NASEPTE 14 - PATHIAN LEKHABU THIANGTHO (BSI)

Ikoniam ah Paul leh Barnaba Nasepna

¹ Ikoniam ah Judate Sunagog ah chun Paul leh Barnaba a lut ua, thu a gen ua leh, Judate leh Grikte lak ah tam tak inle a ging tau a.

² Himaleh, Judate lak ah a ginglote chun Jentelte chu a hun tîlsiau ah, a lunggil uh unaute mudâna chun a hun hi’dim tau a.

³ Ziaziak tak ah chun, Lalpa thu chu hangsan tak ah gen in, zia tak ah chun sawt deu a um ua, Lalpa‘n tepte’na leh thilmakte a khut ua vopsak in, a hepina thu a hiatsak sek un.

⁴ Ziaphatchun, khawpi ah mipite chu a hung kikhen tau a; kimkhatte chu Judate lam in a pang un, a dang khenkhatte chu apostolte lam in a pang tau hi.

⁵ Ahi’n, Jentelte leh Judate chun, a hotuteu tawh pang khawm in, nungzuite chu jachak um tak ah siam ah suang ah se a guat phat un,

⁶ apostolte chun a la hiau ah, Lustra leh Derbi leh Lukaonia gam ah khuate leh a kiangvêl ah khuate ah chun a jam mang tau a;

⁷ zia vêl ah chun chanchinpha a gen malam pek tau ahi.

Lustra leh Derbi ah Paul leh Barnaba Nasepna

⁸ Lustra khua chun mi pakhat, a pian lim ah kipat keng zeng, a keng ah lamjawt kha ngailo hin

⁹ Paul thugen chu a ngai ah. Paul chun ama chu a en zing ah, damna ding khop ah ginna a nei hi ti a hia;

¹⁰ aw ngai tak in, “La keng in dingdok in,” a vak ti’n. Ama chu a chawmdok ah, a keng in a chia tai.

¹¹ Mipite chun Paul thilbawl chu a mu phât un, Lukaonia pau ah chun a hung kikodok un, “Pathiante chu mihing mêlpu’n I lak un a hung kum suk tau hi,” a tiu a.

¹² Barnaba chu Zeus a hi’sak un, Paul chu a thugen pen a hiziak in Hermes a hi’sak tau hi.

¹³ Chuleh, Zeus pathian a tiu thiampu chun, a biak inle khaw paw lam ah um chu, kotkhakpi bul tiang in bawngchalte tawh pakcha khi hun chawi in a hung ah, mipite tawh, amau biakna dingin kithoina siam a hun gaw ta.

¹⁴ Chutia, a thilbawl guat uh chu Paul leh Barnaba chun a het phat un, a puan uh botthêk in mipi lak ah chun a tailut un, a kiko ua:

¹⁵ “Suapite haw, bangatia zia gual ah chu la bawl guat ziang uh a hem? Kei uh le nangmau gual ah piang mihing ka hiu, zia tawhbang thil manlote hi la hun kihei san ua, Pathian hing kiang lam la hun ngat zawk theina ding ua a thu gen ah hung ka hi zawu hi; zia Pathian chu lei leh van siampa, tuisuagiat leh a sung ah um zosia siampa chu ahi.

¹⁶ Ama chun malai ah khan, namtin in amau lampi chiat a hawu a phal piak in;

¹⁷ tu’hin vang chu, ama chu a hetpi umlo in a kikoi ngai ta pua’n; thilpha a bawl zing in, van ah kipat gawtui leh a hun tin ah ga te, nêk leh châk leh kipakna’n I lungthimteu a hi’dim hi,” a tiu a.

¹⁸ Zia chu gen in, mipi chu haksa tâk in a tho tâng zo ham ham un, amau kiang ah thillat a guat uh chule a haisan tau hi.

¹⁹ Himaleh, Antiok leh Ikoniam khua mi tîlsia pang sek, Judate kha a hung tung un. Amau chun mipi a hun tîlsiau ah, Paul chu suang in a hun sep ua, a thi hita’n ah ti’n, khawpi pawlam ah chun a kaidok tau a.

²⁰ Himaleh, nungzuite a kîmvêl ah a hung din phat un, a hung thodok ah, khawpi sung in a hung kit tai. A jing ah chun Barnaba tawh chia pek in, Derbi lam a zuan tau hi.

Suria-Antiok Lam ah A Kile’kitnau

²¹ Zia khawpi chun, chanchinpha a hun gen ua, mi tam tak in a gin zaw nung un, Lustra lam in a hung nungkit un, zia kipat chun Ikoniam ah lut pek in, Antiok a tung tau hi.

²² “Sukgentheina tam tak thuak in, Pathian gam I lut ding him uh ahi,” ti’n nungzuite lungthim chu a hi’det un, ginna umzing dingin a tîlkho malam pek tau a.

²³ Kochuam tin ah a upa dingteu a guat zaw phat un, anngawl ah pauchap in, a gin uh Lalpa khut ah chun a kolsak malam pek tau a.

²⁴ Pisidia gam a hun fan suak phat un, Pamphulia a hung tung tau a.

²⁵ Perga khua thu a hun gen zaw phat un, Attalia lam in a hung suk kit un.

²⁶ Zia kipat chun Antiok lam ah Long in a hung kitawl kâi ua. Zia mun hi a nasepteu a hun sep butinnau leh, Pathian hepina kolsak ah a umnau khua kha ahi.

²⁷ A hung tun phat un kochuamte chu a hun ko khawm ua, amau mang ah Pathian in na a sep zosia chu a gensawn ua, Jentelte kiang ah le ginna kot a kihon tâk dante a gen tau a.

²⁸ Zia tak ah chun nungzuite lak in hun sawt tak a um tau hi.