MATTHAI 12 - PATHIAN LEKHABU THIANGTHO (BSI)

Sabbath Ni Buvui Jut

¹ Zia nung ah chun, Jesu chu sabbath ni’n loulai haw malam in a chia a. A nungzuite chu a hung gilkial tau a; tichun, buvuite chu jut in, a ne tau hi.

² Pharisaite’n a hun mu phât un, Jesu kiang in, “En in, la nungzuite’n sabbath ni’n dan lo gual tak in thil a bawl ui,” a vatiu a.

³ Himaleh, Jesu’n a kiang un, “David leh a lawite a basap lai ua a thilbawl danteu kha la sim kha puau em?

⁴ Pathian In ah a valut in, ama leh a lawite’nle a nêk uh thiang lo, thiampute bep nêkthian vaithum kha a vala, a nek ziang uh thu kha?

⁵ Ahiloleh, sabbath ni Pathian biak In ah thiampute chun sabbath ni subuak taleu le, bawsiat ah ngai lo ding, ti dan ah um kha la sim kha ngai puau ah a hem?

⁶ Bang hitaleh, zia tak ah hin Pathian Biak In sâng ah lopi zaw a um hi, ti ka hil la hiu.

⁷ Ahi’n, kithoina ka dawi pua hen, jangaina ka dawi hi, ti hi a umzia heleuchin, mawna neilopi maw chansak lo ding la hiu in.

⁸ Mihing Chapa hi sabbath ni Lal ahi ngal a,” a tia.

Pawsal khat Khutzeng

⁹ Chun, zia tak ah kipat chun a pawtdok ah, a kikhopna in un a valut a.

¹⁰ Zia tak ah chun mi pakhat, khutzeng a la um a. Ama a hêktheina ding un, “Sabbath ni sukdam a thiang diam?” ti’n a hun dong un.

¹¹ Ama’n a kiang un, “La lak ua mi pakhat in, belam pakhat bep nei in kawkhûk in ke’lut taleh, kua a hem zia chu kaidok lo ding?

¹² Belam khat sâng in mihing pakhat bang gual tuk ah man tam zaw a hem? Ziaziakchun, sabbath ni thilpha bawl chu a thiang hi,” a tia.

¹³ Zia a gen zaw phat ah chun, zia pa kiang ah chun, “La khut chu hun jakin,” a tia. Tichun, a tundaw leh a langkhat gual in a dam thiang tai.

¹⁴ Ziazaw chun, Pharisaite a pawt ua, ama a tha theina ding uh ngaitua in a kiho-khawm tau a.

Pathian in A Suak Hi Ding ah A Têlchuam

¹⁵ Jesu’n zia chu a het phat in, zia kipat chun a kikoi kâng tai. Ahi’n, mipi tam tak in ama chu a zui jel un, amau chu a la hi’dam sik sek a;

¹⁶ a chanchin chu kuama kiang ah genjak lo dingin a khâm chak tai.

¹⁷ Jawlnei Isai kiang ah kigen kha a guitun theina dingin zia hi a gen a:

¹⁸ “En tiam un, ka nasemtu ka têlchuam, ka lungsiat leh a chung ah ka kipakna ma ma: ama chung ah chun ka Thagau koi ing ka tin, ama chun Jentelte kiang in ka vaihawmna thu chu puang in a.

¹⁹ Ama chun nial pua’n tin, kiko diak pua’n a; khawlai vêl ah le kuama’n a aw hepua’n au.

²⁰ Zo ding ah vaihawmna a sawldaw masia chu, luangkang subong pua’n tin, khuailu thaumei le sumit diak pua’n a.

²¹ Ama min in Jentelte kinepna um in a,” ti hi.

Jesu leh Belzebul

²² Zialaitak ah chun, mi pakhat thitha mat mitthûm, pautheilo a hun pui un; ama chun a la hi’dam ziang ta’n; tichun, mitthûm, pautheilo chun a hun muthei ah, paule a pauthei ngal tai.

²³ Mipi zosia chun mak a sa ma mau a, “David Chapa chu a himai diam maw?” a kitiu a.

²⁴ Himaleh, zia thu chu Pharisaite’n a het phat un, “Ziapa hin thithate hotu, Belzebul min in zia thithate hi a nawdaw ahi,” a tiu a.

²⁵ Jesu’n a lungthim ua a ngaituateu chu a hia’n, a kiang un, Kua gam hilehle a kikhen ua leh siatna a tung sek hi; kua khua hi’n, kua Insung hilehle a kikhen ua leh dingdok ngai pua’n a.

²⁶ Setan in Setan ma a nawdaw chun, ama leh ama kikhen a hita’n, bangti’n a gam chu dingdok thei ding a hem?

²⁷ Chuleh, keima’n Belzebul ziak ah thithate nawdok ka hi chun, la thuaihuaiteu khan kua ziak ah a nawdawu ahi diam? Ziaziakchun, amau chu nang uh chung thu’ vaihawm ding hita’n au.

²⁸ Ahi’n, Pathian Thagau ziak ah thithate nawdok ka hi’ziak in, Pathian Lal gam chu la chung un a hung tung ta ahi.

²⁹ Ahiloleh, mihat chu kân masak zet a hilo ngal leh, kua’n a bulu un, a nei leh lam a lak piak thei sek ua a hem? Zia tak chuleh vang a nei leh a lam zosia a chomdaw piak thei sek ui.

³⁰ Kuale keima lam ah pang lo chu ei do ahi’n; kuale ei lakkhawmpi lo chu ei thejak piak ahi.

Gitlo Ngaidam Theilo

³¹ Ziaziakchun, ka hil la hiu, kuale a gitlona leh a gensiatna zosia chu ngaidam thei ahi: Thagau Thiangtho gensia chu vang zia khawvel leh khawvel hung tung kit dinginle ngaidam thei hipua’n a.

³² Kuale, Mihing Chapa gensia chu ngaidam thei hi’ntin; Thagau Thiangtho gensia chu vang ngaidam thei hi pua’n au; zia khawvel leh khawvel hung tung kit dinginle.

Thing leh A Ga

³³ Thing pha chu a ga le a pha’n, thing phalo chu a ga le a pha puai: thing chu a ga ah hetthei ahi.

³⁴ Nanghaw migilo gûl suante haw, bangti’n thu pha genthei ding la hiu em? Lungthim ah dimlêt chu kam in a gen sek ngal a.

³⁵ Mipha chun a lungthim gobawm pha ah kipat chun thilpha a suadok sek in: Migilo chun a lungthim gobawm gilo ah kipat chun thil gilo a suadok sek hi.

³⁶ Himaleh, ka hil la hiu, vaihawm ni tak leh vang mitin in a thu manlo genteu zosia kha hun gendok kit sik sek ding a hiu.

³⁷ Nangma thu’n thiam chang in la tin, nangma thu ma ma in thiamlo chang ding la hi, a tia.

Jawlnei Jonah Tepte’na

³⁸ Lekhazikte lak ah khenkhat leh, Pharisaite lak ah lawikhat te chun a kiang in, “Hotupa, nangma ah kipat tepte’na mu ka nuam ui,” a hung tiu a.

³⁹ Himaleh, ama chun, Khangthak gilo leh ângkawm hatte’n tepte’na a hawl un; jawlnei Jonah tepte’na tilo ngal tepte’na dang piak hita pua’n a.

⁴⁰ Jonah chu ngapi gilpi sung ah ni thum leh jan thum a um gual khan, Mihing Chapa le lei nuai in ni thum leh jan thum um in a.

⁴¹ Vaihawm ni tak leh, Nineveh khua mite kha hung dingin tiu in, tu’lai khangthakte hi thiamlo hun chansak in au: Amau chun Jonah thu gen ziakin a gitloteu a haisan ui; en tiam un, Jonah sâng ah lopi zaw zia hin a um hi.

⁴² Vaihawm ni tak leh simlam lengnu khale hung kipan intin, tu’lai khangthakte hi thiamlo hun chansak ding ahi; Solomon pilna thu he ding mai in bawn kawlmong ah kipat in a hung hi; ngai un, Solomon sâng ah lopi zaw zia hin a um hi.

Thagau Buak Hung Kile’kit

⁴³ Thitha buak mihing sung ah kipat ah pawt in, umna ding hawl in, tui um lona munte’n a vâk vêl vêl ah, a vamu diak pua’n;

⁴⁴ Ka pawtna In ma khan chia kit mai ing ka, a tia. A hung kit phat in zia In chu a hawm leh phiatnâmsa’n a vamu ta’n.

⁴⁵ Tichun, a vachia kit ah, ama sâng ah gilo zaw thitha dang sagi a hun pui a, zia tak chun lut in a chêng tau hi; zia mihing umdan nunung zaw chu a masa sâng in a hung sezaw tai. Zia gual ma chun, tu’lai khangthakte chung ah hinle tung ding ahi, a tia.

Jesu Nu leh A Suapi Diktakte

⁴⁶ Jesu’n mipite kiang ah thu a gen lai chun, a nu leh a suapite a hung ua, ama kihopi nuam in, In mai lam in a ding ua.

⁴⁷ Mipi lak ah mi khat in, “En tia, la nu leh la suapite’n In mai lam in nang hun ho nuam in a ngak zing ui,” a tia.

⁴⁸ Himaleh, ama chun a dawnhu a, “Ka nu chu kua a hem, ka suapite chule kua a hiu em?” a tia.

⁴⁹ A nungzuite lam in a khut a jak a, “En tiam un, ka nu leh ka suapite hi.

⁵⁰ Kuale, ka Pa van ah um doi gual hi’ tapo chu, ziate ngei chu ka suapipa, ka suapinu leh ka nu a hiu,” a tia.