NASEPTE 27 - PATHIAN LEKHABU THIANGTHO (BSI)

Rom Khua lam Zuan ah Paul Zinna

¹ Itali lam ah ka chiana ding chu sukpûk a hung hi’phatin, Paul leh suangkul ngak khenkhatte chu, Augastas pawl ah sepai zahotu, a min Julias kitipa khut in a kolsak tau a.

² Tichun, Adramitiam Long in ka lut ua, Asia gam jul ah chun ka kitawl ua, Makedonia gam Thessalonika khaw mi Aristarka le ka lak un a pang a.

³ A jing ah chun Sidon ah ka bâng malam un; Julias chun Paul chu a bawlpha ma ma ah, a lawite tawh kive tua thei ah, kisuhal tua sek thei dingin a phal piak a.

⁴ Zia tak ah kipat ka kitawldaw kit phat un, thigua a hât ziakin Kupra tuikual gam nuai lam in ka kitawl ua.

⁵ Kilikia leh Pamphulia gâllam ka kitawl kai phat un, Lisia khawpi Mira ka tung ua.

⁶ Zia tak ah chun sepai zahotu chun Aleksandria Long pakhat Itali lam zuan ding a vamudok ah, zia sung ah chun kei uh chu ei chuansak tau a.

⁷ Ni tam tak chu awl awl in ka kitawl ua, a tawp in, haksa tak in Naida khawpi ka tung ham ham un; hui hât tâkluat ziakin, ka zotnau chu zang tak in ka zuan thei puau a; tichun, Salmoni zawn ah Kret nuai lam tak in ka kitawl pek ua.

⁸ Haksa tak ah kitawl pek in, a tawp in Fair Haven a tiu, Long Cholmun Hoi, a tiu Lasia khua kiang naicha um chu ka tung tau hi.

⁹ Chun, ni tam tak a lut tâk ziak leh, Long ah chia a lau um tâk ziakin, Anngawl ni chu a kikhêl hial phatin, Paul in amau chu a hil a;

¹⁰ a kiang un, “Pute haw, tu chung ah I khual zinnau hi haksa tak leh siatna nasa tak tuak ding I hiu, a Long leh a vante bep hilo in, eimau hinna natiangle lau um ah um ding I hiu, ti ka hia’i,” a tia.

¹¹ Ahiziakin, sepai zahotu chun a Long neite leh a Longpute chu taksang in, Paul thugen sâng ah chun amau thu chu a mang zaw ta.

¹² Zia Long cholna mun chu phalbi lai ah umna ding ah a lemchân lo ziakin, a tam zaw te chun kipatdaw vak a vaisawm ua; bang a hem ti khat ah Phoinik tun tei tei a guau ah, zia tak ah chun phalbi sung um malam ding a kingaituau a. Zia chu Kret gam, Long Cholna mun khat a hia, mal sak leh tum sak ngatua ahi.

Tuisuagiat ah Thigawpi

¹³ Simlam hui awl awl in a hung hâng ah, a tup gual ua hung um ta dingin a kingaituau a; zia tak ah chun hât deu tak in Kret gam jul in a tawl suk tau a.

¹⁴ Himaleh, hun chomlokâl sung in, hui hât tak in a hung hâng pan ta’n, zia chu mallam Hui (Euroklidon) a tiu chu a la hi’n.

¹⁵ Ka Long uh chu a hun mût khak phatin, ma lam in a tawl zo ta puau ah, ka mawk thâzan ziang ua leh, ei tok ei tok ta mai a.

¹⁶ Chuleh, Kauda a tiu tuikual gam neucha lia lam in ka kitawl un, haksa tak in kuang neu ka man ham ham ua.

¹⁷ Zia chu a kaidaw phat un panpina khaute a mang tau a; Long nuai lam chu a kân kîmvêl ua, Sirtis piaunêl lak ah kitawl lut kha’n ah ti’n, puanjak khainate chule a lathau a; tichun ei mawk taw taw ziang tai.

¹⁸ Thigawpi’n ei sukgim bêk ziakin a jing in long sung ah vante chu a paitha pan tau a,

¹⁹ a ni thum ni’n Long vante chu amau khut ngei in a paitha kit tau a.

²⁰ Ni tam tak sung chu nisa leh aksi him him a kilat tâk lo phatin, thigua’n ei daidawp lo ziakin dam ah pawt daw ding him le kinep a um ta paw hial a.

²¹ An nelo ah sawt tak um ka hi tak ziak un, Paul chu a lak un a dingdok a, “Pute haw, Kret tuikual ah khan ka thu awi leu chin zia gual siatna leh manna hi I chung un tung lo ding hive’n,

²² ahi’n, tu’hin thamuang tak ah um dingin ka tîl la hiu; la lak un kuama’n la hinnau mansua pua’n lau, Long hi ahileh vang mangthai in a.

²³ Tu’jan ngei ah khan, ka Pathian leh ka ho sekpa vansawlchâk ka kiang in a hung ding a,

²⁴ ka kiang in, ‘Paul, lau kin, Lengpa Kaisar âng ah ding ngei ngei ding la hingal in, Long ah la chuan khawmpite zosia hile Pathian in a vênbit ei tai,’ ei ti hen.

²⁵ Ziaziakchun, pute haw, thamuang tak in um un; Pathian chu ka ging ah, ka kiang ah a gen chu guitung ding ahi.

²⁶ Tichun, khoitak tuikual gam a hem in gâl kâi ngei hitiu,” a tia.

²⁷ Adria tuisuagiat ah thigawpi’n ei tok lum let ah, jan sawm leh li a tin jan khang lai in Longpute’n mualkâng nai ta dingin a gingchau a.

²⁸ Tui thûk lam chu a teu ah, lâm sawmni ahi’n; sawt lo sung in a te’ kit ua leh lâm sawm leh nga ahi nalai ah.

²⁹ Suangphom lak ah ei taw lut khâk ding a lau ziak un, Long mei lam in Long tuktânna pali a khiau ah, khawvak ka ngâk tau hi.

³⁰ Longpute chun Long lu lam ah, a tuktânna khia ding gual ah thep ah, kuangneu chu tuisuagiat ah khiak ah, taisan a guat phat un,

³¹ Paul in sepai zahotu leh sepaite kiang in, “Ziate hi Long ah a um zing lo ua leh suakcha pua’n lau,” a tia.

³² Ziaphatchun, sepaite chun kuangneu gui chu a âttan tau ah, a thâsuak tau hi.

³³ Khawvak ding kuan in, Paul chun mi zosia an ne dingin a sawl ah, “Bangma nelo ah anngawl ah la mawk um ziang uh tu’ni hi a ni sawm leh li ni ahi tai.

³⁴ Ziaziakchun, an ne dingin ka sawl la hiu, la damna ding uh a hi; la lak ua kuama’n samzang khat ziang le mansua lo ding la hiu,” a tia.

³⁵ Zia a gen zaw ah chun vaithum a la, a leng ua ma ah chun Pathian kiang in kipak thu a gen ah, a phel ah, ama’nle a ne tai.

³⁶ A leng un a thamuang tau a, an a ne chiat tau hi.

³⁷ (Zia long sung ah um zosia chu mi za ni sawmsagi leh guk ka hiu hi.)

³⁸ A nêk zaw phat un, Long sukjânna dingin a gehu buteu chu tui lak in a septha tau hi.

Long Siatna

³⁹ Khua a vak phatin, a gam chu a hepuau a; himaleh, a kiang ua naicha’n se’pho a muu ah, zia chun Long chu a kitawldok ziang thei khak leh a tiu a.

⁴⁰ Tichun, Long tûktânna chu âttan in tuisuagiat in a nusia tau a. Zia chu tawh kuang japna kânna chu a phel ua, a ma lam puanjak chu hui mut thei dingin a khai to un, se’pho lam chu a zuan tau a.

⁴¹ Ahiziakin, tuizangkhau pani kisuktuana’n ka lût khau ah, Long chun lei a suta’n; Long lulam chu a tâng ta; khoilîng but lo in a um tai, a mei lam chu tui kinawk a nasat ziakin a kêk ta’n.

⁴² Sepaite chun suangkul ngâkte chu tui zap kâi in tai mang kha’n au ti a lau ziak un tha a gaw tau a;

⁴³ ahiziakin, sepai zahotu chun Paul chu hukhin a nop ziakin, a thil ngaituau chu a khâm a. Tuizap thei tapo tuisuagiat ah chawmtha, mualkâng a la kâi masa ding leh,

⁴⁴ a dangte chu thingpêk chung leh Long sia hal chung ah te kâi dingin thu a pia. Zia gual chun ka leng un mualkâng chu dam tak in ka gâl kâi chiat tau hi.