MATTHAI 9 - PATHIAN LEKHABU THIANGTHO (BSI)

Zeng A Sukdamna

¹ Jesu chu kuang ah chuang in, Dil langkhat lam ah gâl kâi in, a umna khua chu a tung kit tai.

² Mi lawi khat in, zeng pakhat a lupna phêk pum in lâng in a kiang lam in a hun jawn ua; Jesu’n a ginnau a mu phât in zeng kiang ah chun, “Ka chapa, thamuang tak in um in; la gitlona ngaidam ahi tai,” a tia.

³ Lekhazikte lak ah khenkhat chun a lungthim un, “Zia pa hi Pathian gensia ahi,” a tiu a.

⁴ Jesu’n a ngaitua nau chu a het phat in, “Bangatia, la lungthim ua thil gilo ngaitua la hiu em?

⁵ ‘La gitlona ngaidam ahi tai,’ ti tawh, ‘Tho inla, la keng in chia ta’n,’ ti hi a khoijawk hi a gen bailam zaw em?

⁶ Banghilehle, khawvel ah Mihing chapa’n gitlo ngaidam theina a nei hi ti la hetna ding un,” a tia; zeng kiang ah chun, “Tho inla, la lupna phêk la’n la, la In lam in chia ta’n,” a tia.

⁷ Tichun a tho ah, a In lam in a chia tai.

⁸ Mipite chun zia thil chu a mu phât un, lamdang a sau ah, mihingte kiang ah zia gual thuneina pepa Pathian chu a chawihoi tau hi.

Jesu’n Matthai A Kona

⁹ Jesu chu a chia pek lai in, sedawlna mun ah kichu mi pakhat a min Matthai kiti chu a mu’n, a kiang in, “Ei hun zui in,” a tia. Tichun a kipan ah, a zui ngal tai.

¹⁰ Chun, In ah chun ankuang a up lai un, sedawlte leh migilo tam tak a hung khawm ua, Jesu leh a nungzuite chu a hung uppi tau a.

¹¹ Pharisaite’n zia chu a mu phât un, a nungzuite kiang in, “Bangatia, la hotupau in se’dawlte leh migilote tawh ankuang ûm khawm ziang a hiu em?” ti’n a dong ua.

¹² Himaleh, Jesu’n zia chu a het phat in, “Mi damtheite chun daktor a ngai puau in, mi damtheilote bep in a ngai uh ahi.

¹³ Chutichun chiau inla, ‘Kithoina ka dawi pua’n, jangaina ka dawi hi,’ ti hi a umdan vazil un; midikte hawl ding ah hung ka hipua’n, mi gilote hawl ding ah hung ka hizawi,” a tia.

Anngawl Thu Dotna

¹⁴ Zia lai tak ah chun Johan nungzuite a kiang in a hung un, “Kei uh leh Pharisaite’n an ka ngawl sek ua, bangatia la nungzuite’n an ngawl lo a hiu em?” a hung tiu a.

¹⁵ Jesu chun, “Moneipa chu a lak ua a um sungsia chu, a gualte’n a sûn ngai sek ua a hem? Himaleh, a pawsal amau ah kipat puimang ni a hung tun tak leh vang, zia tak chuleh anngawl in au.

¹⁶ Kuama’n puan lui chu puanthak them in a phaw ngai puau hi; puan lui chu a phawna puan uh chun kai ek intin, ek lian zaw bep ding ahi.

¹⁷ Kuama’n uain thak savun thawl lui ah a thun ngai puau hi; chutilochun savun thawlte chu puakkek intin, kibuan tin, a savun thawlte chule se bep in a. Ziaziakchun, uain thak chu savun thawl thak in a thun sek ui. Tichun a pani ni chun vopbit a hisek ui,” a tia.

Numei Thipût Sukdamna leh Jaira Chanu Kaithawna

¹⁸ Zia thute chu a kiang ua a gen lai tak in, kikhopna In vaihawmpa pakhat a hung a, bokkhup in, “Ka chanu tu’ma ma khan a thi; himaleh hung inla, a chung ah la khut hung nga lechin hing kit ding ahi,” ti’n a hung gen a.

¹⁹ Tichun, Jesu chu a kipan ah, a zui ngal tai; a nungzuite’nle a zui tau hi.

²⁰ Chuleh, numei pakhat kum sawm leh ni thipût ah damlo, a nung in a hung ah, a puan mong a hung khoi a;

²¹ “A puan mong bep hi khoikha lengle dam ziang ing ka,” ti a ginchâk ziak in.

²² Chun, Jesu a kihei a, ama chu a mu, “Ka chanu, thamuang tak in um ta’n, la ginna la dampi ahi,” a tia. Tichun, numei chu zia hun ma ma’ chun a hung dam tai.

²³ Jesu chu vaihawmpa In ah a lut a, lilu mûtte leh mipi husa veng vung te chu a mu in,

²⁴ “Pawtdok un, naupang chu a thi puai, a i-mu ahi zawi,” a tia. Amau haw chun a nuisan un.

²⁵ Himaleh, mipite a nawdaw zaw phat chun a lut ah, a khut in a tûk ah, naupang chu a hung thodok tai.

²⁶ Zia chanchin chu zia gam tuam ah chun a hung thang suak tai.

Jesu’n Mitthûm Pani A Sukdamna

²⁷ Zia mun ah kipat chun Jesu a pawtdok ah, a chia lai ah chun mitthûm pani’n a hun zui un, “David Chapa, ei lungsiat in,” ti’n a kiko pek tau a.

²⁸ Insung a lut phat chun mitthûmte chule a hung ua, Jesu’n a kiang un, “Zia hi hi’thei dingin lei gingchau ah a hem?” a la tia. Amau chun, “Gingcha e Lalpa,” a tiu a.

²⁹ Ziaphatchun, Jesu’n a mit uh a khoi a, “La ginchâk gual un la chung un tung ta hen,” a tia.

³⁰ Tichun, a mit uh a hung vâk tai. Jesu’n a kiang un, “Kuama hiatsak lo dingin chingthei un,” a tichak kei a.

³¹ Himaleh, amau chu a pawt un, zia gam zosia ah chun a genjak tau hi.

Thitha Mat Pautheilo A Sukdam

³² Chun, a pawt lai tak un thithamat pautheilo pakhat a kiang in a hun pui ua.

³³ Thitha chu a deldaw phatin pautheilo chu a hung pau tai. Tichun, mite chun mak a sa ma mau a, “Israelte lak in zia gual hi a la kimu kha ngai puai,” a tiu a.

³⁴ Himaleh, Pharisaite chun, “Thitha lal ahi ziakin ahi thithate a del daw sek hi,” a tiu a.

Bu Lâk Ding A Tam, Nasemte A Tawm Hi

³⁵ Jesu’n a kikhopna In ua te thu hil in, Gam Chanchinpha chu gen in, damlo zosia leh natna zosia hi’dam in, khawlian leh khawneu zosia a chuan vêl a.

³⁶ Mipite chu a mu phât in, a ching ding umlo belam gual ah genthei leh chavai ah um chu a mu in a lainat ma ma a.

³⁷ Tichun, a nungzuite kiang ah chun, “Bu lâkkhawm ding a tam ten ngal in, himaleh, a sêm dingte a tawm ui.

³⁸ Ziaziakchun, louneipa Lalpa kiang in, a bu lakhawm dingte hun sawl dingin don un,” a tia.