NASEPTE 25 - PATHIAN LEKHABU THIANGTHO (BSI)

Paul in Kaisar Kiang ah Tut A Dotna

¹ Festa chu zia gam vaipua a pan nung ni thum zaw in, Kaisaria khua kipat chun Jerusalem ah a chia to pai a;

² thiampu lalte leh Juda puitute chun a kiang in Paul chungchâng chu a sia lam in a tut pai un.

³ Jerusalem ah hun pui dingin a lungsiatna a don ua. Lampi ah chân ah tha a guat uh a hia.

⁴ Himaleh, Festa chun, Paul chu Kaisaria ah a um tâkdi ding a hi dan leh ama le chia kit pai ding ahi dan a gen piak a.

⁵ A kiang ua chun, “Ama chu a diklo tak tak ahileh, la lak ua thunei deu deu khenkhat hung suk unla hung hêk un,” a tia.

⁶ A lak ua ni giat a hem, ni sawm a hem vel a châm nung in, Kaisaria lam in a chia suk kit ta’n; a jing ah chun a vaihawmna chutpha chun a kichu, Paul chu hun puidok dingin thu a pia.

⁷ A hung tun phatin, Judate ama hêk ding ah hungte chu a kîmvêl in a hung ding ua; Jerusalem ah kipat hungte chun Paul chung thu ah hêkna tam tak a gen ua; ahiziak in, a genchetna tak tak ding a nei thei puau a.

⁸ Paul in a chung thu’n a dawnhu ah, “Judate dan leh, tempul leh Lengpa kãl in bangma ka bawl puai” a tia.

⁹ Himaleh, Festa chun Judate lung lam a hawl ziakin, Paul kiang in, “Jerusalem lam ah chia to ah, zia tak ah chu la chung thu ka ngaitua zawk la nuam em?” a tia.

¹⁰ Paul chun, “Lengpa ma-âng ah ding zaw’ng ka; ka chung thu genna ding mun chu zia tak chu ahi ngal a. La het tâksa gual in, Judate chung ah hin bangma ka hi’khial puai.

¹¹ Thil hi’khial tak tak ka hi ah, thina ding hial ah gitlona nei ka hi chun thi le ka nial puai; himaleh, tu’ ei hêknau haw ah hin ka thiam lona bangma a mu puau ah, ziaziakchun, kuama’n amau khut in ei pia thei pua’n au. Lengpa kiang tung zaw ding ka hi,” a tia.

¹² Festa chun a vaihawmpite ngaidan a dot zaw in, a kiang in, “Lengpa kiang maw la tun zawk ding? Lengpa kiang ah chia ngei in la,” ti’n a dawnhu tai.

Festa in Agrippa A Dotna Thu

¹³ Ni bang jat a hem nung ah chun Festa ve dingin Lengpa Agrippa leh Barnisia chu Kaisaria ah a hung un.

¹⁴ Zia tak ah chu ni tam deu tak a um ziak un, Festa chun, lengpa kiang in Paul chung thu a hun gen lang a: “Mi pakhat Felik in suangkul ah a nutsia malam a um in;

¹⁵ Jerusalem ah ka vachia leh, thiampu lalte leh Judate lak ah upate chun ama hêk ah thalup a nop dan uh chu ei la hil un.

¹⁶ Himaleh, amau ka dawnhuna chun, ‘Rom mi a thina ding tiang hial ah hêk ah um, a hêkte tawh kimaitua ah a thiamna thu a gen zaw zet masang ah, a thina ding ah a hêkte khut ah piakdaw ziang chu dan ahi puai,’ ka la ti’n.

¹⁷ Ziaziakchun, a jing ma ma vâigei lo hial ah a hung ua, a thu chu a gen theina ding un, vaihawmna chutpha chun ka kichu ngal ah, zia pa chu hun pui dingin thu ka pia.

¹⁸ Ama hêkte a hung din phat un, ka ginchak gual in a hêkna thuteu chu lâk thei ding um in ka hepua’n;

¹⁹ a hêkna thuu a gen thei sun uh chu amau sakhaw thu ah, ‘Jesu kiti chu a thi hen a thokit tai,’ ti Paul in a gen ziak bep a la hi’n;

²⁰ zia tawhbang dotna thu ah hin ama nop dan bangma ka hetlo ziakin, Jerusalem lam ah a thubuai vagen ding ah a nop leh nop lo ka dong a.

²¹ Himaleh, Paul chun Lengpa Augastas kiang lam ah thu tutsawn a nop zawk tâk ziakin, Kaisar kiang lam ah ka sawl thei masang ah um dingin ka khum tadi mai hi,” a tia.

²² Festa kiang in Lengpa Agrippa chun, “Keima’nle zia pa thugen chu ka ngaitha nuam na e!” a tia. Ama chun, “Jing leh ngaitha thei in la,” a tia.

Agrippa Ma ah Paul Dinna

²³ Tichun, a jing ah chun Agrippa leh Barnisia chu lopi tak in a hung ua, thugenna In ah chun a lut ua; sepai hotuliante tawh, khua sung ah mi lopi deu cheng tawh a hiu a; Festa in Paul chu a hun pui lûtsak a.

²⁴ Festa chun, “Lengpa Agrippa leh zia tak ah hungkhawm zosiate haw, zia pa la mu ngei uh hi, ama hi ahi Jerusalem leh zia Juda mipite’n ka kiang a hun tut ua, hing tâk hi talo ding khop hial ah a kiko khum pau chu.

²⁵ Himaleh, ama hin thina ding tiang hial in bangma a hi’khial ka mu puai. Ziaziakchun, ama ngei hin Lengpa Augastas kiang lam ah thu tutsawn a nop ziakin, ama hi zia lam ah chun sawl ka gaw zaw ta ahi.

²⁶ Zia lo ah chunle, ama chung thu ah hin tu’ni tiang in I Lengpau kiang ah vak zik ding ka hethei nai puai. Ziaziakchun, ama hi la mau ah ka din sak ah; aw Lengpa Agrippa, nangma ma-âng ngei ah hin ka dinsak ahi, pha tak in dawpchian inla, ziazaw chuleh zik ding ka nei thei khâk leh;

²⁷ suangkul ngak pakhat, a hêkna thuu gen ding neilo hial ah um ziang ding chu thil um ding dan hi’n ka hepaw ngal a,” ti’n a gen a.