NEHEMIAH 1 - PATHIAN LEKHABU THIANGTHO (BSI)

A Mipite â Ding ah Nehemiah Pauchapna

¹ Hakaliah chapa Nehemiah thugente chu: Kum sawmni a tin kum, Chislev tha ah Susa khawpi ah ka um lai in,

² ka suapite lak ah mi pakhat, Hanani chu Judah gam ah kipat kuate a hem tawh a hung un; saltânna pang lo ah suakcha Judate leh Jerusalem chungchâng thu bang gual ahi em ti ka dong a.

³ Amau chun, “Saltâng lo ah suakcha, zia gam ah um nalaite chu haksa tak leh mualpho tak in a um un; Jerusalem kulbâng chu suksiat dim dem ahi’n, a kotpite chule hâl tum ahi tai,” ti’n ei dawnhuu a.

⁴ Zia thute chu ka het phat in, ka chu suk ah, ka kap ta’n; chuleh, ni bang jat a hem sung ka sûn ah, van Pathian kiang ah anngawl in ka pauchap tai.

⁵ Zia gual hin ka pauchap ah: “Aw Lalpa, van Pathian, Nang Pathian lopi leh ja’um, la thupiakte zuiah a hun ngainate chung ah la thuthung hezing leh ja’ngaina neipa;

⁶ la suak Israel mipite â dingah keima la suakpa, a sûn a jan ah la kiang ah ka pauchapna hi ei la ngaitha’n la, ei hun en tiam in; la mipi Israelte hin la chung ah ka la gitlonau thupha ka hun chawi hi. Keima leh ka Inkuante hin ka la bawl khial zo tau a hi.

⁷ La suak Mosi kiang ah la thupiakte, la dante leh la vaihawmna dante kha a la bawtsia’n, huaisia tak in la chung in ka la bawl khial zo tau a.

⁸ La suak Mosi kiang ah la thupiak, ‘La ginumlo ua leh namtin lak ah hun thejak ing ka tin;

⁹ ahi’n la, ka kiang lam ah la hung kile’kit ua, ka thupiakte la zuiuh chun, naw mang ah la umnau kawlkil gamla pen tiang pek himaleh le, zia tak ah kipat chun hun pui khawm kit in, ka min um zingna ding ah ka la guatna mun ah chun hun pui tung kit ding ka hi,’ la ti kha hezing in.

¹⁰ Amau haw hi la suakte leh la mipi, la thilhitheina lopi tak leh la khutbân thahat tak ah la tatsate ahi ngâl un.

¹¹ Aw Lalpa, la suakpa pauchapna leh, la min kija’na taphot ah kipak sek la suakte pauchapna hi a la ngaitha’n la; tu’ni ma ma hin la suakpa hi lawtinsak in; zia mipa mit mu ngei ah hin la ja’ngaina chansak ngâl ta’n!” ti’n ka pauchap tai. Zia hun ah chun lengpa dawn ding pia ka pan lai tak ahi.