NASEPTE 21 - PATHIAN LEKHABU THIANGTHO (BSI)

Jerusalem Zuan ah Paul Zinna

¹ Amau tawh kikhen in ka kitawldok tau a, zang tak in Kos ka kitawl tung un, a jing in Rhodes ka tung ua, zia kipat chun Patara ka tung tau hi.

² Zia tak ah chun Phoinikia lam zuan ding Long pakhat ka mu ngal ua, ka chuang ua, ka kipan kit tau a.

³ Kupra ka gâl mu phat un a veilam pang in ka kihei un, Suria lam zuan in ka kitawl un, Tura ka gâl kâi tau hi; zia tak ah chun Long ah van khenkhat suadok ding a um a.

⁴ Zia tak ah chun nungzui khen khat tawh ka kimuu ah, a kiang un ni sagi ka châm tau a. Thagau hiatsak in Paul chu Jerusalem ah chia lo dingin a la hil tau a.

⁵ Ahi’n, a ni a hung tin phatin ka kipandok kit un, ka chia kit tau ah; a jiteu tawh, a chateu tawh khawpi pâm lam in ei hung thak un. Se’pho ah chun khupdin in ka pauchap un,

⁶ mangpha ka kithâk zaw phat un, Long in ka kitawl dok tau ah; amau le a In lam un a chia kit tau hi.

⁷ Tura ah kipat chun Ptolemai ka tung tau a; unaute tawh chibai ka kibuk un, a kiang un ni khat ka châm tau hi.

⁸ A jing in ka kipan kit ua Kaisaria ka tung tau a; zia tak ah chun, thugen sek sawlchâk Philip In ah ka lut ngal ua, ama chu upa pasagite lak ah pakhat a hia, ama kiang ah chun ka um tau a.

⁹ Ama chun chanu pawsal neilo, thu genlawk theina nei pali a nei a.

¹⁰ Zia tak ah ni tam deu ka châm sung un, Judea gam ah kipat in jawlnei pakhat, a min Agaba kiti chu a hung suk a.

¹¹ A hung tun phatin, Paul kawnggâk chu a la, a khut leh a keng a kikân a, “Thagau Thiangtho chun, ‘Zia kawnggâk neipa Jerusalem ah Judate chun zia gual hin kân intiu in, Jentelte khut in pedok ding a hiu,’ a tii,” ti’n a hun gen a.

¹² Zia thute chu ka het phat un, zia tak ah umte chu tawh ama chu, Jerusalem ah chia lo dingin ka tho tau a.

¹³ Paul chun, “Bang ding ah keima lunggimna ding bep ah zia gual ah chu kap la hiu em? Lalpa Jesu min ziak ah Jerusalem ah kânna bep hilo in, thi le ka huam ahi,” a tia.

¹⁴ Ama chu ka tho zaw lo phat un, “Lalpa thu thu hi mai ta hen,” ka tiu ah, ka thipsan tau hi.

¹⁵ Ni bang jat a hem zaw ah chun, ka kisau ah ka van uh kipuak in Jerusalem lam zuan in ka chia to tau a.

¹⁶ Kaisaria khua nungzui khen khat inle ei zui to ua, ka tunna dingpau, nungzui masa a la hita, Manason kiti Kupra mi kiang chun ei hung pui un, zia tak ah chun ka tung den tau hi.

Paul Missionary Khualzin Thumveina Paul in Jerusalem ah Jakob A ve’na

¹⁷ Jerusalem ka tun phat un unaute’n kipak tak in ei la lop ua.

¹⁸ A jing in Paul tawh kei haw chun Jakob ka vaveu a; zia tak ah chun upate zosia le a la um kim ua.

¹⁹ Amau chu chibai a bûk zaw in, Pathian in Jentelte lak ah ama mang ah a sep dante chu a ban ban in a hil a.

²⁰ Zia thu chu a het phat un Pathian a pakcha tau a. A kiang in, “Suapipa, Judate lak ah gingtu a tam dan uh la mu; a leng un dan thu lam ah phatchuamngai tak a hiu a.

²¹ Ahi’n, amau chun, Jentelte lak ah Juda umsun te kiang in Mosi dan paithâk ding ahi dan la gente, a chateu zektan a kûl lo dan leh taksa dan zui lo ding ahi dan la gente kha a la he sik sek tau a.

²² Tu’hin bangti’n I bawl ta diam uh? Nang zia hin la hung hi ti hun he ngei ngei ding ahi ngal un.

²³ La kiang ah ka gen gual ua hin bawl mai in: Kitepna nei pawsal pali ka kiang un a um ui.

²⁴ Amau chu zui inla, kisukthianpi inla, a sam mêt man uh tuak piak in. Chutileh mi zosia’n mi kam ah la thu a het tapo uh kha a tak tak ahi puai ti leh, nangma ngei inle dan chu zui ah veng bit la hi ti he ta’n au.

²⁵ Jentel gingtute chung thu ah chun, milim kiang ah thillat, gancha mêklup leh thisan leh jawn thanhuainate lak ah kivêng ding ah lekha I ziksau ahi tai,” a tiu a.

²⁶ Paul in zia mi palite chu a pui ah, a jing in amau chu tawh a kisuthiang tau a. Chuleh, tempul in a lut ah, a changkim un thillat a bawl tau a; sukthian ahi’na ding hun uh chu mipite chun a hechiat tau a.

Tempul ah Paul A Matnau

²⁷ Ni sagi chu a ting vâng vâng ta’n; Asia gam ah Judate chun tempul sung ah a mu phât un, mipi chu a hun chokphûl tau a. Ama chu a man ua,

²⁸ a kiko ua, “Israel mite haw, ei panpiu in! Zia pa hin muntin ah I mipiteu, I danteu leh zia mun nangawn hile kãl ah thu gen sek chu ahi. Zia lo chunle, tempul sung ah hin Grik mite hung pui lût in, zia mun thiangtho hi a hi’buak ta ahi,” a tiu a.

²⁹ Amau chun Ephesa mi, Trophimas chu Paul tawh khawpi sung in a la mu khawm ua, ama chu tempul sung ah hun pui lût ngei ding ah a ginchâk ziak un ahi.

³⁰ Tichun, khawpi mi zosia chu kichok phûl in a hung tai khawm tau a. Paul chu tempul ah kipat kaidok in a kot chu a khâk tau a.

³¹ Chun, ama chu tha a guat lai un, Jerusalem ah mi zosia a buai ui ti thu sepai hotu lalpen kiang a tung ta’n.

³² Ama chun sepaite leh sepai zahotute chu pui in a kiang un a tai suk a. Amau chun sepaite leh hotu lalpen chu a mu phât un, Paul a vok uh chu a chawl tau a.

³³ Hotu lalpen chun Paul chu a man ah, thikkhau pani bul dingin thu a pia’n, kua ahileh bang bawl a hem ti a dong a.

³⁴ Mipi lak ah khenkhat chu thu khat in a kiko ua, khenkhat kit chu thu chuam in a kiko ua; navêk a um ziak un, thu dik tak a he thei ta pua’n kul sung ah pui lût dingin thu a pia tai.

³⁵ Paul chu leilawn a tun in, mipi soisakna a huaisiat ziakin sepaite’n a jawn tau a.

³⁶ A nung in mipi chu a kiko zui pek un, “That un!” a tiu a.

Paul in A Thiamna Thu Gen

³⁷ Paul chu kul sung a lutpi dikuan un, sepai hotu lalpen kiang ah chun, “La kiang in thu khat ka gen thei diam?” a tia. Ama chun, “Grik pau la hia’i maw?

³⁸ Ahileh nang hi vang tu’ma deu ah mipi til sia, gamthip ah tualthat hon sang li vêl mapui, Aigupta mi kha la hi puai,” a tia.

³⁹ Paul chun, “Kei hi Juda mi, Kilikia gam ah Tarsa khua piang ka hi’n, khawpi poimaw tak ah chêng ka hi; mipi kiang ah hin thu ei gensak in,” a tia.

⁴⁰ Phalna a piak phat ah chun, Paul chu kalbi chung ah dingin, mipi chu thip dingin a khut a zap a; chun, a thip dîl dêl phat un Hebrai pau in a kiang un thu a gen a.