MATTHAI 28 - PATHIAN LEKHABU THIANGTHO (BSI)

Jesu Thawkitna

¹ Sabbath ni a hung bei ah, hapta nimasa a hung kipat lim, phalvak ah chun Mari Makdalin leh Mari dang kha thân en dingin a hung un.

² Lalpa vansawlchâk chu van ah kipat hung kumsuk in; thânkot sitna suang kha a hun likdok ah, a chung ah a chut lai in, nasa tak in lîn a hung kilîng hi.

³ A mêl latdan chu kawlphe gual in a vâk ah, a puante chu vûk gual in a vam hi.

⁴ Thânvêngte chu lau in a kithing ua, a thi gual in a um tau hi.

⁵ Vansawlchâk chun numeite kiang in, “Nang haw vang lau kiu in, Jesu a khetden uh kha hawl la hiu ti ka hia’i.

⁶ A gen gual ah khan a thokit ta hen, zia tak hin a um ta puai, a lupna hi hung en ma tiam un.

⁷ Tu’hin kin tak in chiau inla, ‘Thina kipat a thokit tai’; ti a nungzuite vahil un, la malam un Galili gam lam ah a la chia tai; zia lam ah chun vamu’n lau, zia chu ahi la kiang ua ka gen nop chu,” a la tia.

⁸ Tichun, lau leh kipak ma ma kawm in thân chu a nusiau ah, akinthei pen in a nungzuite vahil dingin a tai tau hi.

⁹ Jesu’n a la lamtua a, “Chibai aw!” a la tia. Amau in a keng a tuu ah, a be tau hi.

¹⁰ Jesu’n a kiang un, “Lau kiu inla, ka suapite kha Galili gam ah chia dingin vahil zawu in, zia tak ah chun ei mu’n au,” a tia.

Thân Vêngte Thutut

¹¹ Chutia, a chia lai ua chun, thânvêngte lak ah khenkhat chu khawpi lam in a chiau ah, thil umdan zosia chu thiampu lalte a vahil tau a.

¹² Thiampute leh upate chu a chutkhawm zaw phat un, sepaite chu sum tam tak piak a gua tau a,

¹³ a kiang un, “Zia gual hin gen un: ‘A nung zuite jan ah ka i-mut kâl un a hung uh hen, a hung gumang tau hi,’ tiu inla,

¹⁴ gam ukpa’n a hun het phat leh, ama le thuzaw ing ka tiu in, nang uh hun hi’buai pua’ng kau,” a tiu a.

¹⁵ Tichun, sum chu a lau ah, hil ah a um gual un a bawl tau hi. Zia thu hi tu’ni tiang inle Judate lak in gen ahi zing nalai hi.

Nungzuite Kiang ah Thupiak Thupi

¹⁶ Nungzui sawm leh khatte chu Galili gam ah, Jesu’n a guat piak tâng khat ah chun a chiau a.

¹⁷ Ama a mu phât un a biau ah, khenkhat in vang a ginglâ nalai ua.

¹⁸ Jesu a hung ah, a kiang un, “Lei chung leh van ah thuneina zosia ka kiang ah piak ahi tai;

¹⁹ ziaziakchun, chiau inla, namtin lak ah mi nungzui in siam unla, Pa leh Chapa leh Thagau Thiangtho min in baptis un;

²⁰ la kiang ua thu ka piak zosia hi jawm dingin zilsak un. Kumkhua’n, khawveltawp tiang in la kiang un um zing ding ka hi ti hezing un,” a tia.