MIKAH 1 - PATHIAN LEKHABU THIANGTHO (BSI)

Samaria Chung ah Gawtna Tung Ding chu

¹ Judah gam ah lal Jotham, Ahaz leh Hezekiah hun lai ah, Lalpa thu Moreseth khua um Mikah in Samaria leh Jerusalem chungchâng ah thil hung tung ding a la mu lawk chu:

² Nang uh chitinte leh lei lung leh, a sung ah um zosiate haw, ngai un; Lalpa chu a biak In thiangtho ah kipat in a hung pawt in, Lalpa Pathian chu nang uh kãl ah hiatpitu hita hen.

³ Ngai un, Lalpa chu a umna kipat in a hung pawt in, lei munsângte chu hun chuandên ding ahi.

⁴ Mei lak ah khuailu gual leh, kênliang ah tui kisungbua gual in, tângte chu a nuai ah tuitha zo in, phâiguamte chule puakkek ta’n a.

⁵ Zia zosia hi Jakob bawsiatna ziak leh, Israel Inkuante gitlona ziak ah hung tung ahi. Jakob sukkhialna chu bang a hem? Samaria ma ma hilo a hem? Judah dawimualte chu khoi tak a hem? Jerusalem khua hilo a hem?

⁶ Ziaziakchun, Samaria chu, buaksia sunkhawmna vum mai leh, grep kiphu’na mun in siam ding ka hi. Khawpi sung ah suangte chu, phâi guam lam in likmang sik sek ing ka; tichun, khawpi suangphûmte chu, laidok sik sek ding ka hi.

⁷ A milim zosiau khet gawp hi’ntin, a sep gim man zosiau chu mei ah hâl tum hi’ntin, a milim siamteu chu manlo suak ta’n a; a nawchi zawk man a mu zosia, nawchi man ma ma’n mat zaw kit hi’n a.

Judah Gam ah Khawpite Chung Gikna

⁸ Ziaziak hin lungngai a kap in, mau ding ka hi; ngawnchang leh keng ngawn ah chia ing ka tin; si-alte gual ah ham in, vasakolte gual in thûmsak ing ka.

⁹ A liamnate chu sukdam thei a hipua’n, Judah gam tiang in a tung ta’n; ka mite kotpi Jerusalem tiang a tung tai.

¹⁰ Gath ah gen puak kiu inla, kap him him kiu in; Beth-leaphrah ah chun leivui lak in kitel tau in.

¹¹ Aw Saphir ah chêngte haw, ngawnchang leh mualpho tak in la lampi chiat un chia tau in; Zaanan ah chêngte haw, hung pawtdok kiu in; Beth-ezel inle a sûn ta’n, nang hun panpi ta pua’n a.

¹² Maroth ah chêngte chun vang, thilpha hung tung ding chu, a ngâkla ma ma tau in, ahi’n, Lalpa ah kipat in vangsiatna a hung tung in, Jerusalem kotpi bul a hung tung tai.

¹³ Lakish khua chêngte haw, la kângtalaiteu chu sakol tawh bul unla; zia chun Zion chanu gitlo’na kipatna leh, nangma ah Israelte sukkhialna mu’dok in a um ta’ngal a.

¹⁴ Tichun, Moreseth-gath kiang ah, kikhenna thilpiak la piak ding chu; Akhzib Inkuan zosia leh, Israel lengte â dingin kithepna mai hung hi’n a.

¹⁵ Mareshah ah chêngte haw, a hun luadok ding khat hun sawl ding ka hi; Israelte lopina chu Adullam hung tung in a.

¹⁶ La cha doi takteu hung liangvai dingte sûnna’n, la luchang uh metkol in, mulukol gual hial ah lukol in hung um tau in; la chateu sal ah pui mang in a um zo ta’ngal un.