NEHEMIAH 4 - PATHIAN LEKHABU THIANGTHO (BSI)

Mêlmate Thepna Lawsam

¹ Sanballat in kulbâng ka siam ui ti a hun het phat in, lungna ma ma in, a hachang a thak tun tun ta mai ah; tichun, Judate chu a êng êng in ei ho tai.

² A lawite tawh Samaria sepaite umna chun zia gual hin thu a gen a: “Zia Juda mi jawngkhalte hin bang bawl a hita get awm? A sia zosia hi siampha kit zo ding kisa a hiu em? Kithoina lân kit ding ahi na diam uh maw? Ni khat sung in a sa zo diam uh? Ki’dak kisung khawm lak ah kipat suang kihâlsiate haw hi chom khawm ah tundin kit kinem ahi diam uh?” ti in.

³ A kiang ah Ammon mi Tobiah chunle, “Vak sa po po leu, si-al inle a suang bâng tiankhawmteu chu chuan chim ta ven ti!” ti’n a gen a.

⁴ Aw ka Pathian uh ngai tiam in, musit in ka um ta’ngâl un; ei gensiatnau hi amau luchung ah kile’kitsak inla, amau hile khoilam a hem khat ah mualpho tak in sal ah tânsak in.

⁵ A bawlkhialnau khû mang kin la, la mit mu in a gitlonau chu thaimang piak him him kin; kulbâng sate a maichang un a sumualpho tau in, ti’n ka pauchap tai.

⁶ Tichun, kulbâng chu ka sa pan tau a; mipite chun nasep thatnopna gil tak a nei ziak un, kulbâng sândan kimkhat tiang chu ka zawpmat suak tau hi.

⁷ Himaleh, Sanballat, Tobiah leh Arabte, Ammonte leh Ashdod mite chun, Jerusalem kulbâng chu ka siampha jel ui ti leh, a siatnate chu bawlpha zo ding ka hitau hi ti a hun het phat un, a lung na ma ma ziang tau a;

⁸ tichun, a leng ua pang khawm ah Jerusalem hung do ah, sukbuai ding dan ngen chu a ngaitua tau a.

⁹ Tichun, ka Pathian kiang in ka pauchap un; chuleh, a sûn a jan ah gâlveng ding ka koi tau hi.

¹⁰ Himaleh, Judah phung ah mite chun, “Puakgik pawte tha a chau ta’n, ki’dak buaksia a tam bêk ziakin, kulbâng ka bawl thei ta puau hi,” a tiu a.

¹¹ Chuleh, ka mêlmateu in, “A lak ua I chiau ah, I thalup ua, a nasep uh I cholsak hial masang siau bangma hepua’n tin uh, mu le mu diak lo ding a hiu,” ei tiu a.

¹² A kiangnai ua chêng Judai gam ah mite chu a hung ua, a vêl a vêl in, “A chênnau mun chiat ah kipat hung kuandok in, ei haw ei hung do ding a hiu,” ti ei hung hil tau a.

¹³ Tichun, kulbâng nung lam ah, a niamna pen pente, mun thawvenna vêl ah chun mipite chu a Inkuan kuan ah, chemjamte, cheichate leh a thalpiteu tawh kithuam chiat ah um dingin ka koi tai.

¹⁴ Thil umdante chu ka etchian nung in, ka dingdok ah, miliante, vaihawm mite leh mipi zosia kiang ah chun, “Amau lawi chu lau him him kiu in. Lalpa a lopi dan leh a lau um dante chu hezing un; la chanauteu, la chapateu, la chanuteu, la jiteu leh la Inteu hûk dingin gâl chu do un,” ti’n ka gen a.

¹⁵ Ka mêlmateu in a thugêl uh ka he tau hi ti leh, Pathian in bangmalo a sua tai ti a hetchian phat un, mi tin in ka nasepna mun chiat uh zuan in, kulbâng chu ka bawl kit tau a.

¹⁶ Zia ni kipat chun, ka nasêmte lak ah a kimkhat in na chu a sêm un, a kimkhatte chu cheicha, phawte, thalpite leh thik puanâkte’n a kithuam ua; chuleh, puitute chu Judate Inkuan kulbâng bawl zosiate nung ah chun a pang chiat tau a.

¹⁷ Kulbâng siamna ding matchâk van-gik pawte chunle, a khut langkhat ua na sêmzing kawm in, a khut langkhat un gâlvan a chawi chiat tau a.

¹⁸ Insate chunle a kawng ua chemjam vopzing kawm in na a sêm ua. Pengkul mûtpa chule ka kiang in a umzing hi.

¹⁹ Chuleh, miliante, vaihawmte leh mipi dang zosiate kiangah chun, “Nasep a thupi in, a lua lian ma ma hi; I kulbâng bawlnau kikâk tak tak ah um I hiu a;

²⁰ pengkul git la het phat phat ua leh ei hun del ziang un. I Pathian un gâl ei do piak ding ahi,” ti’n ka hil a.

²¹ Tichun, na chu ka sêmjel tau ah; a lak ua a kimkhatte chun, jingkal phalvak ah kipat nitâk aksi hung kilat tiang in a cheichateu chu tha’suak lo in a pang zing mai tau hi.

²² Zia hun ah chun, mipite kiang inle zia gual hin ka gen a: “Mi tin chu a suakteu tawh jan si’n leh Jerusalem ah giak uh hen; chutileh, jan si’n leh gâlveng ah pang hi’ngâl, sûn si’n leh nasêm ah pang ziang thei dingin,” ti in.

²³ Tichun, kei hi’n, ka suapite hi’n, ka suakteu hileh, ei zui ah gâlvêngte hi ziangleu le, kuama a puanteu suttha man umlo in, mi zosia’n ka khut changlam chiat un gâlvan chawi in ka pang zing tau hi.