NEHEMIAH 13 - PATHIAN LEKHABU THIANGTHO (BSI)

Israelte Lak ah Kipat Khenthâk ah Um Gam Dang Mite Chu

¹ Zia ni chun Mosi Lekhabu chu mipite het in a simdok un; Pathian mite kikhopna him him ah chun Ammon mite leh Moab mite chu bangtik lai inle a pan lo diu ahi, ti thu kizik chu a simdok tau a.

² Amau in Israelte kha vaithum leh tuisik ziang ah le a la lamtua lo mai uh hilo in, Israelte chu hânsia law ding ah Balaam a la chial tâk ziak un; himaleh, I Pathian un hânsia chu maljawlna a la chansak ta zaw’n ahi.

³ Dan thu chu a ngaithâk phat un, Israelte lak ah kipat chun gamdang mi zosia chu a koichuam tau a.

Nehemiah in Dan A Puaphatna

⁴ Tu’ma lam ah khan, I Pathian In ua pindante ah mawpua thiampu Eliashib, Tobiah tawh kithoina nei chun,

⁵ Levite leh La sa pawlte leh kotkhak vêngtute leh thiampute â ding ah thawlawm bu, gimtui, ûm leh bêl, sawm ah khat bute uain leh sathau a la koikhawm seknau pindan lian tak chu Tobiah a la luasak ta’n.

⁶ Babulon Lengpa Artaxerxes lal kum sawmthum leh ni’na chun, Lengpa kiang ah ka vachia ziakin, zia hun lai ah chun Jerusalem khua’n ka la um pua’n. Chomkhat zaw in, lengpa kiang ah pawtdaw phalna ka la’n,

⁷ Jerusalem lam in ka hung kile’kit tai. Ziaphatchun, Eliashib in diklo tak ah Pathian In huang sung ah Tobiah mun a la piak chu ka hun mudok ta’n.

⁸ Zia thil chun ei sulungna ma ma ziang ah; tichun, pindan sung ah kipat chun Tobiah In sung van zosia chu ka paidok sik sek tai.

⁹ Ziaphatchun, pindante chu suthiangtho in, Pathian In ah matchâk ûm leh bêlte, thâilat thilte leh gimtuite chu ka lâklutsak kit tai.

¹⁰ Zia lo ah chun, Levite mun kipiak lo ziak ah, Levite, La sa pawlte, biakna hun ah puitute a lou mun lam chiat ua a la kile’kit zo tate chule ka he tai.

¹¹ Tichun, gam vaihawmte chu ka kinakpi ah, a kiang un, “Bang ding ah Pathian In a la limsak lo la hiu em?” ka ti’n. Tichun, a leng un ka ko khawm ah, a mun ding chiat un ka koi kit tai.

¹² Ziaphatchun, Judah mite zosia’n a buu, uain leh sathauteu lak ah sawm ah khat haw chu a koikhawmna pindan ah chun a hun chawi khawm tau a.

¹³ Chuleh, thawlawm koikhawmnate enkol dingin thiampu Shelemiah, lekhazikpa Zadok tawh Levite lak ah Pedaiah cheng hi ka guat ah; amau kithuapi dingin Mattaniah tupa Zakkur chapa Hanan chu ka koi ah, amau hi ginum ah kigen a hiziak un; a mawpuaknau chu a seppiteu kiang ah thil hawmdaw ahi.

¹⁴ Aw ka Pathian, ka Pathian In leh a sung ah nasepna â ding ah ka thilbawl phat hi hezing inla, nuaimang ziang kin.

Sabbath Ni Matdan Siamphat Kitna

¹⁵ Zia lai ah chun, Judate gam ah kuate a hiu em sabbath ni’ uain chil leh buphalte sabiltung puak ding ah hun siamte ka mu’n; chuleh, sabbath ni Jerusalem khua zu, grep, theichangga leh van-gik hun pawlutte le a um un; chuleh, amau chu zia hun ah chu nêkthei chi him him zuak lo dingin ka vauhil a.

¹⁶ Tura mite, khawpi sung ah chêngte chunle sanga leh zok thei chitin hun paw lut in, Judah mite leh Jerusalem khua mite kiang in sabbath ni chun a zuak sek un.

¹⁷ Ziaphatchun, Judah miliante chu ka hosia a kiang un, “Bang ding ah sabbath ni subuak ding ah zia gual thil hi la bawlsak uh a hem?

¹⁸ I pu leh pateu in zia gual hi a la bawl ziak ua, I Pathian un ei haw leh zia khawpi chung ah siatna hi a la tunsak hilo a hem? Chutisapi’nle, sabbath ni subuak in Israelte chung ah lungnatna a khawk zaw diak la hun tunsak tau ahi hi,” ti’n ka gen a.

¹⁹ Sabbath ni a tun ding kuan ah nitâk khua a ngui ah kipat in, Jerusalem kotpite chu khâk ah, sabbath ni a bei masia hong kit talo dingin thu ka pia tai. Chuleh, sabbath ni kuama’n bangma a hun puaklut lona ding ah dâl dingin ka suakte lak ah khenkhat kul kotkhak vêng dingin ka koi a.

²⁰ Zia kipat chun, sumkawlveite leh van chitin zuak sekte chu, Jerusalem khaw pawlam in khatvei a hem, nivei a hem a giak khawlaw tau a.

²¹ Himaleh, amau vauhilna’n a kiang un, “Bang ding ah kulbâng paw lam ah hung giak veu sek la hiu em? La hung giak kit ua leh vang la chung un khut tha ding ka hi,” ti’n ka gen a. Zia ni’ kipat chun, sabbath ni’n kuama a hung ta puau hi.

²² Chun, Levite chu amau kisuthiangtho ah hung khawm ding leh sabbath ni a thianthona ding ah kul kotkhakte chu vêng bit dingin thu ka pia tai. Aw ka Pathian, zia chungchâng thu ah hin ei hezing in la, la ja’ngaina let dungzui in ei hawi in.

Mi dang Tawh Kichenpol Demna

²³ Zia hun ah chun, Judah mite lak ah mi khenkhat, Ashdod, Ammon leh Moab numeite ji nei lawi a um ui ti ka hia’n;

²⁴ a chapateu lak ah a kimkhat zet in Ashdod pau thaw in, Judah mite pau a thawthei ta puau ah; chidang dangte pau a thaw ta mai un.

²⁵ Amau ka kinakpi tawh, ka hânkhum tawh, a khenkhat ka jep ah, khenkhatte chu a sam nasan uh ka baw piak ah; ziate chu Pathian min in zia gual gen hin ka kihaksial sak ah: “A chapateu ji dingin a chanuteu pekiu inla, a chanuteu le la chapateu leh nanghaw ji dingin la kiu in.

²⁶ Israelte Lengpa Solomon khan le zia gual ah numeite ziak ah gitlona hi a bawl kha ta hilo a hem? Nam tam takte lak ah ama gual ah Leng hi a la um kha pua’n, ama chu Pathian doisakna a la chang in, Israelte zosia chung ah Leng hiding in Pathian in a la siam ta ahi kha; himaleh, nam dang numeite’n ama nasan le gitlona’n a pûk lutsak tau ahi.

²⁷ Ahileh, gam dang mi ji nei ah, I Pathian chung ah thil phalo tak mai bawl dingin nang uh umchan zui ding ka hiu em?” ti in.

²⁸ Chun, Horon mi Sanballat chanu pawsal, thiampu lianpen Eliashib cha Jehoiada chapate lakah pakhat chu, ka kiang ah kipat in ka nawdok tai.

²⁹ Aw ka Pathian, amau in thiampute leh Levite thuthung bawtsia’n, thiampu dan a sukbuak uh hi hezing in.

³⁰ Tichun, amau haw chu gam dang thil zosia lakah kipat suthiang in, thiampute leh Levite a mawpuakna ding chiat leh a nasep ding chiat uh ka guat piak ta’n;

³¹ tichun, a hunbî dungzui ah thawlawm thing ding leh gamasa thillat dingte chule ka se piak tai. Aw Pathian, ka phatna hi hezing ta’n.