MATTHAI 23 - PATHIAN LEKHABU THIANGTHO (BSI)

Jesu’n Lekhazikte leh Pharisaite A Demna

¹ Ziazaw chun, Jesu’n a nungzuite leh mipite kiang in thu a gen a:

² Lekhazikte leh Pharisaite chu Mosi chutpha’n a kichu sek ui;

³ ziaziakchun, a hun thuhilteu chu zui sek unla, amau umdan in vang um kiu in; a kam un a gen ua, sep la a sêm puau a.

⁴ Mi â dingin puakgik tak tak siam piak in a puaksak un, amau in la a khutmûk chau le a tawisak nuam puau hi.

⁵ A thil hi’ taphotteu chu mihing mit mu dingin a hi’sek un, a thilbuu leh a dialkopteu chu a hi’lian un, a puanâk mongteu chu a hi’pawm ui.

⁶ Luaithe’na In leh Sunagog ah chun chutna phapente chan ah,

⁷ kaithial lai ah chibai kibûk leh, mite’n zilsakpa, a ti dingteu chu a doichuam sek ui.

⁸ Himaleh, nanghaw vang, zilsakpa ti dingin um kiu in; hotu pakhat bep la nei ui, nang uh hi suapi khat chiat la hiu hi.

⁹ Zia lei ah hin kuama he pa, ti chuam kiu in, la Pau pakhat a um hi, van ah um chu.

¹⁰ Hotupa, ti dingin le um diak kiu in; la hotuu pakhat a um a, Messiah ngei chu ahi.

¹¹ La lak ua a lianpen ding chu la nasem ua a pan ding ahi.

¹² Kuale ama leh ama kichawisâng chu, mutawm in um intin; chuleh, kingaitawm chu choisa’n in um in a.

¹³ Nanghaw, lekhazikte leh Pharisai miphalêmte haw, la chung uh a gik hi! Mi van-gam lut ding la dâl ua; nang uh la la lut puau ah a lut nuamte le la lutsak diak puau hi.

¹⁴ Nanghaw, lekhazikte leh Pharisai miphalêmte haw, la chung uh a gik hi! Meithâite la ne gam un, mi thepna’n sawt tak tak la pauchap sek ui; ziaziakchun, demna nasa zaw diak la chung un tung in a.

¹⁵ Nanghaw, lekhazikte leh Pharisai mi phalêmte haw, la chung uh a gik hi! Mi pakhat lâklutna ding bep inle tuisuagiat leh mualkâng la kan tua lum let un; a hung lut phat leh, nangmau chan le’ni gawtmun ah chang dingin la siam sek ua.

¹⁶ Nanghaw, puitu mitthûmte haw, la chung uh a gik hi! Mi munthiangtho sal ah a kihaksial leh bangma a khawk pua’n; mun thiangtho ah um sana sal ah a kihaksial uh leh la chung uh a gik hi! la tiu a.

¹⁷ Nanghaw mingol mitthûmte haw! Sana leh zia sana suthiangtho tempul chu khoi zaw thupi lasak zawk uh a hem?

¹⁸ Chuleh, mâichâm sal ah mi a kihaksial leh bangma a ti pua’n; mâichâm chung ah thilpiak sal ah a kihaksial leh vang a gui tung hi, la tiu a.

¹⁹ Bang gual bep ah muthei lo la hitau em? Thilpiak leh a thilpiak hi’thiangtho mâichâm chu khoi a thupi zaw em?

²⁰ Ziaziakchun, kuale mâichâm sal ah kihaksial chule a chung ah kitiam ahi’n, a sung ah um zosia sal ah kihaksial tho ahi.

²¹ Chuleh, mun thiangtho sam ah kitiam chu a sung ah chêngpa chung ah kitiam ahi kit hi;

²² chuleh, kuale van sam in kitiam taleu chin, Pathian lalchutpha leh a chung ah kichu chu sam ah kitiam hi tho tho ding la hiu.

²³ Nanghaw, lekhazikte leh Pharisai miphalêmte haw, la chung uh a gik hi! La thâichiteu lak ah pudinate, mawsawlate leh pathikhawmte natiang in sawm ah khat la piau a; dan thupiak poimaw tak tak, vaihawmna dan, jangaina dan leh ginna dante hi bangma’n la ngai puau ah; a dangte chu haisan diak lo in, ziate chu la hiding him uh ahi.

²⁴ Nanghaw puitu mitthumte haw! Thosi thitthiang in, sangawngsau la val ui!

²⁵ Nanghaw, lekhazikte leh Pharisai miphalêmte haw, la chung uh a gik hi! No leh kuangte a paw lam la nawt thiang ua, a sunglam chula du-âmna leh kisum lona’n a dim ngal a!

²⁶ Nang, Pharisai mitthûm! La no chu a sunglam nawt thiang phot lechin, a pawlam le hung thiang mai ding ahi.

²⁷ Lekhazikte leh Pharisai miphalêmte haw, la chung uh a gik hi! Thân a pawlam mêlpha tak ah kijut vam ah, a sunglam mithi gu leh thilbuak tincheng ah dim tawhbang la hiu.

²⁸ Zia gual tho ah chun, nanghaw le pawlam ah chun midangte chung ah fel tak bang maleu chinle, la sunggil lam uh gûkkhelna leh bawsiatna’ dim la hiu hi.

²⁹ Nanghaw lekhazikte leh Pharisai miphalêmte haw, la chung uh a gik hi! Jawlneite suang la dawu in, midikte thânle pha tak in la chei ui,

³⁰ nang uh chun, I pu leh pateu hun lai ah khan a la um hileu hin chu, jawlneite thisan suana khan bangma’n pang lo ding I hiu ah, la ti sek ui.

³¹ Himaleh, jawlneite a la that sekte suan la hi’nau chu nangmau ngei in hetpi in la sudik uh ahi hi.

³² La pu la pateu te’na chu sudim ngal tau in.

³³ Nanghaw gûlte haw, nanghaw gûlsia suante haw! Gawtmun ah thiamlo channa chu bangti’n pumpel ding la hiu em?

³⁴ Ziaziakchun, la kiang un jawlneite, mipilte leh lekhazikte kha ka hun sawl a; khenkhat chu that in la tiu in, khenkhat chu a la khenden in la tiu in, khenkhat chu kikhopna Inte ah vua’n la tiu in, a khua a khua’n delzui in lau;

³⁵ tichun, midik Abel thisan ah kipat Barakia chapa Zekhariah, mâichâm leh mun thiangtho kikâl ah la thau thisan la sua zosiau kha, nangmau chung ah hung chu ding ahi.

³⁶ Titakzet in ka hil la hiu, zia zosia chu tu’lai khangthakte chung in hung tung in a.

Jesu’n Jerusalem A Sûnna

³⁷ Aw Jerusalem, Jerusalem, Jawlneite thattu leh la kiang ah hun kisawlte suang ah a la seplumte! Jawlneite a la that a! Âkpi’n a note a tha nuai ah a awp khum sek gual in bang vei jat ahi tam, ke’n le awp khum ding ka guat hi; himaleh, la nuam puau hi.

³⁸ En un, la In uh chu a hawm ah nutsia in a um tai.

³⁹ Ka hil la hiu, Lalpa min ah hung chu a hamphai, la ti masang siau ei mu kit ta pua’n lau, a tia.