PAWTDAWNA THU 1 - PATHIAN LEKHABU THIANGTHO (BSI)

Aigupta Gam ah Israelte

¹ A Inkuan dungzui ua Jakob tawh Aigupta ah hung pêm lut, Israel chate min chu ziate hi a hiu ah:

² Reuben, Simeon, Levi tawh Judah,

³ Issakhar, Zebulun tawh Benjamin,

⁴ Dan tawh Naphtali, Gad tawh Asher a hiu a.

⁵ Jakob khâlbe ah piang zosia chu sawmsagi a hiu a. Joseph ahileh Aigupta gam in a la umsa ahi tai.

⁶ Chuleh, Joseph a thi ta’n; a suapite zosia tawh amau khang ah mi zosia chule a thi suak tau a.

⁷ Himaleh, Israel suante chu a chi pha ma ma in a pung ma mau ah, a hung hat ma ma tau hi; tichun, gam pumpi a hun lua suak tau hi.

Israelte Sukgenthei ah A Hung Umnau

⁸ Zia hun ah chun, Aigupta gam ah chun Joseph he’phalo Leng thak pakhat a hung um ta’n.

⁹ Ama chun a mipite kiang in, “En tiam u, Israelte hi ei haw sâng ah tam zaw, lau um zaw leh hat zaw hial in a hung um tau a;

¹⁰ hung unla, dan thiam tak in bawl hitiu; achutiloleh, hung pung nalai intiu in, kidona khat hung um leh I mêlmateu lam ah hung pang in, ei hun ledo in, ziazaw chuleh I gam ua kipat jamdok kha’n au,” a ti ta’n.

¹¹ Chutichun, puakgik tak tak puaksak ah, amau haw tawden theina dingin a chung un a nasepnau enkoltu ding a guat piak chiat tau a. Amau chun Pharaoh van koikhawmna ding khawpi Pithom tawh Rameses a bawl piak tau a.

¹² Himaleh, sukgenthei ah a um phot uh leh a pung zaw diak un, a lua lian zaw diak mai un; tichun, Israelte chu Aiguptate lau thei ding khop in a hung pung tau a.

¹³ Aiguptate chun Israelte chu na gim zaw sêm ah sepsak in, a engbawl ma ma ziang tau a,

¹⁴ chêktang leh chêkchâlna ding siam in, lou ah na jat chuam chuam gim tak ah sepsak in, a hinkhuau chu a hihaksa ma ma ziang tau a. A nasep zosiau ah chun lungsiatna bei in sepsak in a um tau hi.

¹⁵ Ziaphatchun, Aigupta lengpa chun Hebrai naulaidomte lak ah Shiphrah tawh Puah-te kiang in;

¹⁶ “Hebrai numeite naudom ah la pan phat uh leh, nauneina dawkan ah um chu vak en unla, pawsal ahileh that ziang unla, numei ahileh la hoi bep diu ahi,” a tia.

¹⁷ Himaleh, naulaidomte chun Pathian a lau un; Aigupta lengpa thupiak gual ah bawl lo in, pawsal nausente chule a la hinghoi sek un.

¹⁸ Tichun, Aigupta lengpa chun naudomte chu a ko khawm ah, a kiang un, “Bang ding ah zia gual ah hi bawl ah, pawsal nausente hawi sek la hiu em?” a tia.

¹⁹ Naudomte chun Pharaoh kiang in, “Hebrai numeite hi Aigupta numeite gual ahi puau hi; amau chu a thau a hat ah, naulaidomte ka tun masang un a la suak zo ziang sek ui,” a tiu a.

²⁰ Tichun, Pathian in naulaidomte chu pha tak in a bawl a, mipite chu a hung pung un, a hat deu deu ziang tau a.

²¹ Naulaidomte’n Pathian a lau ziak un, Pathian in pha tak in a bawl ah, a Inkuan ding uh le a siam piak ta’n.

²² Ziaphatchun, Pharaoh in a mipite kiang in, “Hebrai mite chapa zosia chu Nail luipi ah la pai lut sik sek diu ahi, numeite bep la hawi ding uh ahi,” ti’n thu a pia tai.