NEHEMIAH 2 - PATHIAN LEKHABU THIANGTHO (BSI)

Judai Gam ah Nehemiah Sawl ahi

¹ Lengpa Artaxerxes lal kum sawmni’na, Nisân tha ah chun a zudawn hun a tun phatin, a zudawn ding chu chawi in lengpa kiang in ka hang pia ta’n. Tu’ma’n a kiang in ka lungngaina mêl ka latsak kha ngai pua’n.

² Ziaphatchun, lengpa’n ka kiang in, “Bang ding ah lungngai mêl pu la hem, damlo le la hi sam pua’n? La lungngai ziak ahi,” ei tia. Ziaphatchun, ka lau ta ma ma ziang a.

³ Lengpa kiang ah chun, “Lengpa, damsawt in! Ka pu leh pate thân umna khawpi sukchimit leh, a khawpi kul kotkhakte hâl tum ah um ta mai chu bang ding ah lungngai mêlpu lo thei ding ka hem?” ti’n ka dawnhu tai.

⁴ Ziaphatchun, lengpa’n ka kiang in, “Bang la dawi em leh?” ti’n ei dong a. Kei le van Pathian kiang in ka pauchap ta mai a.

⁵ Lengpa kiang in, “Lengpa lung lam ahi ah, la suakpa hin lengpa lung ka tuak ahi chun, ka pu leh pate thân umna khawpi ka vabawlphat kit theina dingin, Judai gam ah ei sawl lechin ka nuam hi,” ti’n ka don tai.

⁶ (Lengnu a kiangah a kichut lai tak in,) Lengpa chun ei hun dawnhu ah, “Bang chan vaum ah, bangtik leh la hung kit thei diam?” ti’n ei dong a. Tichun, lengpa’n ka chia ding chu lem a sa ta’n, a hun ding chu ka guat tai.

⁷ Ziaphatchun, lengpa kiang in, “Lengpa’n lem lasak ahi chun, Luipi gâl lam ah gam awpte’n Judai gam ka tun masang sia ei la phalna ding un lekha le ei zik piak inla;

⁸ chuleh, lengpa gammâng vêngpa Asaph in tempul kotpi bawlna ding, a khawpi kulbâng ding leh ka lua ding Insakna dingte hi thing ei pia ding in lekha ei zik piak in,” ti’n ka don a. Tichun, ka Pathian doisakna ka chung ah a um ziakin, lengpa chun ka thil dotte chu ei bawl piak tai.

⁹ Tichun, Luipi gâl lam ka hung tun phatin, gam awpte kiang in lengpa lekha zik haw chu ka pia ta’n. Lengpa chun sepai hotute leh sakol sepaite ei zuisak a.

¹⁰ Horon mi Sanballat leh milian Ammon mi Tobiah in zia thu chu a la het phat un, Israelte phatna ding ngaitua mi hung a hiu ti a het ziak un, a la lungna ma ma ziang tau a.

Nehemiah in Kulbâng A Etchianna

¹¹ Jerusalem chu ka hung tung ta’n, ni thum sung ka nichuang phot a.

¹² Chuleh, jan in ka thodok ah, kei tawh midang tawmcha ka hiu a; Jerusalem khawpi â ding ah ka bawl ding ah ka Pathian in ka lunggil ah a koite chu kuama kiang in ka hil pua’n, a chung ah ka chuanna sa ti lo chu sa dang him himle ka pui puai.

¹³ Jan ah chun Phâiguam Kotpi ah pawtdok in Gulpi Tuinâk lam haw in, Buaksia kotpi tiang in ka chia a; Jerusalem kulbâng siat dan leh a kotpite mei in a kâttumte chu ka endik tai.

¹⁴ Chuleh, Tuinâk Kotpi leh Lengpa Dil tiang in ka chia ah; zia khêllam chu ka chuanna sa nasan le a chia theng thei ta puai.

¹⁵ Tichun, jan kâl ah chun Phâiguam zotna lampi chu man to in, kulbâng chu ka enchian ah. Chuleh, hung kile’kit in, Phâiguam Kotpi ah lut in ka hung kit tai.

¹⁶ Vaihawmte chun khoilam ah chia ah, bang vabawl ka hem ti le a hepuau hi; ke’n le Judate, thiampute, miliante, vaihawmte leh midangte kiangah chun, bang bawl gua ka hile ka hil nai puai.

Kulbâng Tundin Kit Guatna

¹⁷ Ziaphatchun, a kiang un, “Jerusalem khua a sesa a um ziak leh, a kotpite mei in a hâl siat ziakah bang gual tuk ah buaina tuak I hitau em ti la hechiat ui. Hung un, simmaw ah I um tâklo’na ding un, Jerusalem kulbâng hi siampha kit hitiu,” ti’n ka gen a.

¹⁸ Chuleh, ka Pathian ei doisakna thute leh lengpa’n ka kiangah thu ei gente khale ka hil tai. Ziaphatchun, amau in, “Bawl pan ngâl hitiu!” a ti tau a. Mipi phatna ding ah na chu sêm dingin a kipan tau a.

¹⁹ Himaleh, Horon mi Sanballat, Ammon mi vaihawmpa Tobiah tawh Arab mi Geshem in a hun het phat un, ei nuisan in ei engho tau a, “Bang bawl la hiu em? Lengpa do ding ah kisa la hiu maw?” a hung tiu a.

²⁰ Tichun, amau chu zia gual hin ka dawnhu a: “Van Pathian in ei lawtinsak ding ahiziak in, kei haw a suakte hin zia In hi sa pan ding ka hiu; nanghaw’n vang zia Jerusalem khua hin chanvo hileh, thuneina hileh khutnung bangma la nei puau hi,” ti in.