NASEPTE 15 - PATHIAN LEKHABU THIANGTHO (BSI)

Jerusalem ah Khawmpi

¹ Judea gam ah kipat mi lawi khat hungte chun, zia unaute kiang in, “Mosi dan gual ah zek la tan lo ua leh, hukdam hithei pua’n lau,” ti’n thu a hung gen tau a.

² Zia thu ah chun Paul leh Barnaba chun nasa tak in a hun nial tau a; Ziaphatchun, Paul leh Barnaba tawh, a lak ua mi khenkhat chu, Jerusalem lam in chiau ah, zia dotna thu ah apostolte tawh upate tawh hang kiho dingin a sawl tau hi.

³ Tichun, kochuamte chun a hung thadok ua, Phoinikia gam leh Samaria gam a hun chuan malam ua, Jentelte lung kihei dan a gen malam pek tau a; unaute zosia chu nasa tak in a kipaksak tau hi.

⁴ Jerusalem a hung tun phat un, kochuamte leh apostolte leh upate chun nasa tak in a la lop un, amau mang ah Pathian in na a sep dante chu a gen tau a.

⁵ Himaleh, a ging kitite lak ah Pharisai pawl ah mi khenkhat chu a hung dingdok un, “Mosi dan phatak ah zop ding ah thupiak ding leh zek tansak têi ding ahi,” ti’n a gen tau a.

⁶ Zia thubuai chu ngaitua dingin apostolte leh upate chu a hung kichu khawm tau a.

⁷ A lak ua kinialna nasa tak a hung um phatin, Peter chu a hung ding ah, a kiang un, “Suapite haw, tu’ma khan keima kam ngei ah Jentelte het ding leh a hun gintheina ding ua chanchinpha thu hi gen dingin eimau lak ngei ah kipat in Pathian in ei têl dan kha la hiau a.

⁸ Pathian, mi zosia lungthim he pa chun, ei haw chung ah a tunsak gual gual in amau haw chung inle Thagau Thiangtho chu a tunsak in a hiatsak tai,

⁹ Ziaziakchun, eimau leh amau kikâl ah kidanglamna bangma a umsak ta puai, amau haw lungthim le ginna’n a sukthian piak ta ngal a.

¹⁰ Ziaziakchun, tu’hin, bang ziakin em I pu leh pateu leh, eimau ngei inle I puak zaw tâk lo uh ngawngkol chu, zia nungzuite chung ah nga kit in Pathian chu patep ding I hiu em?

¹¹ Zia sâng ah chun, ei hawle Lalpa Jesu hepina ziak ah hukdam I hiu ti I ginchâk dungzui un, amau le zia gual tho chu hingal ding a hiu,” a hun ti tai.

¹² Mipi kikhawmte chu a thip tau ah; Barnaba leh Paul chun, amau mang ah Pathian in Jentelte lak ah thilmak leh tepte’na mang ah na a sep danteu chu a hun gen tau a; tichun, lunglut tak in a ngaitha tau hi.

¹³ A gen zaw phat un, Jakob in thu a hun gen a, “Suapite haw, ka thugen hi phatak in a la ngai tiam un:

¹⁴ Jentelte lak ah ama min gingcha dingte a hung umtheina ding ah, Pathian in a doisakna thu Simeon in a la gen ta’n;

¹⁵ zia thu chu a dik ngei ahi ti hetna dingin jawlneite thu ah chun:

¹⁶ ‘Zia zaw tak chuleh hung kit ing ka tin, David biakbûk kha hung lem thak kit ding ka hi; a sesa chu siamthak ing ka tin, tung ding kit ding ka hi;

¹⁷ midang zosia’n le Lalpa chu hun hawl intiu in, ka min ah ei ko Jentelte zosia’n le, ei hun hawl theina ding un. Zia thilte bawlpa Lalpa chun,

¹⁸ zia zosia chu khawvel siam lim ah kipat, Pathian in a la hiatsak ahi tai,’ ti’n a la gen hi.

¹⁹ Ziaziakchun, zia gual hin ka ngaitua hi, Jentelte lak ah Pathian lam a la nga haw chu subuai puai tiu in;

²⁰ milim hona thil thianglo nêkte, jawn thanhuaite, samêklup leh thisan nêk haw hi haisan dingin a kiang un kizik zaw hen.

²¹ Mosi Dan thu hi nidang lai ah kipat, khawtin ah sabbath nisi’n leh sunagog tin ah a la kisim sek ahi tangal in,” a hun tia.

Jentel Gingtute Kiang ah Lekhathot

²² Ziaphatchun, apostolte leh upate leh kochuam mipite chun a lak ua mi guatdaw ah, Paul leh Barnaba tawh Antiok ah chiasak pha a sa tau a. A teldawteu chu: Judas, a min dang Barsaba a tiu tawh Sila a hiu ah; amau chu unaute lak ah lawi upa deu a hiu a.

²³ Zia gual hin lekhathot a zik tau a: “Keihaw, sawlchakte, upate leh unau umkhawmte hin, Antiok leh Suria leh Kilikia ah unau Jentelte chibai ka bûk ui.

²⁴ Keihaw lak ah kipat hung pawtdok, kuate a hiu em haw chu ka hil dan dungzui ua hilo in, la buaina ding bep ua thu hung gen pawl um a hiu ti ka la het phat un;

²⁵ I ngainat uh Barnaba tawh Paul hun kitonpi ah la kiang ua hun sawl ding in, kithutuak tak in mi ka hun têldok un;

²⁶ amau hi I Lalpau Jesu Khrista min ah thi khawksa lo ah a la pangte a hiu a.

²⁷ Tu’hin, Judas leh Sila ka hun sawl un, amau chun a kam ngei un zia thu chu hun gen ding a hiu.

²⁸ Tichun, zia thil poimaw tak takte longal hi la chung ua puakgik nasa zaw hun nga lo dingin, Thagau Thiangtho leh keimau in pha ka sa tau hi:

²⁹ Milim hona sanêkte, sa thisan nêkte, sa mêklup nêkte leh jawn thânhuainate haisan leu chin, ka tiu ahi. Ziate hi la haisan ua leh nang uh â dingin pha’n a. Dam tak in um un!” ti in.

³⁰ Tichun, a sawldok tau ah, Antiok khua a hung tung pai un; mipi a hun ko khawm phat un zia lekhathot chu a piau a.

³¹ A sim phat un, a tîlkho’na thugenteu ziak ah chun a kipak ma mau a.

³² Judas leh Sila chu jawlnei le a hiziak un, unaute chu thu tam tak ah tîlhat in a phudet tau a.

³³ Chomkhat a um nung un, thamuang tak in a kile’kit sak tau a, unaute lak ah kipat chun kipandok in, a hun sawlte kiang lam a tung kit tau hi.

³⁴ Sila vang chun zia tak ah châm nâk lai chu pha a sai.

³⁵ Ahi’n, Paul leh Barnaba chu Antiok in a châm nalai ua, midang tam tak tawh Lalpa thu chu a gen jel tau hi.

Paul Missionary Khualzin Niveina Paul leh Barnaba Kikhenna

³⁶ Ni bang jat a hem nung in Paul in Barnaba kiang in, “Khawtin ah, Lalpa thu I genna munte khan vachia kit hi tin, bangti’n a um tau em ti vakantha hi ti,” a tia.

³⁷ Barnaba chun Johan, a min dang Marka kiti kha pui a nuam a.

³⁸ Paul in vang, Pamphulia gam ah amau a la nusia leh nasepna amau a zui lo ziakin ama pui chu pha a sa pua’n.

³⁹ A kinial nasat ma ma ziak un, a kikhen tau a; Barnaba in Marka chu pui in Kupra thialkâl lam ah Long in a chia tau a.

⁴⁰ Paul chun vang Sila tawh unaute’n Lalpa hepina kolsak in a kipandok tau a.

⁴¹ Kochuamte chu hi’det malam pek in, Suria gam leh Kilikia gam chu a chuan suak tau hi.