NASEPTE 7 - PATHIAN LEKHABU THIANGTHO (BSI)

Stephen Thugen

¹ Thiampu lianpen chun, “Ziate thugen hi a dik ngei nam?” ti’n a dong a.

² Ziaphatchun, Stephen in a dawnhu a: Suapite leh pate haw, ei la ngaithau in. I suantu bul uh Abraham kha Haran ah a um ma’n, Mesopotamia ah a um lai khan, lopina Pathian chu a kiang in a hung kilâk in,

³ a kiang ah chun, la gam leh la chanaute nusia inla, gam ka hun etsak ding lam ah chun chia in, a hun ti’n.

⁴ Tichun, Kaldai mite gam chu nusia in, Haran in a hung chêng ah. A pa a hung thi’nung in, Pathian in zia kipat chun tu’ ah la chênnau gam ah hin a hun kichawn lutsak ta’n.

⁵ Zia chun a luana ding mun, a keng ngakna kham le a pia pua’n; himaleh, cha a nei masang pek in, ama leh a nung ah a suante go dingin piak a tiam tai.

⁶ Chuleh, Pathian in a suan leh pâkte chu midangte gam ah, suak nasem leh genthei tak in kum zali sung chêng in au, ti’n a gen zo tai.

⁷ Pathian chun, himaleh, a na a seppiakteu chung ah chun keima’n vai hun hawm ing ka tin, ziazaw chuleh, hung pawtdok intiu in, zia mun ah hin keima ei hun ho ding a hiu, a la ti’n.

⁸ Ziazaw chun, zektanna thuthung chu a hun pia tai. Tichun, Abraham in Isak a hun hing ah, a ni giat ni chun a zek a tan piak ta’n; chun, Isak in Jakob a hun hing ah, Jakob chun suantu sawm leh nite kha a hun hing tai.

⁹ I pu leh pateu chun Joseph kha a îtsik ziak un, ama chu Aigupta gam in a la zuak mang tau a; himaleh, ama chu Pathian in a umpi zing a,

¹⁰ a haksatna zosia lak ah kipat in a hukdok ah, Aigupta ah Lengpa Pharaoh mit tung thei ding in doisakna leh pilna a pia; ama chun Aigupta leh a Insung zosia chung ah lal in a hun pansak tai.

¹¹ Zia lai ah chun Aigupta leh Kanaan gam pumpi’n kial leh thokgimna nasa tak a hung tung a; tichun, I pu leh pateu chun nêk ding a mu zo ta puau a.

¹² Ahi’n, Jakob in Aigupta ah bu a um hi ti a hun het phat in, I pu leh pateu chu a khualzin khatveina ding un a sawl ta’n.

¹³ A khualzin niveinau ah chun Joseph chu a suapite kiang in a kihiatsak ta’n; chuleh, Joseph chanaute chu Pharaoh a kihiatsak tau hi.

¹⁴ Chun, Joseph in a pa Jakob leh a chanaute zosia chu a chial ah, a vapuisak ta’n; a leng un mi sawmsagi leh nga a hiu.

¹⁵ Tichun, Jakob chu Aigupta gam a tung suk tai. Zia chun ama tawh I pu leh pateu kha a hung thiden tau hi.

¹⁶ A luangteu chu Shekhem ah a paw kit un, Shekhem ah Abraham in Hamor chate ah kipat dangka a chawksa thân ah chun a vui tau a.

¹⁷ Himaleh, Pathian in Abraham kiang ah a thutiam chu a guitun hun a nai phatin, Aigupta ah I mipiteu chu a hung pung hul hul tau a.

¹⁸ Joseph hekha lo leng pakhat chu Aigupta gam in a hung lal ta’n.

¹⁹ Ama chun I chiteu chu dawha’n a hun bawl ah; I pu leh pateu chun a chasenteu chu thi dingin a nutsiasak sek a.

²⁰ Zia hun lai ah chun Mosi a hung piang ah; ama chu Pathian mit mu in a mêlpha ma ma ah. A pa Insung ah chun tha thum etkol in a um a;

²¹ nutsia ah a hung um phat in, Pharaoh chanu’n a kilâk lut ah, ama chapa gual in a ki-etkol tai.

²² Tichun, Mosi chu Aigupta pilna zosia zilsak a hung hi’zaw phatin, thugen leh nasep ah thilhithei tak a hung hi tai.

²³ Kum sawmli a tin ah chun, a chanau Israel chate chu ve thâk nopna lungthim a hun nei a.

²⁴ A lak ua mi pakhat dik lo tak ah a soisak lai tak uh chu a mu phât in, tawden ah umpa chu panpi in, a phuba lakna’n Aigupta mi chu a that ta’n.

²⁵ Ama khut ah Pathian in a hukdaw ahi ti, a unaute chun he na’n au timaleh, a hepuau hi.

²⁶ A jing in a lak ua khenkhat a kinial lai tak un a vachia ah, a kilem theina ding un, gualte haw, suapi khat la hiu hi; bangatia dik lo tak ah kibawl la hiu em? a vatia.

²⁷ Himaleh, a Invêngpa dik lo tak ah bawlpa chun Mosi chu a sawn mang ah, ka chung ua lal ding leh thukhen dingin kua’n a hun guat la hem?

²⁸ Ja’ni Aigupta mi la thalup gual ah kha keile ei thalup gua la hi maw? a la ti’n.

²⁹ Zia thu chu a het phat in, Mosi chu a jam mang ta’n; Midian gam ah chun gamdang mi gual in a vachêng den a. Zia tak ah chun chapa pani a nei den tai.

³⁰ Kum sawmli nung in, Sinai tâng gamthip ah chun, a kiang in Pathian ah mi pakhat, thingbuk lak ah meikuang in a hung kilâk a.

³¹ Zia chu Mosi’n a mu phât in, a thil mu chu mak sa’n, a en ding ah a hang nai phatin, Lalpa ah kipat aw a hung gi’n:

³² “Keima hi la suanpateu Pathian, Abraham Pathian, Isak Pathian leh Jakob Pathian chu ka hi,” a hun tia. Mosi chu a kithing ah, a en ngam ta puai.

³³ Ziaphatchun, Lalpa‘n a kiang in, “La keng ah kengtawdap chu sût in, la dinna mun chu mun thiangtho ahi ngal a.

³⁴ Aigupta gam ah ka mite chu, sukgenthei ah a umdan uh ka mu ta’n, a maunateu le ka he ta’n, amau hukdok ding ah hung suk ka hi. Tu’hin hung in, Aigupta gam ah hun sawl ding ka hi,” a tia.

³⁵ Zia Mosi, lal leh thukhen ding ah kua’n a hun guat la hem? tia a la doi lo uh kha, thingbuk lak Pathian mi a kiang ah hung kilâk chun, Pathian in lal leh hukdokpa hikhawm dingin a sawl ta ahi.

³⁶ Ama chun Aigupta gam ah kipat, Tuipi San ah te leh kum sawmli gamthip ah a châm sung ua chun, thilmakte leh tepte’nate etsak pek in, a puidok a.

³⁷ Zia Mosi khan Israel chate kiang in, nangmau mite lak ngei ah kipat in, Pathian in jawlnei pakhat keima ei tundaw gual in hun tungdok ding ahi, a la ti’n.

³⁸ Sinai tâng ah ama kihopi Pathian mi tawh, gamthip ah kikhawmte lak leh, I pu leh pateu lak ah a la um kha ama chu ahi’n; ama chun ei piak sawn dingin thuhingte a la la ta’n.

³⁹ I pu leh pateu chun a thu a la mang nuam puau ah; a la sawn mang un, a lungthim un Aigupta lam a thangai kit tau hi.

⁴⁰ Aron kiang in, ka mau ei pui piak ding pathiante ei siam piak in; zia Mosi, Aigupta gam ah kipat ei puidokpa hivang, bang chang a hem ka he ta puau hi, a tiu a.

⁴¹ Zia lai ah chun, bawngno lim a hun siam ua, zia milim kiang ah chun thillat a lân un, amau khut suak chu a limpi tau a.

⁴² Himaleh, amau chu Pathian in a kihei mangsan ta’n, van ah thil umte chu be dingin a pedok tai; jawlneite lekhabu’n zia gual hin a la kizik tai: Aw Israel Inkuante haw, gamthip ah kum sawmli sung kha, kei kiang ah gan that leh kithawi la hiu em?

⁴³ La hi puau hi: Molok biakbûk leh, la pathian uh Rephan aksi la kipuak un, ho ding ah la milim siamteu kha tawh; ziaziakchun, Babulon khêllam ah hun thakmang ding ka hi, ti in.

⁴⁴ I pu leh pateu khan, gamthip ah Mosi’n a mu gual tak ah hi’ding ah Pathian in a hil dungzui khan, hetpina biakbûk kha a nei tau hi.

⁴⁵ Zia chu, Pathian in I suanpateu ma-âng ah kipat namdangte a la nawdok lai ah khan, Joshua tawh I suanpateu chun a hun lutpi tau a. David hun tiang ah khan zia chun a la um zing tai.

⁴⁶ Ama chu Pathian mit a tun ziakin, Jakob Pathian â ding ah In sak piak dingin a la don a.

⁴⁷ Himaleh, Solomon in zia In chu a hun sak piak zaw tai.

⁴⁸ Ahi’n, Chungnung Penpa chu mihing khut ah sak tempul haw hin a chêng puai ti in; jawlnei chun a la gen a:

⁴⁹ Van chu ka lalchutpha ahi’n, lei hi ka keng ngakna ahi; bang gual In ei sak piak ding la hiu em? ahiloleh, ka cholna mun ding chu bang gual a hem?, Lalpa‘n a ti’n.

⁵⁰ Zia zosia hi ka khut suak hilo a hem? ti in.

⁵¹ Nanghaw mi lochal, lungthim leh nakhang zektanlote haw, bangtik lai inle Thagau Thiangtho la dodâl zing un, la pu leh pateu bawl gual in la bawl zing ui.

⁵² La suanpateu in a la sukgenthei lo uh jawlnei a um kha em? Mi Dik tak hungna ding a la genlawkte chu a la that un; tu’hin nanghaw hi a matsakte leh a thatte la hung hitau hi.

⁵³ Vansawlchâkte’n a piak uh Dan changte chu la hiu in, ahi’n, zia chu la zui diak puau hi, a tia.

Stephen Suang ah Se’lupna

⁵⁴ Zia thilte chu a het phat un, a siat uh a so ta’n, Stephen chu a hau a hun gawikhum tau a.

⁵⁵ Himaleh, ama chu Thagau Thiangtho ah dim in, van lam a en zing ah, Pathian lopina leh Pathian changlam ah Jesu ding a mu ta’n.

⁵⁶ Ama chun, “En tiam un, vante kihong leh Mihing Chapa, Pathian changlam ah ding chu ka mui,” a tia.

⁵⁷ Himaleh, amau chun a bil uh a hûm ua, aw ngai tak ah kiko in, ama chu a hun baw tau a.

⁵⁸ Tichun, khawpi pawlam in a kaidok ua, suang in a sep tau a; thuhiatpite chun a puanâkteu chu tangval pakhat Saul kiti kengbul ah chun a hun koi un.

⁵⁹ Stephen chu suang ah a se’lai un, a pauchap ah, “Lalpa Jesu, ka thagau pui ta’n,” ti in.

⁶⁰ Ziazaw chun, a hung khupdin ah, aw ngai tak in a hung kiko ah, “Lalpa, zia gitlona hi a chung un sîk kin,” a tia. Zia chu a gen zaw in, a thi tai. Saul chun a thi chu lem a sakpi hi.