MATTHAI 10 - PATHIAN LEKHABU THIANGTHO (BSI)

Nungzui Sawm leh Nite

¹ Chun, a nungzui sawm leh nite chu a ko khawm a, thithate nawdaw theina leh damlo, natna tinchengte sukdam theina thilhitheina a pia’n.

² Zia sawlchâk sawm leh nite chu: Simon, Peter kiti leh a suapi Andria tawh, Zebedai chapa Jakob leh a suapi Johan tawh;

³ Philip leh Bartholomai leh Thoma tawh sedawlpa Matthai tawh, Alphâi chapa Jakob tawh, Thaddai tawh;

⁴ Kanaan mi Simon leh a matsakpa Juda Iskariot tawh a hiu hi.

Sawm leh Nite A Sawldawna

⁵ Jesu’n zia sawm leh nite chu a sawldok ah, a kiang un, Jentelte gam leh Samaria mite khua him him ah lut kiu inla;

⁶ Israel nam belam mangthaite kiang bep in vachiau in.

⁷ La chia nau ah chun, “Van-gam chu a nai tai,” ti’n hil jel un.

⁸ Damlote hi’dam unla, mithite kaitho unla, phâkte hi’thiangtho unla, thithate le nawdok un; a thawn in la muu ah, a thawn in vapiau in.

⁹ La dangka dip ua chun sana a hem, dangka a hem, sum-eng a hem keng kiu inla;

¹⁰ khual zinna dingin sakhau a hem le keng kiu inla, puanâk thua leh kengtawdap leh tiangkhut le keng diak kiu in. Nasemte chu nêk kimu tâk him ahi ngal un.

¹¹ Khawlian hileh khawneu hilehle, la lutna taphot ua chun a la zintun thei ding mi hawl unla, zia tak chun la kipat daw kit masiau tung zing un.

¹² In ah la lut ding si’n ua leh chibai bûk sek un.

¹³ Zia gual ah la valutnau ah chun min a la lop ua leh, la thamuanna thuu chu a chung un tung hen; himaleh, a la lawp lo ua leh vang, la thamuanna thuu kha la chung un hung kile’kit ta hen.

¹⁴ Chun, a khua a hem, a In ah umte a hem chun a la lawp lo ua, la thugen uh le a la lawp lo ua leh, la keng ua leivui chu tât thâk khum malam un.

¹⁵ Titakzet in ka hil la hiu, vaihawm ni ah chun, zia khawte sâng ah chun Sodom leh Gomorrah thok ding chu nêp zaw’n a.

Sukgentheina Hung Tung Ding

¹⁶ Ngai un, ngei hon lak ah belam um gualin ka hun sawl la hiu hi; tichun, gûl gual ah pil, vakhu gual ah poikhoi lo in um un.

¹⁷ Himaleh, mihing lak ah chun chingthei un; vaihawmte hun matsak intiu in, kikhopna In ah te hun vua’n tiu in;

¹⁸ ahi, keima ziakin vaihawmte leh lengte ma-âng ah, amau leh Jentelte kiang ah hiatsakna dingin hun pui in au.

¹⁹ Himaleh, a hun matsak phat ua leh, bangti ding, bang thu gen ding ka hem? ti’n lungkham kiu in; la gen ding uh chu a hun tak ah piak hiding la hingal un.

²⁰ A gen ding chu nang uh hilo in, la Pau thagau in gensak zaw ding ahi.

²¹ Tha dingin unau leh unau kimattua sak intiu in, pa’n le a cha matsak intiu in; chate’nle a nu leh pateu do intiu in, thâsak in au.

²² Keima min ziakin mi zosia huat hi’n lau; himaleh, a tawp tiang ah thuak mualsuak tapo chu hukdam in um in au.

²³ Chutichun, zia khua chun a sukgenthei phat ua leh khaw dang ah taisan un; titakzet in ka hil la hiu, Mihing Chapa a hung masang in Israelte khua haw chu chuan suak pua’n lau.

Nungzui Man leh a Lawchâk

²⁴ Nungzui chu a hotu sâng in a lianzaw thei puai; suak le a pu sâng in a chungnung zaw thei diak puai.

²⁵ Nungzui chu a hotu gual ah a hung um ah, suak le a pu gual ah a hung um leh hun tawk ahi. Insung khat ah a luchang pen bawn Belzebul a tiu leh, a Insung mite chu tina lawm lawm in au e!

Kua A hem Lau Ding

²⁶ Himaleh, ziate chu kicha kiun; taklat lo ding ah selgûk bangma a um pua’n; chuleh, thugûk het lo ding ah îm le a um diak puai.

²⁷ Thim lak ah ka gen hi vâk ah genjak unla, munthip ah ka hun hilte hi Inchung ah kikopiu in.

²⁸ Taksa bep thatthei, thagau that theilo chu lau kiu inla; taksa leh thagau susia thei ah, gawt mun ah koithei nalai chu lau zawu in.

²⁹ Vachong pani paisa khat in a khawng sek uh hilo a hem? Himaleh, a lak ua pakhat chale la Pau thu lo in lei ah ketha pua’n a.

³⁰ La samzang natiang uh sim suak dîm diam ahi.

³¹ Ziaziakchun, lau kiu in, vachong tam tak sâng in la lûl zawu hi.

³² Kuale, mite ma ah ei panpi tapo, ka pa van ah um ma ah panpi ing ka tin;

³³ himaleh, kuale mite ma ah ei kilepsan tapo chu, ka Pa van ah um ma ah ke’n le kilepsan ing ka.

Chamna Hilo ah Chemjam Lensak Zaw Ding

³⁴ Khawvel ah hin kichamna lensak ding ah hung a hem ei ti kiu in; kichamna lensak ding ah hung ka hipua’n, chemjam lensak ding ah hung ka hizawi.

³⁵ Mi a pa dosak dingin, chanu a nu dosak dingin, mo a talpi dosak dingin hung ka hizawi.

³⁶ Mitin a mêlmau chu ama chanaute lak ah mi ngei hi’n au.

³⁷ Kuale a nu a hem, a pa a hem, keima sâng ah hepi zaw chu, ka mi hi tâk ahi puai; kuale a chanu a hem, a chapa a hem, keima sâng ah hepi zaw chule ka mi hi tâk ahi puai.

³⁸ Kuale a kros kiput ah ei zuilo chu ka mi hi tâk ahi puai.

³⁹ Kua’nle ama hinna ding bep a ngaitua chun chân intin; kuale keima ziak ah a hinna chân chun mu’n a.

Kipakmante

⁴⁰ Kua’nle a la lop ua leh keima ei lop hi’n tiu in, chuleh, keima ei lop chu keima ei sawlpa lop ahi.

⁴¹ Kua’nle jawlnei chu jawlnei min ah a la lop chun, jawlnei kipakman chu mun tin; chuleh, kua’nle midik chu midik min ah a la lop chun, midik kipakman chu chang ding ahi.

⁴² Chuleh, kua’nle ziate lak ah, a neupen hile nungzui ahi’na ziak ah, tuivot no khat a la piak chun, titakzet in ka hil la hiu, a kipakman ding uh chu chân him him pua’n au, a tia.