NASEPTE 11 - PATHIAN LEKHABU THIANGTHO (BSI)

Jerusalem ah Kochuamte Kiang ah Peter Thu Hiatsak

¹ Judea gam ah um apostolte leh unau zosiate chun, Jentelte’n le Pathian thu a hun awi tau hi ti a hun he tau a.

² Peter chu Jerusalem a hung tun to phat chun, zektante lawi in nasatak in a la dem tau ah, a kiang in:

³ “Bang ding ah zetanlote kiang ah chia ah, a lak ua anle la vanêk a hem?” a tiu a.

⁴ Peter chun thil umdan chu a ban ban in a hilchian a,

⁵ “Joppa khua pauchap ah ka um lai in jel in ka um ah, thil umdan ding chu musak in ka um tai. Bang bawm a hem lian tak khat killi nei a hung kikhâitha suk ah, ka âng in a hung um ta’n.

⁶ Pha tak ah ka la et leh, ganhing keng pali nei chikim tawh, sasialnete, a khupbok ah vâk chite leh chunglêng vacha chikim chu ka mu’n.

⁷ Chuleh, aw khat in ka kiang in, ‘Peter, tho inla, that inla ne’n,’ ei ti’n.

⁸ Himaleh, kei chun, ‘Hilo e Lalpa, thilbuak leh thianglo bangtik lai inle ka kam in a lut kha ngai puai,’ ka ti’n.

⁹ Himaleh, van ah kipat a vêl ni’na ding ah aw chun, ‘Pathian in a sukthian tâk chu nang in a thianglo in ngai kin,’ a hun ti’n.

¹⁰ Zia gual chun thumvei hial a hung um a; ziazaw chun a leng in van lam in a kikhâi to kit tai.

¹¹ Ziazaw zaw ah chun, Kaisaria khua kipat ei ko ding a hung un, mi pathum in ka umna In chu ei hung hawl pai ngal un.

¹² Thagau chun amau chu chuam bawl lo hial ah, vazui dingin ei hil a. Zia unau pagukte hinle ei hun zui un; tichun, zia mipa In chu ka lut tau a.

¹³ Ama chun, a In ah vansawlchâk kilâk in, a kiang ah chia ding ah, ‘Joppa khua mi hun sawl ah, Simon, a min dang Peter kiti chu ko ding ah a hil ahi dan ei hil ah;

¹⁴ ama chun thute hun hil in tin, tichun, nang leh la Inkuanpite zosia hukdam ah um ding la hiu, ei tii,’ ti in.

¹⁵ Thu ka gen phatin, Thagau Thiangtho a limlai ah eihaw chung ah a hung tun gual gual khan, amau chung ah le a hung tung pai a.

¹⁶ Chun, Lalpa thu gen, ‘Johan in tui in mi a baptis sek in; nanghaw vang Thagau Thiangtho in baptisma chang in lau,’ a ti dante kha ka hun hedok kit ngen a.

¹⁷ Lalpa Jesu Khrista a gin phat un, Pathian thilthawnpiak, eihaw ei piak gual kha a kiang ua a piak tâk nung ah chun, kei hin Pathian nial ding gual ka hem?” a ti’n.

¹⁸ Zia thute chu a hun het phat un a thip tau a. Pathian in Jentelte le hinna a neitheina ding ua a lung hei uh a phal piak tai, ti in Pathian a pakcha tau hi.

Antiok ah Kochuamte

¹⁹ Stephen a se’lup lai leh sukgentheina a nasat lai ah khan, a lak ua khenkhatte chu Phoinikia leh Kupra gam lam leh Antiok lam tiang in a la tai tung un, thu chu Judate kiang tilo ngal midang kiang in a gen puau hi.

²⁰ A lak ua khenkhatte chu Kupra leh Kurini gam mi a la hi him un, ziate chu Antiok ah hung in, Lalpa Jesu chanchin chu Grikte kiang in le a hung gen tau a.

²¹ Amau chu Lalpa‘n a kithuapi ah, mi tam tak chun a hun ging tau a, Lalpa lam chu a hun nga tau hi.

²² Zia thuthang chu Jerusalem ah kochuamte kiang le a hung tung a; Ziaphatchun, Antiok chan ah vakantha dingin Barnaba a sawl tau hi.

²³ Ama tun phatin, Pathian hepi dan chu a mu in a kipak ma ma ah, phatchuamngai tak ah Lalpa tuzing dingin a tîlkho tai;

²⁴ ama chu mi pha tak, ginna leh Thagau Thiangtho ah dim mi ahi’n. Mi tam tak chu Lalpa lam ah belap in a hung um tau a.

²⁵ Ziaphatchun, Barnaba chu Tarsa khua Saul vahawldok dingin a chia ta’n;

²⁶ a vamudaw phatin, Antiok lam in a hun pui a. Chuleh, zia kum tung kei ah chun kochuamte tawh kithua in kikhopnate nei in, mi tam tak a hil sek un; chuleh, Antiok khua chun nungzuite chu “Khristian,” a hun tipan tau hi.

²⁷ Zia hun ah chun jawlneite chu Jerusalem khua kipat in Antiok khua’n a hung un,

²⁸ a lak ua pakhat Agaba kiti chu a hung dingdok a, Thagau hiatsak in khawvel pumpi kial nasa tak hung tung ding ahi ti thu a genlawk a; zia chu Klaudia Kaisar hun lai in a tung tai.

²⁹ Nungzuite chun amau hi’thei dan chiat tuak khawm ah, Judea gam ah unaute panpina dingin thot a guau a;

³⁰ zia chu a bawl ngei un, Barnaba leh Saul khut in a upateu kiang tung dingin a thot tau hi.