MIKAH 4 - PATHIAN LEKHABU THIANGTHO (BSI)

Thumatna Ziak Ah Muanna Leh Bitna

¹ Tu’nung tak leh Lalpa In umna tâng chu, tângte lak ah a sâng pen, mualte chung lam ah chun sukdet in hung um in a. Namtin zia chun chia khawm in,

² nam tam takte hung khawm in, “Hung un, Lalpa tâng tiang in, Jakob Pathian In ah chia to hitiu; a lampite chu I zuitheina ding leh, a lampi chanchin ei hiltheina dingin,” ti’n au. Zion ah kipat in gitlona hung pawt in, Jerusalem ah kipat in, Lalpa thu hung pawt ding ahi ngal a.

³ Ama’n nam tam takte kikâl thu tan intin, gamla tak ah nam hat takte chung thule khen piak in a; a chemjamteu lou kaina thîk dingin sek ta’n tiu in, a cheichateu chu chemkon dingin sêk ta’n au; nam khat in nam dang khat chung ah chemjam lek ta pua’n tiu in, kido danle kizil diak ta pua’n au;

⁴ mi tin amau grep bawk nuai leh, a theichang kung nuai chiat un kichu ta’n tiu in, kuama’n hilauthawng ta pua’n au; tin sepai honte Lalpa chun a gen ta’ngal a.

⁵ Chitinte’n amau pathian chiat zui ta ding ahi ngal un; ei hawn vang, Lalpa, I Pathian min un, kumtuang kumtuang in zui tai tiu.

Saltângte Puikhawm kit Ding Thutiam

⁶ Lalpa “Ziaphat chuleh, kengbaite kai khawm ing ka tin, del mang ah um leh ka sukgenthei ah umte chu, kai khawm ding ka hi,” a tii.

⁷ A kengbaite chu a um sun dingin hawi ing ka tin, pai mang ah umte chu, nam hat tak hiding in siam kit ing ka; LalpaZion tâng ah kipat in, a chung un tu’ kipat kumtuang tiang in vaihawm ta’n a.

⁸ Aw nang, gan-gual chinna Insâng, Zion chanu mualvum ngei chu, la kiang hung tung intin, lenggam masa kha hung tung in a, Jerusalem chanu lalna ngai kha hung tung in a.

⁹ Tu’hi bang ding ah ngai tak ah kap la hem? La sung ah lal a um pua a hem? A thamuantu kha a um ta pua, numei nauvei natna’n a hun pha ta a hem?

¹⁰ Aw Zion chanu, numei nauvei gual in thûm in, hagial in; tu’hin, khawpi ah kipat pawtdok in, gamlak ah giak ding la hi tai; Babulon tiang in chia pek ding la hi. Zia tak ah chun la mêlmate khut ah kipat in, hukdok in um in la tin, Lalpanangma hun tandok ding ahi.

¹¹ Tu’hin, nam tam tak nangma do dingin a hung khawm un: “Hi’buak in um hen la, I mit un Zion chung chu en zing hen,” a tiu a.

¹² Ahi’n, amau chun Lalpa lung lam a hethiam puau ah; phual ah buphal kikai khawm gual in, amau hun la khawm ding ahi dan leh, a lemguatte chu a hethiam him him puau hi.

¹³ Aw Zion chanu, kipan inla, chil in; la kî chu thik gual leh, la tinte chu sum-eng gual in siam ding ka hi’ngal a; mi tam takte chu vaw gawp in la tin; zia chung ah punna chu Lalpa â dingin koi chuam inla, a hausaknau zosia chu leilung pumpi, Lalpa â dingin koi chuam ta’n lau.