa’n Mosi tawh Aron thu a piak gual ua chun a bawl chiat tau a.

⁵¹ Zia nikhua ma ma chun Lalpa chun Aigupta gam ah kipat in Israelte chu a hon hon in a hun puidok ta ahi.