MIKAH 2 - PATHIAN LEKHABU THIANGTHO (BSI)

Mi Nuaisiate Chung ah Pathian Lungnatna Chu

¹ A khum laijawl ua thil phalo suangtuate leh, thil phalo ngaituate chung a gik na e! Jalkhun ah a lunggêl zosiau chu phalvak phat leh, a bawl ngal sek un; bawltheina chu amau khut in a um ngal a.

² Midangte lou a awtchau ah, zia chu thagum in a lak piak sek un; midangte In a eng un, zia chu thagum in a lak piak sek un; In leh a neitu chu a bawl genthei ma ma sek un, mihing leh a gochanteu a nuaisiau hi.

³ Tichun, Lalpazia gual hin a gen hi: Tu’hin, zia Inkuante chung ah hin thil phalo ka guanggal hen; zia kipat chun suakcha pua’n au; kisathei tak in vak kit ngai talo ding la hiu, zia chu hun phalo tak hiding ahi ngal a.

⁴ Zia ni chuleh, elho’na La hun sak khum ta’n tiu in; lusûnna La thasiat um tak hun sak khum ta’n au: “Suksiat dim dem ka hi tai; Lalpaka mite gochan ei lak piak in, bang gual ah ei lâk mang piak ahi tam le! Sal ah ei mante lak in ka lou uh a kihopsak tau,” ti in.

⁵ Ziaziakchun, Lalpa mite’n gam, kihopna ding ah khauhual kai ah, a hung kikhop phat uh leh, nangma khau hun kaipi ding, mihing khat le mu ta pua’n la.

⁶ Mipite chun, “Ka chungthuu ah hin thu gen kin, zia gual thilte chu gen him him kin. Pathian in ei mualphosak lo ding ahi.

⁷ Israel mipite hi hânsia dong ah la bawl a hem? Lalpazaidaw zo lo a hita a hem? Zia gual tak ah chun bawl lawm lawm ding a hem? dik tak ah bawlte chu, nem tak in a kiang ua thu gen lo ding a hem?” a tiu a.

⁸ Himaleh, nanghaw vang ka mite chung ah, mêlma gual in la hung dingdok tau in; kido nuam lo ah gâlmuang tak ah, vâkvêlte lak ah kipat in, a puanâk chualteu la sât thâk piak tau hi.

⁹ Ka mite lak ah numeite chu a In nuam tak ua kipat in la deldok un; a chasenteu lak ah kipat in, ka lopina kumtuang â dingin la lamang tau hi.

¹⁰ Kipan inla, chia in; zia tak hi kichawlna ding mun a hipaw ngal a, buakna a dim tâk ziak un, siatna huaisia tak in, nang uh le hun susia ding a hiu.

¹¹ Mumal lo leh diklo tak ah: “Uain thu leh khamthei thu la kiang ah hun hil ding ka hi,” ti ah min zuau a hun gen ua leh, ziate chu zia mite â ding bep ah chun, a thugentuu hiding ahi.

Israel A Umsun te A Ding Ah Thutiam Chu

¹² Aw Jakob, la leng un hun pui khawm ngei ngei ing ka tin, Israel um nalai sunte chu hun pui khawm ding ka hi; belam hon a kul ah um khawm gual in, bawng hon hampa mun ah tâ gual in, hun pui khawm ngei ngei ding ka hi; zia ni chuleh, mipi husa chiak veng vung ta’n a.

¹³ A phu vang masate chu a masa’n chia intiu in; a kêlkotte phu sia’n chia theng ngal in au; a lengpau chun ma pui intin, Lalpa chu a luchang in pang ta’n a.