MIKAH 5 - PATHIAN LEKHABU THIANGTHO (BSI)

¹ Tu’hin vang nang chu bâng ah hual khum la hi tai; ei haw ei hual khum tau hi; Israel vaihawmpa chu a biang mol in a jep ui.

Beth-lehem Khua Kipat Vaihawmpa Chu

² Himaleh, nang Ephrath ah Beth-lehem, Judah phungneute lak ah khat himale chinle, nangma ah kipat in Israelte vaihawm piak ding, mi pakhat hung pawt ding ahi ngal a; a hung kipatna chu nidang lai ah, khanglui hun ah kipat ahi.

³ Ziaziakchun, nauvei nu’n nau a hun hin masang sia chu, amau chu Lalpa’n kiheisan in a; ziaphat chuleh, a chanau la umsun te chu, Israel mite kiang in kile’kit ta’n au.

⁴ Lalpa hatna ziak leh Lalpa a Pathian min lopina ziakin, hung dingdok in, a gan-gualte chu vâk ta’n a. Amau chu bit tak ah chêng in, kawl kîmvêl tiang chan pha’n a lopi pen hita’n au.

⁵ Chuleh, ama chu I kichamnau hita’n a. Assuriate’n I gam uh a hung sim ua, I lei chang uh a chotden phat uh leh, ei un amau do dingin belampu pasagi leh, vaihawmtu pagiat tungdok hitiu.

⁶ Amau chun Assuria lenggam chu chemjam in vaihawm intiu in, Nimrod lenggam chu chemjam jukdaw sa’n vaihawm khum in au; I gamgiu a hung chot phâk uh leh le, Assuriate ah kipat chun ei hukdok ding a hiu.

A Umsun te Thil Hun Bawl Ding Chu

⁷ Ziaphat chuleh, Jakob mi umsun te chu, nam tam tak in a ûm kîmvêl uh himaleu, mihing ah kinga lo leh, thitheite a ngak lo gual ah, Lalpa ah kipat daitui gual leh, hampa lak ah gua mal kia gual in um ta’n au.

⁸ Chuleh, Jakob mi um nalai sunte chu, nam tam tak in hualvêl ziang maleu, gammâng ah gamsate lak ah sakeibaknei gual leh, belam hon lak ah sakeibaknei vanglai gual in um in au; a pawt daw phat leh chuanchil pek in, bottel malam pek intin, ama ah kipat hukdok ding kuama a um puai.

⁹ La khut la mêlmate chung ah lek in la tin, la mêlmate zosia chu paithâk in um ta’n au.

¹⁰ Zia ni chuleh Lalpa la sakolteu chu, nangmau ah kipat in sumangthai ta’ng ka tin, la sakol kângtalai zosiau le susia ding ka hi;

¹¹ chuleh, la gam ah la khawpiteu chu sumangthai ing ka tin, la kulpi det zosiau chule suchim ta’ng ka tin;

¹² la khut ah kipat in dawithiamna zosia sumang ing ka tin, âisân thiamnate nei diak ta pua’n la;

¹³ nangma ah kipat in la milim bawl kawmte leh, la dawi khuamte sumang ing ka tin, la khut ah la siamte ho dingin, a ma-âng un kûn kit ta pua’n la;

¹⁴ la lak ua Asherim dawikhuamte chu bawtdok ing ka tin, la khawpiteu chu susia ding ka hi.

¹⁵ Chuleh, ka thu mang lo namte chung ah lungnatna leh, thangtawmna phuba lâkna supiting tâng ka, a ti’n.