NASEPTE 13 - PATHIAN LEKHABU THIANGTHO (BSI)

Barnaba leh Paul Missionary Khualzinna Khatveina

¹ Antiok khua kochuamte lak ah chun jawlnei leh mihilte le a pang un; ziate chu: Barnaba, Simeon, Niger le a ti sek uh kha tawh, Kurini ah um Lukia tawh, gam awptu Herod tawh seilian khawm Manaen tawh, Saul a hiu a.

² Amau chun Lalpa ho ah an a ngol lai un, Thagau Thiangtho chun a kiang un, “Barnaba leh Saul kha ka kona lam ah nasem dingin ei koichuam piak un,” a hun tia.

³ Tichun, anngawl leh pauchap in, a chung un a khut uh a ngau ah, amau chu a sawldok tau hi.

Kupra Bial ah Nasepna

⁴ Tichun, Thagau Thiangtho in a sawldaw dungzui in Seleukia khua lam zuan in a kipandok un, zia kipat chun Kupra tuikual gam lam ah long in a kitawl kâi un,

⁵ Salamis khua a tun phat un, Judate kikhopna chun Pathian thu a gen ngal un; chun, amau panpi dingin Johan kha le a pui pek ua.

⁶ Zia tuikualkhum sung chu Paphos khua tiang ah a hun fan zaw phat un, jawlnei dik lo, dawi mang ah nasem, Judate lak ah mi, a min Bar Jesu kiti khat tawh a kituak un.

⁷ Ama chu zia gam awptu Serjia Paulus kiti, mi thil hi’thei tak nuai ah nasêm a hi’n; zia pa chun, Pathian thu he nuam in Barnaba leh Saul chu a ko ta’n.

⁸ Himaleh, Elima, dawithiampa chun (zia chu a min khiakna ahi ngal ah,) zia gam awppa chu Pathian ginna ah kipat kaihei gua’n a dodâl zing a.

⁹ Ziaphatchun, Saul, Paul le kiti chu Thagau Thiangtho ah dim in ama chu a ensâl a:

¹⁰ “Nang mi thêmpa leh jakda um zosia ah dimpa, nang diabol chapa, dikna lam zosia mêlmapa, Lalpa lampi diktakte suksiat hi haisan lo ding la hi maw?

¹¹ Chuleh, tu’hin ngai in, Lalpa khut in a hun do la hi, hun chomkhat sung la mitthûm intin, nisa mu pua’n la,” a tia. Ziaphatchun, chimchi leh thimna chun a hun chup tangal ah, a khut ah kaibât ding mi a hawl tai.

¹² Zia gam awppa chun thil umdan chu a mu phât in, Lalpa chung thu ah zilsakna chu mak a sa’n, a hun ging tai.

Paul leh Barnaba in Pisidia Antiok ah a Nasepnau

¹³ Paul leh a lawite chu, Paphos khua kipat in long ah hung kipandok kit in, Pamphulia gam ah Perga khua a hung tung un. Zia chun Johan tawh a kikhen ua, ama chu Jerusalem lam in a hung kit tai;

¹⁴ Perga khua kipat a hung pawt phat un, Pisidia gam ah Antiok khua a hung tung tau a. Sabbath ni chun Sunagog ah lut in, a kichu tau a.

¹⁵ Dan thu leh jawlneite lekha thu haw a hun sim zaw phat un, Sunagog hotute chun a kiang un, “Suapite haw, mipi tîlhatna ding thu la nei ua leh hun gen tau inla,” a hun tiu a.

¹⁶ Tichun, Paul chu a dingdok ah, a khut in a hun jap ah, a kiang un: Nanghaw, Israelte leh midang, Pathian kichate haw a la ngai tiam un.

¹⁷ Zia Israel mipite Pathian chun, I pu leh pateu a la têl in, Aigupta gam ah a la chên lai ua khanle a la chawisâng in, a bân thahât tak ah chun a la puidok a.

¹⁸ Gamthip ah kum sawmli sung a vâkvâi lai ua khanle, a la en zui zing a.

¹⁹ Kanaan gam ah nam sagite a suksiat zaw nung in, a gam ding uh chu a kumkhaw go ding un a la pia ta’n;

²⁰ zia nung ah chun, kum zali leh sawmnga sung chu amau lak ah vaihawmtu ding, jawlnei Samuel hun tiang ah khan a pia’n.

²¹ Zia nung ah chun leng pakhat a ngêk nalai un; kum sawmli sung vaihawm dingin, Pathian in Benjamin nam ah mi Kish chapa Saul chu a leng uh hiding in a la pia tai.

²² Ama a hun paithâk nung in, David chu a leng ding un a hun pia ta’n. Ama chung thu ah chun, ka lung lam tak, ka doidan hi’piting thei ding mi, Jesse chapa David chu ka mudok tai, a tia.

²³ Zia pa suan ah kipat chun, Israelte Hukdampa ding Jesu chu a thutiam dungzui in a hun pia ta’n;

²⁴ a hun a tun ma’ chun, Johan in gitlo haisanna baptisma chan ding thu Israel mipite kiang in a gen lang ta’n.

²⁵ Johan chun a nasep ding a hun sep zaw ding phatin, “Nang un kei hi kua ahi lei tiu em? Kei hi ama chu ka hi puai; himaleh, ka nung ah mi pakhat hung intin, keima hi a kengtawdap phel piak tâkle ka hi puai,” a ti’n.

²⁶ Suapite haw, Abraham suan um khawmte leh, la lak ua Pathian ki’cha takte haw, zia hukdamna thu chu ei haw kiang ah hun kisawl ahi tai.

²⁷ Himaleh, Jerusalem ah umte leh a vaihawmteu chun a la hepuau ah, jawlneite thugen sabbath ni si’n ah a sim sek uh chule a hechian diak puau ah, ama chu thiamlo chansak in, a guitunsaktu’n a pang zaw tau hi.

²⁸ Thina ding hial ah a mawna a mu zaw lo nung unle, ama chu a thalup theina ding un Pilat kiang in a don tei tei un.

²⁹ A chung thu a la kiziksa zosia a hun sukbukim phat un, thing ah kipat chun a lathau ah, thân pakhat in a vui tau hi.

³⁰ Himaleh, Pathian in thina kipat in a kaitho a;

³¹ zia nung ah chun Galili gam ah kipat hung, Jerusalem khua a la umte kiang ah chun a kilâk kit a; tu’hin, amau chu mipite lak ah thu hiatsakte a hung hitau hi.

³² Zia thu kipak um tak chu taklang in, I pu leh pateu kiang ah Chanchinpha a la tiam chu ka hun gen tau ahi.

³³ Pathian in Jesu a hun kaithaw kitna ah hin, eihaw a chate kiang ah hin zia chu a hun sukguitun dan ei hilna ahi; Pâkna Labu panina chun: “Nang hi ka Chapa, tu’ni hin ka hun hin la hi,” ti’n a la kizik ah.

³⁴ Chun, a thawkitna lam thu’n, muatmangna mulo ding ah um ahi dan a genna chun, “David kiang ah ka thutiam thiangtho chu, hun pia ding ka hi,” ti in.

³⁵ Zia gual ma chun Pâkna Labu mun dang khat ah chun, “La Mithiangtho chu muat mangsak pua’n la,” a ti kit a.

³⁶ Ahi’n, David in Pathian lungtup dan tak ah ama khang sung ah na a sep nung in, a la ipmu ta’n, a pu leh pate kiang ah vui in a um ah, a muat mang tai;

³⁷ himaleh, Pathian in a kaithawpa kha chu a muat mang ta puai.

³⁸ Ziaziakchun, suapite haw, zia pa ziak bep ah hin la kiang ua gitlo ngaidamna thu hung kigen ahi, ti hi he tau in;

³⁹ zia Jesu ginna ziak ah chun, Mosi Dan in a tatdaw theilo chu a hung tandok ta ahi.

⁴⁰ Ziaziakchun, jawlneite’n a la gen zosiau kha la chung ua a tun lona dingin, chingthei tau in;

⁴¹ “Mi musitte haw, ngai un! Mak sau inla, mangthai tau in; nangmau hun sung ngei in thil pakhat ka bawl in, zia thil chu la kiang un min hun gen leule, gingcha thei pua’n lau,” ti thu kha, a tia.

⁴² Paul leh Barnaba chu a pawtdaw phat un, mipite chun sabbath ni kît leh, zia gual thute chu hung gen piak kît dingin a chial tau hi.

⁴³ Sunagog kikhopna a peljak phat un, Judate leh Judate ho dan a la zui tam tak chun Paul leh Barnaba chu a zui tau ah; amau chu Pathian hepina ah det tak ah um dingin thu a hil tau hi.

⁴⁴ Sabbath ni kit ah chun, Pathian thu ngaitha dingin khawpi mipi um zosia tithei hial chu a hung kikhawm tau a.

⁴⁵ Ahi’n, Judate chun mipite chu a mu phât un, itsikna’n a hung dim tau ah, Paul thugente chu a hilo lam lam ah hun nialkãl in, a demsiau a.

⁴⁶ Ziaphatchun, Paul leh Barnaba chun hangsan tak in, “Pathian thu hi nangmau kiang ah gen masak ding him ahi. Himaleh, la pom tâk lo ziak un, kumtuang hinna chang tâk lo ding ah la um tâk ziak un, Jentelte lam in kihei ta’ng kau.

⁴⁷ Lalpa‘n thu ei piak dan chu: ‘Jentelte salvâk dingin ka hun tundaw la hi, lei langkhat tawp chan ah hukdamna lampi taklang dingin,’ ei ti ka hiu,” a tiu a.

⁴⁸ Jentelte chun zia chu a het phat un, kipak ma ma in Lalpa a pâk tau ah; kumtuang hinna chang ding ah guat ah um zosia chun a ging tau hi.

⁴⁹ Tichun, Lalpa thu chu zia bial sung zosia ah chun, a kithang suak tai.

⁵⁰ Himaleh, Judate chun, numei kipe zo deute leh pawsal a khua sung ua thunei deu deute chu a hun tîlsiau ah, a khawpiu ah kipat chun Paul tawh Barnaba chu a nawdok tau hi.

⁵¹ Tichun, a keng ua leivui chu a thinthâk khum malam un, Ikoniam lam in a chia tau a.

⁵² Nungzuite chu kipakna leh Thagau Thiangtho in a dim tau hi.