MARKA 8 - PATHIAN LEKHABU THIANGTHO (BSI)

Mipi Sang li A Vâkna

¹ Zia hun lai ah chun, mipi tam tak a hung khawm kit ua, nêk ding bangma a nei puau ah, a nungzuite a ko ah, a kiang un,

² “Mipite hi ka kiang ah tu’hin ni thum a um tau in, nêk ding bangma a neilo ziak un ka lungsiat ma ma hi.

³ An ne lo in a In lam un sawl leng la lamkâl ah basam khan tiu in; a hungnau hi la gamla tak tak ahi ngal in,” a tia.

⁴ A nungzuite chun, “Zia gamthip ah hin mi zia jat jat nêk ding vaithum khoi ah vala ding ka hiu em?” a tiu a.

⁵ Ama chun, “Vaithum bang jat la nei awm?” ti’n a dong a. Amau chun, “Sagi,” a tiu a.

⁶ Ziaphatchun, mipi chu leitual ah kichu dingin thu a pia; vaithum pasagi chu a la, kipak thu a gen ah, a phelsua ah, a nungzuite kiang in a hawm ding un a pia; amau chun mipite lak ah chun a hawm tau hi.

⁷ Chuleh, sanga tawmcha le a nei un; ziate chule mal a jawl ah, a lak ua hawm dingin thu a pia kit a.

⁸ A ne vâ chiat tau a; chuleh, a nêkbang themnên uh chu a hun luak khawm ua, bawm sagi a pha nalai hi.

⁹ A ne zosia chu sang li ding vêl a hiu a. Ziazaw chun, amau chu a chiasak tai.

¹⁰ Chuleh, ama chu a nungzuite tawh kuang in a chuang ngal un, Dalmanutha gam chu a zuan tau hi.

Tepte’na A Dotnau

¹¹ Pharisaite a hung un, ama ze-etna dingin van ah kipat tepte’na don in, a hung nial ua.

¹² Ama chu a lungthim gil tak ah nasa tak in a hung thûm ah, “Bangatia tu’lai khangthakte hin tepte’na hawl a hiu em? Titakzet in ka hil la hiu, Tu’lai khangthakte kiang ah hin tepte’na him him piak hipua’n a,” a tia.

¹³ Tichun, amau chu nusia in, kuang ah chun a chuang ah, gâl langkhat lam in a chia tai.

Pharisaite leh Herod Thawi

¹⁴ A nungzuite chun vaithum a keng hemil un, vaithum tangkhat beplo ngal chu kuang ah chun vaithum dang a nei ta puau a.

¹⁵ Ama chun a kiang un, “Pharisaite thawi leh Herod thawi lak in kivêng unla, chingthei un,” a tia.

¹⁶ Amau chun, “Vaithum I neilo ziak uh ahi,” a kitiu a.

¹⁷ Jesu’n zia chu a la het phat in a kiang un, “Bangatia vaithum la neilo ziak ua lungkham la hiu em? Tu’tiang hinle hethei nai lo ah, hethiam nai lo la hiu maw? La lung uh tâksak ah um a hita em?

¹⁸ Mit nei ngal ah mu lo la hiu em? Bil nei ngal in he lo la hiu em? La hezing puau em?

¹⁹ Sang nga lak ah vaithum panga ka phelsua lai khan, a vâl bawm bang jat la luak dim uh em? a tia. Amau chun, chûn, ‘Sawm leh ni,’ a tiu a.

²⁰ ‘Ahileh, sang li lak ah vaithum pasagi ka phelsua lai khan, a vâl bawm bang jat la luak dim awm?’ a tia. Amau chun, ‘Sagi,’ a tiu a.

²¹ Aleh, zia tiang ah chule hethei nai lo maw?” a tia.

Bethsaida ah Jesu’n Mitthûm A Hi’vakna

²² Ziazaw chun, Bethsaida khua a hung tung tau a; zia tak ah chun mitthûm pakhat a kiang in a hun pui ua, a khoi dingin a hung don ua.

²³ Mitthûmpa chu a khut in a kaibât ah, khawpi pâm lam ah chun a puidok ah; a mit ah a chil a sek ah, a chung ah a khut a ngak zaw in, “Thil la muthei em?” ti’n a dong a.

²⁴ A hung dakdok ah, “Mihing ka mu hen, ahi’n la thing chia gual in ka mui,” a tia

²⁵ A khut in a mit chu a khoi piak kit ah, khua a etsak kit ah; a hung pha ta mai ah; thil zosia kichian tak in a hun muthei tai.

²⁶ Ziaphatchun, a In lam in a sawl ah, “Khaw sung lut kin la, kuamale hil kin,” a tia.

Peter in Jesu A Puandawna

²⁷ Ziazaw chun, Jesu chu a nungzuite tawh a pawtdok ua, Kaisaria Philippi bial ah khuate chun a chiau a, lampi’n a nungzuite chu a dong a: “Mite’n kua ahi ei tiu em?” a tia.

²⁸ Amau chun, “Khenkhat in, ‘Baptispa Johan ahi,’ a hun tiu in, khenkhat in, ‘Elijah ahi,’ a hun tiu in, midang khenkhatte chun, ‘Jawlneite lak ah pakhat ahi,’ a hun tiu hi,” a tiu a.

²⁹ Ama chun a kiang un, “Aleh, nang un kua ahi lei tiu em?” ti’n a dong a. Peter chun a dawnhu a, “Messiah chu la hi,” a tia.

³⁰ Ziaphatchun, a chanchin chu kuama hil lo dingin a khâm chak kei tai.

Jesu’n A thi ding leh A thawkit Ding A Genlawkna

³¹ Ziaphatchun, “Mihing Chapa hin thil tam tak thuak intin, upate leh thiampu lalte leh, lekhazikte doi lo in um intin; himaleh, ni thum zaw leh tho kit ding ahi,” a tia.

³² Zia thute chu kichian tak in a gen a. Peter in ama chu a pui chuam ah, a hilgai a.

³³ Himaleh, ama chu a kihei ah, a nungzuite chu a en ah, Peter chu a vau ah, “Setan, ka nung ah chia in, Pathian thilte ngaitua lo in, mihing thilte la ngaitua zaw ahi,” ti in.

³⁴ Tichun, mipite leh a nungzuite chu a ko khawm ah, a kiang un, “Kua’nle ka nung a zui nop chun, ama kihemil in, ama kros kiput in ei zui hen.

³⁵ Kuale a hinna humbit chun chân intin, kuale keima leh chanchinpha ziak ah a hinna chân chun humbit ngei in a.

³⁶ Min khawvel hi a pum in nei hen la, a hinna chân taleh, ama â dingin bang a phachuam diam?

³⁷ Min a hinna thasâng in bang a pia thei diam?

³⁸ Kuale tu’lai khangthak ângkawm leh gilo lak ah, keima leh ka thu japi tapo, Mihing chapa’n vansawlchâk thiangthote tawh, a Pa lopina kivan ah a hung phat leh, zia mi ngei chu hun japi thuk in a,” a tia.