MATTHAI 22 - PATHIAN LEKHABU THIANGTHO (BSI)

Kichenna Luaithe Tekhinthu

¹ Jesu’n mipite kiang in tekhinthu mang in thu a gen kit a:

² Van-gam chu leng pakhat, a chapa ji neina luaithe gual chu ahi.

³ Ama chun a suakte chu a mi chialte ko khawm dingin a sawl a, himaleh, kuama a hung nuam puau a.

⁴ Ahi’n, hung tau in, ka bawngchalte leh ka gancha vak thaute ka that in, bangkim siamtup ahi tai; mo lopna ankuang ûm dingin hung tau in, vati dingin a suak dangte a sawl kit a.

⁵ Himaleh, a la ngaisak puau ah, a chia mang zo tau hi; pakhat chu a lou lam in, pakhat chu a sumkawlveina lam in a chia tai.

⁶ A dangte chun a suakte chu a man ua, mualpho tak ah a la bawl in a la that ta mai ui.

⁷ Zia thu chu lengpa’n a la het phat in a lungna ma ma ah; a sepaite a sawl ah, zia mithatte chu a vasuchimit tau ah, a khuau le a hâltum piak tau hi.

⁸ Chuleh, a suakte kiang ah chun, Molopna ankuang lui zaw ahi tai, himaleh, ka mi chialte kha ankuang ûm tâk a um puau hi.

⁹ Lamliante ah chiau inla, mi la mu jat jat uh kichenna ankuang ûm dingin hun pui un, a tia.

¹⁰ A suakte chu lamliante ah chun a chiau a, mi a mu jat jat uh chu a hun chial ua, mipha tawh, misia tawh, a hun pui khawm ua; tichun, mo lopna In sung chu mi a hung dim tau hi.

¹¹ Himaleh, lengpa chu a mi chialte en ding ah a hung lut leh, mi pakhat kichenna puan sil lo a hung mu ta’n;

¹² a kiang in, “Lawm, bangatileh zia tak ah hin kichenna puan sil lo ah hung ziang la hem?” a ti leh, ama chun gen ding a he ta puai.

¹³ Ziaphatchun, lengpa chun, a suakte kiang in, zia mi hi a khut leh keng kân unla, puidok unla, pawlam thim ah chun paidok un; zia tak ah chun kâ leh hagial um in a.

¹⁴ Kote chu tam tak a hiu ah, têlte vang chu tawmcha a hiu a tia.

Sia Piak Ding Thu A Dotnau

¹⁵ Pharisaite a chiau ah, ama chu a thugenna kipat mattheina ding ngaitua in a kiho ua.

¹⁶ Tichun, a zilsakteu leh Herod pawl ah mi khenkhatte chu a kiang in a sawl ua, Hotupa, nang hi midik tak la hi’n, Pathian lampi chu thutak in la zilsak ah, kuama khen chuam la nei pua’n, mihing mai la en diak puai, ti ka hiau hi.

¹⁷ Ziaziakchun, ei hil tiam in, Kaisar kiang ah sia piak hi a thiang em, thianglo? a tiu a.

¹⁸ Himaleh, Jesu’n a lungthim gitlo ziau chu a la he, a kiang ua chun, “Nanghaw mi phalêmte haw, bangatia ei ze-et la hiu em?

¹⁹ Sia la piak sek uh dangka chu ei hun etsak tiam un,” a tia. Tichun, denarii dangka pek khat a hun piau a.

²⁰ Ama chun a kiang un, aleh, zia kizik hi kua luchang lim leh kua min a hem? a tia.

²¹ Amau chun, Kaisar, a tiu a. Ziaphatchun, a kiang un, “Kaisar thilte chu Kaisar kiang in piau inla, Pathian thilte chu Pathian kiang in pia tau in,” a tia.

²² Zia thute chu a het un lamdang a sau ah, a nusiau ah, a chia mang tau hi.

Thawkitna Thu A Dotnau

²³ Zia ni ma ma chun, Sadukaite thawkitna a um puai tite chu a hung un, zia thu hi a hung dong tau a.

²⁴ Hotupa, Mosi’n, mi cha neilo in thi taleh, a suapipa chun a ji chu kichenpi ah, a suapipa â ding ah chi a suan piak ding ahi, a tia.

²⁵ Ahileh, tu’hin unau pawsal sagi a um un, a upa pen chun ji a nei ah, cha nei man lo in a thi ta’n, a naupa lua dingin a ji chu a um tai.

²⁶ Tichun, a pani’na pa’n a lua ah, a pathumna pa’n a lua kit ah, a sagi’na tiang in a lua chiat tau in;

²⁷ a tawp in zia numei chule a hung thi tai.

²⁸ Ahi’n, thawkit ni tak leh zia nu chu unau sagite lak ah a kua pen ji a hita diam? A leng un a kichenpi chiat ngal un, a tiu a.

²⁹ Jesu’n a dawnhu ah, Pathian Lekha thu leh Pathian thilhitheina la het lo ziak un la ngai khial uh ahi.

³⁰ Thawkitna ni tak leh vang ji nei, kichen tite hi um ta pua’n tin, van ah Pathian vansawlchâkte gual in um zaw ta’n au.

³¹ Ahileh, mithi thawkitna lam thu Pathian in a gensa kha sim kha lo la hiu em?

³² “Keima hi Abraham Pathian, Isak Pathian leh Jakob Pathian chu ka hi. Pathian chu mithi Pathian a hipua’n, a hingte Pathian a hizawi, ti thu kha,” a tia.

³³ Mipite chun zia chu a het un, a thu zilsak chu lamdang a sa ma mau hi.

Thupiak Lak ah A Lopipen

³⁴ Sadukaite chu Jesu’n a nial dong hi ti a het phat un, Pharisaite chu a hung kikhawm un,

³⁵ a lak ua danthiam mi pakhat in ama ze-etna’n a hun dong a:

³⁶ Hotupa, Dan thupiakte lak in bang a thupi pen em? a hung tia.

³⁷ Jesu’n a dawnhu a, Lalpa la Pathian chu la lunggil zosia, la hinna zosia leh la ngaituana zosia’n la hepi ding ahi,

³⁸ ti hi thupiak lak ah a masa pen leh a thupi pen chu ahi.

³⁹ Chuleh, a kibatpi zia hi ahi, nangma la kihepi gual in la vêngte la hepi ding ahi, ti hi.

⁴⁰ Zia thupiak pani’te hin Dan thu leh jawlneite thu zosia a khaikhawm hi, a tia.

David Chapa Thu ah Dotna

⁴¹ Chutia, Pharisaite a hung kikhop lai ua chun, Jesu’n thu pakhat a la dong a,

⁴² Messiah kiti hi bangti’n la ngaituau em? Ama chu kua cha a hi, la tiu em? a tia. Amau haw chun, David Chapa, a tiu a.

⁴³ Ama chun a kiang un, aleh, bangtidan ah David khan ama chu Thagau ah Lalpa, tithei a hem?

⁴⁴ Lalpa chun ka Lalpa kiang ah chun, La mêlmate la keng nuai ah ka koi masia, ka changlam in kichu’n? a ti kha.

⁴⁵ Chutia, David chun ama chu, Lalpa, a tingal leh, bangti’n a chapa hithei ding a hem? a tia.

⁴⁶ Tichun, kuama’n kam khat inle a dawnhu thei ta puau a, zia ni kipat chun kuama’n dotna dang le a dong ngam ta puau hi.