MIKAH 3 - PATHIAN LEKHABU THIANGTHO (BSI)

Vaihawmtu leh Jawlnei Diklote

¹ Nanghaw Jakob Inkuan hotute leh, Israel Inkuan ah vaihawm zosiate haw ngai un! Vaihawmna dik chu he lo la hiu em? ka ti’n.

² Thilpha doi lo in, thil phalo la dawi un, ka mite vun lip te haw, a guteu ah kipat in a pheu la âtthau in;

³ ka mite sa la neu ah, a vun uh la lip un; a guu la subong un, bêl ah huan ding gual in la âtnêl un, sahuanna bêl sung ah sa, huan ding ki-âtnelsa gual in, la âtnel tau hi.

⁴ Ziaphat chuleh, Lalpa hun ko intiu in, ahi’n la, hun dawnhu ta pua’n a; ziaphat chuleh, nunsia tak ah a tawi ziak un, amau kisêl mangsan ta’n a.

⁵ A kam ua nêk ding a um lai sia, “Muanna,” ti ah kiko ah, a kam ua nêk ding hun koilote chu, do ding ah kisa ziang sek, ka mipite pui kawi bep jawlneite kiang ah chun, Lalpazia gual hin thu a gen hi.

⁶ Ziaziakchun, kilâkna la mutheilona ding ah, jan hung hi’ntin; kilâkna him him la mutheilona ding ua, thim hun jin khumsak ding ka hi; jawlneite â dingin nisa’n mual khum ta’n tin, sûnle amau chung in khawthim hita’n a;

⁷ thiamgau kisate chu zakcha ta’n tiu in, âisân thiam kisate chule mualpho ta’n au; a leng un a mûk uh humbit ta’n au, Pathian in amau hun dawnhu talo ding ahi ngal a.

⁸ Keima ka hileh vang Jakob kiang ah a bawsiatnau, Israel kiang ah a gitlonau ka hiatsak theina dingin, Lalpa thagau ziak ah chun thilhitheinate, vaihawmnate leh hatnate ah chun ka dim zing tho hi.

⁹ Nanghaw Jakob Inkuan ah hotute leh, Israel Inkuan ah vaihawmte haw, vaihawmna dik zosia ki’dak ah, dikna zosia bangmalo ah koite haw, zia thu hi a la ngai un.

¹⁰ Thisan ah Zion siam ah, Jerusalem dukdak lo’na suate haw!

¹¹ A vaihawmteu in golgûkna’n vai a hawm un, a thiamputeu inle law mu’na ding bep in a zilsak un; a jawlneiteu inle sum mu ding kinem in thu a gen sek ui; chutisapi’nle, Lalpa chung ah a ki-ngau in “Lalpaei umpi ngei hi! I chung ua siatna bangma hung tung pua’n ah,” ti’n thu a gen sek ui.

¹² Ziaziakchun, nangma ziakin Zion chu, lou gual ah kaibuat in hung um in a; Jerusalem chu ki’dak buaksia paikhawmna mun hung hi’ntin, tempul umna mual chule gammâng thingbuk lak hung suak in a.