NEHEMIAH 10 - PATHIAN LEKHABU THIANGTHO (BSI)

Thuthung Ah Suai Namte Chu

¹ Zia thuthung kisiam ah suai namte lakah chun Hakaliah chapa Nehemiah, gam awppa tawh Zedekiah;

² Seraiah, Azariah, Jeremiah,

³ Pashhur, Amariah, Malkhijah,

⁴ Hattush, Shebaniah, Mallukh,

⁵ Harim, Meremoth, Obadiah,

⁶ Danial, Ginnethon, Barukh,

⁷ Meshullam, Abijah, Mijamin,

⁸ Maaziah, Bilgai leh Shemaiah cheng hi thiampute lak ah mi a hiu a.

⁹ Levite lak ah mite chu: Azariah chapa Jeshua, Henadad chate lakah Binnui tawh Kadmiel;

¹⁰ a gualteu Shebaniah, Hodiah, Kelita, Pelaiah, Hanan,

¹¹ Mika, Rehob, Hashabiah,

¹² Zakkur, Sherebiah, Shebaniah,

¹³ Hodiah, Bani tawh Beninu cheng hi a hiu a.

¹⁴ Mipi lak ah hotute lak in: Parosh, Pahath-moab, Elam, Zattu, Bani,

¹⁵ Bunni, Azgad, Bebai,

¹⁶ Adonijah, Bigvai, Adin,

¹⁷ Ater, Hezekiah, Azzur,

¹⁸ Hodiah, Hashum, Bezai,

¹⁹ Hariph, Anathoth, Nebai,

²⁰ Magpiash, Meshullam, Hezir,

²¹ Meshezabel, Zadok, Jaddua,

²² Pelatiah, Hanan, Anaiah,

²³ Hoshea, Hananiah, Hasshub,

²⁴ Hallohesh, Pilha, Shobek,

²⁵ Rehum, Hashabnah, Maaseiah,

²⁶ Ahiah, Hanan, Anan,

²⁷ Mallukh, Harim leh Baanah cheng a hiu hi.

²⁸ Mipi a dang cheng tawh, thiampute, Levite, kul kotkhak vêngtute, Lasatute, tempul ah suak nasêmte tawh Pathian dan zawm gua, a gam sung ah mite lakah kikoikâng zosia tawh, a jiteu, a chapateu, a chanuteu leh hetna leh hiatthiamna nei zosia’n,

²⁹ a unauteu leh a milianteu hun zawm in, Pathian dan, Pathian suak Mosi’n a piakte, I Lalpau thupiakte zawm ah, Lalpa thuguatte leh a vaihawmna dante chu vop ah zui dingin kitiamna chun a pang tau a.

³⁰ Ka chanuteu chu zia gam ah mite ji ding leh a chanuteu chule ka chapateu ji dingin la pua’ng ka tiu in;

³¹ chuleh, zia gam ah mite hin sabbath ni ah van leh nekthei a hung zok unle, sabbath ni leh nizek thiangtho ah chun chaw him him pua’ng ka tiu in; chuleh, kum sagi’na si’n leh lou ah thâi chîng lo in, leiba zosia le beng lo dingin a kihaksial tau a.

³² Chun, ka Pathian In ua nasepna matchâk dingin kum si’n leh shekel khat mun thum ah khen a mun khat pia zing dinginle ka kitiam tau a.

³³ Ka Pathian In ua nasepna chi chuam chuam: Vaithum zek thiangtho, nisi’n thâiga thillat, hâlmang thillat ding gancha, sabbath kûtte, thawlawm bî neite leh Israel mipite â ding ah gitlo thoina ding ah matchâk dingte ahi.

³⁴ Chuleh, thiampute, Levite leh mipi zosiate lakah chun, dan dungzui ah Lalpa ka Pathian uh mâichâm ah, a kum a kum ah, a hunbî guat ah, Pathian In ah mat ding, thawlawm thing hun paw ding haw, a phung dungzui ua hun paw dingte hettheina dingin âi ka sân tau a.

³⁵ Lalpa In ah kum si’n ah lou thâiga masa pente, thing tin ga zosia lakah a ga masa pen chiat pia ding in ka kitiam tau a:

³⁶ Chuleh, dan ah a la kizik dungzui ah, ka chapa masa penteu leh gan gual lak ah masa pente chu I Pathian In ua nasêm thiampute kiang ah piak ding leh, bawng hon leh belam hon lak ah piang masa pente le piak dinginle ka kitiam un;

³⁷ chuleh, ka changbuang mêkteu lak ah masa pen leh ka thawlawmteu, ka thingga masa penteu, uain leh sathauteu le thiampute kiang ah, ka Pathian uh In pindan ah hun chawi ding leh, ka lei gateu sawm ah khat Levite kiang ah hun pia ding in ka kitiam tau ah; Levite chu khawneu ah sawm ah khat zosia lakhawm ah pang ahi him ziak un.

³⁸ Aron cha thiampute chu, Levite’n sawm ah khat a lâk khawm tak ua leh, Levite kiang ah chu a umzing diu ahi; chuleh, sawm ah khat lak ah a sawm ah khat ma ma chu Levite chun I Pathian uh In ah, bu In ah chun a hun sun khawm kit diu ahi.

³⁹ Israel mipite leh Levi chate zosia chun a bu leh balteu, a uain leh sathauteu chu thawlawm siakhawmna mun, mun thiangtho matchâk ûm leh bêl, thiampute nasepna mun, kotkhak ngâkte leh La sa mite umna mun ah chun, a hun choi khawm diu ahi. I Pathian In uh chu I ngaitam lo diu ahi.